ກົມຕໍາຫຼວດສະກັດກັ້ນ ແລະ ຕ້ານການຄ້າມະນຸດ, ກົມໃຫ່ຍຕໍາຫຼວດ ກະຊວງປ້ອງກັນຄວາມສະຫງົບ ສປປລາວ ແລະ ກົມສະກັດກັ້ນ, ຕ້ານຢາເສບຕິດ ແລະ ອາຊະຍາກໍາ ກອງບັນຊາການທະຫານຊາຍແດນ, ກະຊວງປ້ອງກັນປະເທດ ສສ ຫວຽດນາມ ໄດ້ລົງນາມບົດບັນທຶກຊ່ວຍຈໍາຮ່ວມກັນໃນຕອນເຊົ້າຂອງວັນທີ 15 ພະຈິກ 2024 ທີ່ນະຄອນຫຼວງຮ່າໂນຍ ສສ ຫວຽດນາມ ຄະນະຝ່າຍລາວນໍາໂດຍ ພັອ ກິແກ້ວ ຈັນທະລັງສີ ຫົວໜ້າກົມຕໍາຫຼວດສະກັດກັ້ນ ແລະ ຕ້ານການຄ້າມະນຸດ ແລະ ຝ່າຍຫວຽດນາມນໍາໂດຍ ພົຈວ ໂດ ຫງ໋ອກ ແກງ ຫົວໜ້າກົມສະກັດກັ້ນ, ຕ້ານຢາເສບຕິດ ແລະ ອາຊະຍາກໍາພ້ອມດ້ວຍຄະນະສອງຝ່າຍເຂົ້າຮ່ວມ.
ການລົງນາມບົດບັນທຶກຊ່ວຍຈຳຄັ້ງນີ້ເພື່ອເປັນການຊຸກຍູ້, ເພີ່ມທະວີການປະສານໃນຂົງເຂດວຽກງານຕ້ານການຄ້າມະນຸດເປັນຕົ້ນ ແມ່ນການແລກປ່ຽນຂ່າວສານ, ສະພາບອາສະຍາກໍາຄ້າມະນຸດເຂດຊາຍແດນ, ການໂຄສະນາເຜີຍແຜ່ວຽກງານຕ້ານການຄ້າມະນຸດໃຫ້ປະຊາຊົນ ຢູ່ບໍລິເວນລາວ-ຫວຽດນາມໄດ້ຮັບຮູ້, ການປະສານສົມທົບການສຶບສວນ-ສອບສວນມ້າງລາຍຄະດີສະເພາະ ເພື່ອຕໍ່ສູ້ກັບອາຊະຍາກໍາຄ້າມະນຸດ, ການກອບກູ້ຊ່ວຍເຫຼືອກຸ່ມສ່ຽງ ແລະ ຜູ້ຖຶກເຄາະຮ້າຍຈາກການຄ້າມະນຸດຂອງທັງສອງຝ່າຍ.
ພ້ອມນີ້, ຍັງເປັນການຜັນຂະຫຍາຍການຮ່ວມມື ສອງຝ່າຍລາວ-ຫວຽດນາມ ເຂົ້າສູ່ລວງເລິກ ແລະ ກວມໃນຂົງເຂດວຽກງານຢ່າງຮອບດ້ານ ເພື່ອແກ້ໄຂຕໍ່ບັນຫາອາຊະຍາກໍາຄ້າມະນຸດຢ່າງຕັ້ງໜ້າ.
ໃນປີ 2025 ສອງຝ່າຍແມ່ນຈະໄດ້ຮ່ວມກັນສ້າງແຜນການຈັດຕັ້ງປະຕິບັດ ບົດບັນທຶກຊ່ວຍຈໍາດັ່ງກ່າວ ເພື່ອເປັນການກໍານົດໜ້າວຽກລະອຽດໃນການເຮັດວຽກຮ່ວມກັນໃຫ້ມີປະສິດທິຜົນສູງສຸດ.
