ກອງບັນຊາການປ້ອງກັນສູນກາງ ກະຊວງປ້ອງກັນຄວາມສະຫງົບ ໄດ້ຈັດກິດຈະກໍາສ້າງຂະບວນການແຂ່ງຂັນກິລາ ເພື່ອສະຫລອງວັນສ້າງຕັ້ງກໍາລັງປ້ອງກັນສູນກາງ ຄົບຮອບ 63 ປີ (ວັນທີ 11 ພະຈິກ 1961-11 ພະຈິກ 2024) ໃນທ້າຍອາທິດຜ່ານມາ, ເປັນປະທານໂດຍ ພົຈວ ສົມພົງ ຂໍາວິລຸນ ຫົວໜ້າກອງບັນຊາການປ້ອງກັນສູນກາງ, ມີຄະນະພັກ-ຄະນະກອງບັນຊາການ, ຫ້ອງ, ໂຮງຮຽນ, ພະແນກ, ກອງພັນ, ກອງຮ້ອຍ ເຂົ້າຮ່ວມ.
ການແຂ່ງຂັນກິລາທົ່ວກໍາລັງປ້ອງກັນສູນກາງ ສະຫຼອງວັນສ້າງຕັ້ງກໍາລັງປ້ອງກັນສູນກາງ ຄົບຮອບ 63 ປີ ໄດ້ເລີ່ມຈັດຕັ້ງປະຕິບັດມາແຕ່ວັນທີ 4-8 ພະຈິກ 2024, ຕະຫຼອດໄລຍະການແຂ່ງຂັນ ແມ່ນເຕັມໄປດ້ວຍບັນຍາກາດຟົດຟື້ນມ່ວນຊື່ນ, ສະໜິດສະໜົມດ້ວຍຄວາມສາມັກຄີ, ມິດຕະພາບ, ຮັກສາໄດ້ບັນຍາກາດຂອງການແຂ່ງຂັນກິລາແຕ່ລະປະເພດ, ຮັກສາໄດ້ກົດກະຕິກາການແຂ່ງຂັນ, ເອົາໃຈໃສ່ທຸ່ມເທເຫື່ອແຮງ, ກຳລັງ, ສະຕິປັນຍາຂອງຕົນສຸດຄວາມສາມາດ, ຫຼາຍພາກສ່ວນ ກໍສາມາດຍາດໄດ້ຂັນລາງວັນມາສູ່ຕົນເອງ ແລະ ກົມກອງ, ທັງເປັນການຊອກເຫັນໄດ້ພອນສະຫວັນ, ທັກສະຂອງນັກກິລາປະເພດຕ່າງໆ ທີ່ມາຈາກຫ້ອງ, ກອງພັນ, ໂຮງຮຽນ ອ້ອມຂ້າງກອງບັນຊາການ ສາມາດຄັດເລືອກໄດ້ນັກກິລາຜູ້ທີ່ດີ ແລະ ເກັ່ງ ໄວ້ເປັນຕົວແທນໃຫ້ແກ່ທີມກອງບັນຊາການປ້ອງກັນສູນກາງ ເພື່ອເຂົ້າຮ່ວມແຂ່ງຂັນກິລາຂັ້ນຕ່າງໆຕໍ່ໄປ.
ການແຂ່ງຂັນກິລາອ້ອມຂ້າງກອງບັນຊາການໃນຄັ້ງນີ້ ມີ 2 ປະເພດກິລາ ຄື: ບານເຕະອາວຸໂສ ມີ 4 ທີມ, ເປຕັງ ທີມປະສົມຊາຍ-ຍິງ ມີ 12 ທີມ; ຜ່ານການແຂ່ງຂັນກິລາແຕ່ລະປະເພດ ສາມາດສະຫຼຸບໄດ້ຄື: ປະເພດບານເຕະອາວຸໂສ ອັນດັບ 1: ກອງພັນ 121, ອັນດັບ 2: ກອງພັນ 120, ອັນດັບ 3: 4 ຫ້ອງ-ໂຮງຮຽນ, ອັນດັບ 4: ກອງພັນ 122, ປະເພດເປຕັງປະສົມຊາຍ-ຍິງ, ອັນດັບ 1 : ໂຮງຮຽນ ປກສ ຊັ້ນຕົ້ນປ້ອງກັນສູນກາງ, ອັນດັບ 2 : ຫ້ອງການ, ອັນດັບ 3 : ຫ້ອງເສນາທິການ, ອັນດັບ 4 : ກອງພັນ 121.
