ວັນທີ 25 ກັນຍາ 2024, ກະຊວງປ້ອງກັນຄວາມສະຫງົບ ຈັດກອງປະຊຸມຜ່ານແຜນປ້ອງ ກັນກອງປະຊຸມສຸດຍອດອາຊຽນ ຄັ້ງທີ 44, 45 ພາຍໃຕ້ການເປັນປະທານຂອງ ພົທ ກົງທອງ ພົງວິຈິດ ຮອງລັດຖະມົນຕີກະຊວງ ປກສ, ຜູ້ຊີ້ນຳວຽກງານປ້ອງກັນກອງປະຊຸມສຸດຍອດອາຊຽນ ຄັ້ງທີ 44,45; ມີຮອງລັດຖະມົນຕີ, ຫົວໜ້າຫ້ອງວ່າການກະຊວງ, ກົມໃຫຍ່, 3 ກອງບັນຊາການ, 3 ວິທະຍາຄານປ້ອງກັນຄວາມສະຫງົບ ພ້ອມດ້ວຍຄະນະບັນຊາ-ພະ ນັກງານຫຼັກແຫຼ່ງ ກົມກອງວິຊາສະເພາະອ້ອມຂ້າງກະຊວງ, ປກສ ນະຄອນຫຼວງວຽງຈັນ ແລະ ປກສ ແຂວງ ທົ່ວປະເທດ ເຂົ້າຮ່ວມ.
ພົຈວ ເຄນ ທະວີໄຊ ຮອງຫົວໜ້າຫ້ອງວ່າການກະຊວງ ປກສ ໃຫ້ຮູ້ວ່າ: ຈຸດປະສົງຂອງກອງປະຊຸມຄັ້ງນີ້, ກໍເພື່ອເປັນການກະກຽມຄວາມພ້ອມຮອບດ້ານໃນກຳລັງປ້ອງກັນຄວາມສະ ຫງົບ ແລະ ສຸມໃສ່ປຸກລະດົມຂົນຂວາຍປະຊາຊົນໃຫ້ມີສ່ວນຮ່ວມເຮັດໃຫ້ວຽກງານ ປກຊ-ປກສ ເປັນພັນທະ ແລະ ໜ້າທີ່ຂອງໝົດທຸກຄົນໃນຊາດ; ແນໃສ່ຮັບປະກັນໃຫ້ການກະ ກຽມ ແລະ ດຳເນີນການປ້ອງກັນໃນຂອບເຂດທົ່ວປະເທດ ມີຄວາມສະຫງົບປອດໄພ ແລະ ເປັນລະບຽບຮຽບຮ້ອຍ ເວົ້າລວມ, ເວົ້າສະເພາະ ຮັບປະກັນໃຫ້ແກ່ການປ້ອງກັນກອງປະ ຊຸມສຸດຍອດອາຊຽນ ແລະ ກອງປະຊຸມປິ່ນອ້ອມອື່ນໆ ທີ່ ສປປ ລາວ ໄດ້ຮັບກຽດເປັນເຈົ້າພາບ ໃນປີ 2024 ໃຫ້ມີຄວາມປອດໄພສູງສຸດ ເພື່ອຢັ້ງຢືນເຖິງຄວາມສະຫງົບທາງດ້ານການເມືອງ ແລະ ຄວາມເປັນລະບຽບຮ້ອຍຮ້ອຍທາງສັງຄົມ.
ໃນໂອກາດດຽວກັນນີ້, ພົທ ກົງທອງ ພົງວິຈິດ ຍັງໄດ້ໃຫ້ທິດຊີ້ນຳ; ພ້ອມທັງເນັ້ນໜັກໃຫ້ຄະນະນໍາພາ-ບັນຊາທຸກຂັ້ນໃນກຳລັງ ປກສ ໃຫ້ຖືເອົາວຽກງານປ້ອງກັນຄວາມສະຫງົບໃນແຕ່ລະຄັ້ງເປັນບັ້ນຮົບໜຶ່ງຂອງກໍາລັງປ້ອງກັນຊາດ-ປ້ອງກັນຄວາມສະຫງົບ ແລະ ນໍາເອົາຜົນສໍາເລັດ, ຈຸດດີ, ຈຸດອ່ອນໃນທຸກບັ້ນປ້ອງກັນ ມາເປັນບົດຮຽນໃນການຍົກລະດັບການເມືອງແນວຄິດ-ການຈັດຕັ້ງບັນຊາ ແລະ ວຽກງານວິຊາສະເພາະໃນທົ່ວກໍາລັງປ້ອງກັນຄວາມສະ ຫງົບ ໃຫ້ສູງຂຶ້ນເທື່ອລະກ້າວ. ເພື່ອພ້ອມກັນເຮັດໜ້າທີ່ປ້ອງກັນໃຫ້ແກ່ກອງປະຊຸມສຸດຍອດ ອາຊຽນ ແລະ ກອງປະຊຸມປິ່ນອ້ອມອື່ນໆ ທີ່ ສປປ ລາວ ໄດ້ຮັບກຽດເປັນເຈົ້າພາບ ໃນປີ 2024 ມີຄວາມສະຫງົບ-ປອດໄພ ຮ້ອຍສ່ວນຮ້ອຍ.
