ວັນທີ 15 ຕຸລາ 2024 ຜ່ານມາ, ໄດ້ມີກອງປະຊຸມຖອດ ຖອນບົດຮຽນການຈັດຕັ້ງປະຕິບັດວຽກງານປະສານງານຂອງ 4 ພາກສ່ວນປະກອບມີ: ກຳມາທິການປ້ອງກັນຊາດ-ປ້ອງກັນຄວາມສະຫງົບ, ກະຊວງປ້ອງກັນປະເທດ, ກະຊວງປ້ອງກັນ ຄວາມສະຫງົບ ແລະ ສະຫະພັນນັກຮົບເກົ່າແຫ່ງຊາດ ໃນໄລຍະແຕ່ກອງປະຊຸມຄັ້ງປະຖົມມະລືກຫາກອງປະຊຸມສະໄໝສາມັນເທື່ອທີ 7 ຂອງ ສພຊ ຊຸດທີ IX ແລະ ທິດທາງແຜນການຮອດທ້າຍປີ 2025 ພາຍໃຕ້ການເປັນປະທານຂອງ ທ່ານ ພົທ ສຸວອນ ເລືອງບຸນມີ ກຳມະການສູນກາງພັກ, ຮອງປະທານສະພາແຫ່ງຊາດ, ມີຕາງໜ້າຄະນະປະສານງານ 4 ພາກ ສ່ວນ, ພ້ອມດ້ວຍຕາງໜ້າຈາກຄະນະເລຂາທິການ ແລະ ສະຖາບັນຄົ້ນຄວ້ານິຕິກຳສະພາແຫ່ງຊາດ, ຫ້ອງການຄະນະກຳມະການ ປກຊ- ປກສ ສູນກາງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ກອງປະຊຸມຈັດຂຶ້ນເພື່ອເປັນການສະຫລຸບຕີລາຄາດ້ານດີ, ດ້ານອ່ອນ ແລະ ຖອດຖອນບົດຮຽນໃນການຈັດຕັ້ງປະຕິບັດວຽກປະສານງານຂອງ 4 ພາກສ່ວນ, ທັງເຮັດໃຫ້ຄະນະປະສານງານຊຸດໃໝ່ຂອງ 2 ກະຊວງ ຮັບຮູ້, ເຂົ້າໃຈ ແລະ ກຳໄດ້ບັນດາວຽກງານປະສານງານຂອງ 4 ພາກສ່ວນໃນໄລຍະຜ່ານມາ ແລະ ກຽມພ້ອມສືບຕໍ່ໃຫ້ການຮ່ວມມືໃນການປະສານງານໃນຕໍ່ໜ້າໃຫ້ໄດ້ຮັບຜົນດີ, ມີປະສິດທິຜົນສູງ ແລະ ຮັບປະກັນຄວາມເປັນເອກະພາບກ່ຽວກັບແຜນການປະສານງານແຕ່ນີ້ຮອດທ້າຍປີ 2025.
ກອງປະຊຸມໄດ້ຮັບຟັງບົດສະຫຼຸບການຈັດຕັ້ງປະຕິບັດວຽກງານປະສານງານໃນໄລຍະແຕ່ກອງປະຊຸມຄັ້ງປະຖົມມະລືກຫາກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ IX ແລະ ທິດທາງແຜນການແຕ່ນີ້ຮອດທ້າຍປີ 2025; ບົດຄຳເຫັນຂອງຄະນະປະສານງານກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ ແລະ ສະຫະພັນນັກຮົບເກົ່າແຫ່ງ ຊາດ ຕໍ່ສະພາບການປະສານງານໃນໄລຍະຜ່ານມາ. ຈາກນັ້ນ, ກໍໄດ້ມີການແລກປ່ຽນຄຳຄິດຄຳເຫັນຢ່າງກົງໄປກົງມາເຊິ່ງເປັນການຢັ້ງຢືນໃຫ້ເຫັນດ້ານດີ-ຜົນງານທີ່ຄະນະປະສານງານ 4 ພາກ ສ່ວນຍາດມາໄດ້ໃນໄລຍະຜ່ານມາ, ທັງສ່ອງແສງໃຫ້ເຫັນບັນຫາດ້ານອ່ອນ-ຂໍ້ຄົງຄ້າງຢ່າງພາວະວິໄສ ແລະ ສະເໜີທິດທາງ, ວິທີການ, ມາດຕະການເພື່ອປັບປຸງບັນຫາທີ່ຍັງຄົງຄ້າງໃຫ້ດີຂຶ້ນໃນຕໍ່ໜ້າ.
ໂອກາດນີ້, ທ່ານ ພົທ ສຸວອນ ເລືອງບຸນມີ ໄດ້ເນັ້ນໃຫ້ເອົາໃຈໃສ່ຄົ້ນຄວ້າ ແລະ ຈັດຕັ້ງຜັນຂະຫຍາຍຂໍ້ຕົກລົງຮ່ວມກັນ ໂດຍຫັນມາເປັນແຜນວຽກລະອຽດ, ມີການປະສານງານກັນຢ່າງກົມກຽວແຕ່ຫົວທີເພື່ອເປັນການປັບປຸງ, ກໍ່ ສ້າງກອງກຳລັງ ແລະ ການຈັດຕັ້ງໃຫ້ປອດໃສ, ເຂັ້ມແຂງ ແລະ ໜັກແໜ້ນ; ເອົາໃຈໃສ່ພົວພັນປະສານງານໃນການຄົ້ນຄວ້າ, ວິເຄາະວິໄຈ ແລະ ແລກປ່ຽນຂໍ້ມູນຂ່າວສານ, ສະ ພາບການພົ້ນເດັ່ນຢ່າງປົກກະຕິ ດ້ວຍຫລາຍວິທີ, ຫລາຍຮູບການຮັບປະກັນຄຸນນະພາບ, ທັນຕາມກຳນົດເວລາເພື່ອຄົ້ນຄວ້າວິທີການຕອບໂຕ້ ແລະ ແກ້ໄຂຢ່າງຖືກຕ້ອງ, ທັນການ; ຮ່ວມກັນເອົາໃຈໃສ່ສ້າງຄວາມເຂັ້ມແຂງໃຫ້ແກ່ການເຄື່ອນໄຫວວຽກງານປະສານງານເພື່ອເປັນຂົວຕໍ່ໂດຍກົງໃນເວລາເຄື່ອນໄຫວວຽກງານຕິດພັນກັບການຍົກລະດັບຄວາມຮູ້, ຄວາມສາມາດ, ຄວາມຊຳນານທາງດ້ານກົດໝາຍ ແລະ ວິຊາສະເພາະເພື່ອຮັບປະກັນປະສິດທິພາບ ແລະ ປະສິດທິຜົນຂອງວຽກງານ; ປັບປຸງກົນໄກປະສານງານ, ແບບແຜນວິທີເຮັດວຽກກໍຄື ແບບແຜນການປະສານງານເຊິ່ງກັນ ແລະ ກັນ, ສ້າງຄວາມເຂົ້າໃຈທີ່ຖືກຕ້ອງຮ່ວມກັນ, ຈຳກັດ ແລະ ອັດຕັນບັນຫາທີ່ເປັນຊ່ອງວ່າງໃຫ້ຫລຸດລົງ; ເລືອກເຟັ້ນເອົາບຸກຄະລາກອນທີ່ຈະມາປະຈຳການປະຕິບັດໜ້າທີ່ຢູ່ສະພາແຫ່ງຊາດ ກໍຄື ສະພາປະຊາຊົນຂັ້ນແຂວງ ຕ້ອງໃຫ້ໄດ້ຜູ້ທີ່ມີຄຸນທາດການເມືອງໜັກແໜ້ນ, ມີແບບແຜນດຳລົງຊີວິດທີ່ປອດໃສ, ມີສະຕິຕໍ່ການຈັດຕັ້ງເຂັ້ມງວດ ແລະ ມີຄວາມຮູ້ຄວາມສາ ມາດໃນລະດັບທີ່ແນ່ນອນ.
