ວັນທີ 12 ພະຈິກ 2024 ນີ້ ກອງບັນຊາການ ປກສ ແຂວງໄຊຍະບູລີ ໄດ້ຈັດກອງປະຊຸມສ່ອງແສງວຽກງານພັກ – ວຽກງານການເມືອງ ປ້ອງກັນຄວາມສະຫງົບ 3 ແຂວງ 1 ນະຄອນ ຄື: ກອງບັນຊາການ ປກສ ແຂວງໄຊຍະບູລີ, ກອງບັນຊາການ ປກສ ແຂວງວຽງຈັນ, ກອງບັນຊາການ ປກສ ແຂວງຫຼວງພະບາງ ແລະ ກອງບັນຊາການ ປກສ ນະຄອນຫຼວງວຽງຈັນ, ຂື້ນຢູ່ທີ່ຫ້ອງປະຊຸມຊັ້ນສາມຂອງກອງບັນຊາການ ປກສ ແຂວງໄຊຍະບູລີ ໂດຍການເປັນປະທານຂອງ ສະຫາຍ ພົຕ ປອ ສຸວັນນີ ສີສຸພາບມີໄຊ ຄະນະປະຈໍາພັກກະຊວງ ຫົວໜ້າກົມໃຫຍ່ການເມືອງ ກະຊວງປ້ອງກັນຄວາມສະຫງົບ, ມີຄະນະຮັບຜິດຊອບຈາກກະຊວງ, ບັນດາສະຫາຍຕາງໜ້າຄະນະພັກ, ຄະນະບັນຊາຈາກກອງບັນຊາການ 3 ແຂວງ, 1 ນະຄອນ, ຫົວໜ້າຫ້ອງ ກົມກອງອ້ອມຂ້າງ ພ້ອມດ້ວຍຫົວໜ້າກອງບັນຊາການ ປກສ ເມືອງ 11 ເມືອງຈາກແຂວງໄຊຍະບູລີ ເຂົ້າຮ່ວມ.
ສະຫາຍ ພົຈວ ຄໍາແພງ ເພັດ ເລຂາຄະນະພັກ ຫົວໜ້າກອງບັນຊາການ ປກສ ແຂວງໄຊຍະບູລີ ໄດ້ກ່າວຕ້ອນຮັບສະຫາຍ ພົຕ ປອ ສຸວັນນີ ສີສຸພາບມີໄຊ ພ້ອມດ້ວຍຄະນະ ແລະ ຄະນະທີມງານທີ່ມາຈາກ 3 ແຂວງ 1 ນະຄອນ ທີ່ລົງມາເຄື່ອນໄຫວເຮັດວຽກຢູ່ກອງບັນ ຊາການ ປກສ ແຂວງໄຊຍະບູລີ ໃນຄັ້ງນີ້, ສະຫາຍ ພົຕ ປອ ສຸວັນນີ ສີສຸພາບມີໄຊ ຄະນະປະຈໍາພັກກະຊວງ, ຫົວໜ້າກົມໃຫຍ່ການເມືອງ ກະຊວງປ້ອງກັນຄວາມສະຫງົບ ກໍໄດ້ມີຄໍາເຫັນເຈາະຈີ້ມຕໍ່ກອງປະຊຸມສ່ອງແສງວຽກງານພັກ-ວຽກງານການເມືອງ ປ້ອງກັນຄວາມສະຫງົບ. ຈາກນັ້ນ, ຄະນະກອງບັນຊາການ ປກສ ແຂວງ ທັງ 3 ແຂວງ, 1 ນະຄອນ ກໍໄດ້ພັດປ່ຽນກັນລາຍງານສະພາບການເຄື່ອນໄຫວນໍາພາ-ຊີ້ນໍາ ວຽກງານພັກ – ວຽກງານເມືອງເມືອງໃນໄລຍະຜ່ານມາ ໂດຍໄດ້ຍົກໃຫ້ເຫັນດ້ານດີ, ດ້ານອ່ອນ ທີ່ຈະຕ້ອງໄດ້ສຶບຕໍ່ປັບປຸງແກ້ໄຂໃນຕໍ່ໜ້າ ໂດຍສະເພາະແມ່ນການນໍາພາ-ຊີ້ນໍາ ວຽກງານທາງດ້ານຄວາມຮັບຜິດຊອບໜ້າທີ່ການເມືອງ, ດ້ານແບບແຜນການນໍາພາ-ວິທີເຮັດວຽກ, ການສຶກສາອົບຮົບການເມືອງ-ແນວຄິດ, ການແກ້ໄຂສະພາບປະກົດການຫຍໍ້ທໍ້ໃນກໍາລັງ, ການກະກຽມ ແລະ ນໍາພາດໍາເນີນກອງປະຊຸມໃຫຍ່ຂັ້ນຮາກຖານພັກ, ວຽກງານຮັບປະກັນສະຖຽນລະພາບທາງດ້ານການເມືອງ ແລະ ຄວາມສະຫງົບ, ວຽກງານຄວາມເປັນລະບຽບຮຽບຮ້ອຍທາງດ້ານສັງຄົມ, ວຽກງານກໍ່ສ້າງຮາກຖານການເມືອງ, ວຽກງານຮັບປະກັນພະລາທິການ ການເກັບລາຍຮັບຜ່ານປະຕູດຽວ ແລະ ວຽກງານເສນາທິການ ແລະ ພົວພັນຕ່າງປະເທດ.
ໃນກອງປະຊຸມຜູ້ເຂົ້າຮ່ວມໄດ້ແລກປ່ຽນຄໍາຄິດເຫັນ ແລະ ການປະສານສົມທົບ ໃນການແກ້ໄຂວຽກງານລະຫວ່າງສູນກາງກັບທ້ອງ ຖິ່ນ ແລະ ທ້ອງຖິ່ນກັບທ້ອງຖິ່ນດ້ວຍກັນ ເພື່ອເຮັດໃຫ້ວຽກງານປ້ອງກັນຄວາມສະຫງົບ ຮັບປະກັນໄດ້ຄຸນນະພາບ ແລະ ມີຄວາມເຕີບໃຫຍ່ເຂັ້ມແຂງຢ່າງບໍ່ຢຸດຢັ້ງ. ຕອນທ້າຍກອງປະຊຸມ ຍັງໄດ້ຮັບຟັງການມີຄໍາເຫັນຊີ້ນໍາຈາກ ສະຫາຍ ພົຕ ປອ ສຸວັນນີ ສີສຸພາບມີໄຊ ເພື່ອເຮັດໃຫ້ການນໍາພາ-ຊີ້ນໍາຈັດຕັ້ງປະຕິບັດວຽກງານພັກ-ວຽກງານການເມືອງ ຂອງຄະນະພັກ – ຄະນະບັນຊາແຕ່ລະຂັ້ນ ໃຫ້ມີປະສິດທິພາບດີຂຶ້ນເປັນກ້າວໆ.
