ກອງປະຊຸມພົບປະລະຫວ່າງ ກອງບັນຊາການ ປກສ ແຂວງດຽນບຽນ ແຫ່ງ ສສ ຫວຽດນາມ ກັບ ກອງບັນຊາ ການ ປກສ ແຂວງຜົ້ງສາລີ ຈັດຂຶ້ນຂຶ້ນເມືີອບໍ່ດົນມານີ້ທີ່ກອງບັນຊາການ ປກສ ແຂວງດຽນບຽນ ສສ ຫວຽດນາມ. ຝ່າຍຫວຽດນາມນໍາໂດຍ ສະຫາຍ ພັນເອກ ຢາງ ປ້າວ ສິ້ງ ຮອງຫົວໜ້າກອງບັນຊາ ການ ປກສ ແຂວງດຽນບຽນ. ຝ່າຍລາວນໍາໂດຍ ສະຫາຍ ພັນເອກ ຢິນວັນນະສຸກ ບຸດຕະນະວົງ ຮອງຫົວໜ້າກອງບັນຊາການ ປກສ ແຂວງຜົ້ງສາລີ.
ສອງຝ່າຍ ໄດ້ຜັດປ່ຽນກັນລາຍງານສະພາບການຕ່າງໆຂອງແຂວງຕົນ ໃນໄລຍະຜ່ານມາ ໃຫ້ກັນຊາບ ໂດຍສະເພາະ ສະພາບ ການທາງດ້ານການເມືອງ, ດ້ານເສດຖະກິດ- ສັງ ຄົມ, ການເຄື່ອນ ໄຫວຂອງກຸ່ມຄົນບໍ່ດີ ແລະ ບັນຫາປະກົດການຫຍໍ້ທໍ້ຕ່າງໆທີ່ເກີດຂຶ້ນ ເປັນຕົ້ນແມ່ນ: ບັນຫາຢາເສບ ຕິດ, ການຄ້າຂາຍເຖື່ອນ, ການລັກລອບສ້າງຄອບ ຄົວແບບຜິດກົດໝາຍ ແລະ ການລັກລອບເຂົ້າ-ອອກເມືອງຂອງປະຊາຊົນສອງແຂວງ ທີ່ເຄື່ອນໄຫວບໍ່ຖືກຕ້ອງຕາມລະບຽບກົດໝາຍ, ບັນຫາສາສະໜາ ແລະ ບັນດາປະກົດການຫຍໍ້ທໍ້ຕ່າງໆທີ່ຜິດຕໍ່ລະບຽບກົດໝາຍ ທີ່ມັກເກີດ ຂຶ້ນຢູ່ບໍລິເວນຊາຍແດນທັງສອງປະເທດ, ອັນເປັນສາເຫດທີ່ສົ່ງຜົນກະທົບຕໍ່ສອງຝ່າຍ ໂດຍສະເພາະ ກໍຄື ຕາມເຂດຊາຍແດນລະຫວ່າງ ແຂວງຜົ້ງສາລີ ແຫ່ງ ສປປ ລາວ ແລະ ແຂວງດຽນບຽນ ແຫ່ງ ສສ ຫວຽດນາມ.
ສອງຝ່າຍ ໄດ້ພ້ອມກັນຄົ້ນຄວ້າປຶກສາຫາລືຕີລາຄາຊອກຫາວິທີແກ້ໄຂຮ່ວມກັນຕໍ່ກັບບັນຫາກົນອຸບາຍ ແລະ ການ ເຄື່ອນ ໄຫວຂອງກຸ່ມຄົນທີ່ບໍ່ຫວັງດີ ທີ່ເຄື່ອນໄຫວກໍ່ການກະທຳ ຜິດ, ອັນເປັນບັນຫາອັນສຳຄັນໃນການຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ການພັດທະນາຂອງທັງ ສອງປະເທດ.
ສອງຝ່າຍຈະເອົາໃຈໃສ່ເພີ່ມທະວີຮັດແໜ້ນສາຍພົວພັນແລກປ່ຽນຂໍ້ມູນຂ່າວສານ ເພື່ອຈັດຕັ້ງຜັນຂະຫຍາຍສາຍພົວ ພັນແບບພິເສດຂອງສອງພັກ-ສອງລັດ ເຂົ້າໃນການຮ່ວມມືເພື່ອປ້ອງກັນ ແລະ ສະກັດກັ້ນສະພາບການຕ່າງໆທີ່ອາດຈະເກີດຂຶ້ນ.
ນອກນັ້ນ, ຍັງເພີ່ມທະວີວຽກງານໂຄສະນາສຶກສາອົບຮົມໃຫ້ພົນລະເມືອງຂອງສອງປະເທດ ໃຫ້ເຄົາລົບປະຕິບັດລະບຽບກົດໝາຍ ແລະ ຕາມຮີດຄອງປະເພນີຂອງແຕ່ລະປະເທດໃຫ້ເລິກເຊິ່ງ ໂດຍສະເພາະການປະຕິບັດການເຂົ້າ-ອອກເມືອງ ໃຫ້ຖືກຕ້ອງຕາມລະບຽບກົດໝາຍຂອງສອງປະເທດ ທີ່ໄດ້ກຳນົດໄວ້ຢ່າງເຂັ້ມງວດ.
ໃນກໍລະນີມີເຫດການເກີດຂຶ້ນ ເຊິ່ງພົວພັນເຖິງຄວາມບໍ່ສະືຫງົບຂອງສອງແຂວງ ຕ້ອງກຽມພ້ອມຕອບສະໜອງຢ່າງທັນການຕາມການສະເໜີຂອງອີກຝ່າຍ ໂດຍສອດຄ່ອງກັບບັນດາກົດໝາຍຂອງສອງປະເທດ. ທັງນີ້, ກໍເພື່ອຮັບປະກັນໃຫ້ທັງສອງປະ ເທດມີຄວາມສະຫງົບ ແລະ ຄວາມເປັນລະບຽບຮຽບຮ້ອຍ.
ຈາກນັ້ນ, ຄະນະຜູ້ແທນທັງສອງຝ່າຍ ໄດ້ພ້ອມກັນລົງນາມເຊັນບົດບັນທຶກຊ່ວຍຈຳ ໃນການຮ່ວມມືຮັກສາຄວາມສະ ຫງົບ ລະຫວ່າງ ສະຫາຍ ພັນເອກ ຢາງ ປ້າວ ສິ້ງ ຮອງຫົວ ໜ້າກອງບັນຊາການ ປກສ ແຂວງດຽນບຽນ ແຫ່ງ ສສ ຫວຽດນາມ ກັບ ສະຫາຍ ພັນເອກ ຢິນວັນນະສຸກ ບຸດຕະນະວົງ ຮອງຫົວໜ້າກອງບັນຊາການ ປກສ ແຂວງຜົ້ງສາລີ, ໂດຍມີຄະນະຜູ້ແທນທັງສອງຝ່າຍ ເຂົ້າຮ່ວມ.
