ວິທະຍາຄານຕຳຫຼວດປະຊາຊົນ ກະຊວງປ້ອງກັນຄວາມສະຫງົບ ແຫ່ງ ສປປ ລາວ ກັບ ວິທະຍາຄານຕໍາຫຼວດກໍາປູເຈຍ ກະຊວງພາຍໃນ ແຫ່ງຣາຊະອານາຈັກກໍາປູເຈຍ ໄດ້ພົບປະແລກປ່ຽນບົດຮຽນ ໃນວັນທີ 6 ກຸມພາ 2024 ທີ່ວິທະຍາຄານຕຳຫຼວດປະຊາຊົນ ຝ່າຍລາວນຳໂດຍ ພົນຈັດຕະວາ ປອ ວົງເຊໂດນ ພັນທະແກ້ວ ຫົວໜ້າອຳນວຍການວິທະຍາຄານຕຳ ຫຼວດປະຊາຊົນ, ຝ່າຍກໍາປູເຈຍນໍາໂດຍ ພົນເອກ ເອກ ໂມໂນແສນ ຫົວໜ້າອຳນວຍການວິທະຍາຄານຕຳຫຼວດກໍາປູເຈຍ ໂດຍມີຄະນະທັງ ສອງຝ່າຍ ເຂົ້າຮ່ວມ.
ໂອກາດນີ້, ພົນຈັດຕະວາ ປອ ວົງເຊໂດນ ພັນທະແກ້ວ ກ່າວວ່າ: ວິທະຍາຄານຕໍາຫຼວດປະຊາຊົນລາວ ແມ່ນຂຶ້ນກັບການຊີ້ນໍາໂດຍກົງຂອງທ່ານລັດຖະມົນຕີກະຊວງປ້ອງກັນຄວາມສະຫງົບ ເຊິ່ງມີໜ້າທີ່ກໍ່ສ້າງ, ບຳລຸງຍົກລະດັບດ້ານວິຊາສະເພາະໃຫ້ນາຍ ແລະ ພົນຕຳຫຼວດ ໃນກໍາລັງປ້ອງກັນຄວາມສະຫງົບ ຕາມໂຄງການຫຼັກສູດມະຫາວິທະຍາໄລ ແລະ ເໜືອມະຫາວິທະ ຍາໄລ; ເຊິ່ງມາຮອດປັດຈຸບັນໄດ້ດໍາເນີນການກໍ່ສ້າງມີ 5 ລະບົບ ຄື: ລະບົບປະລິນຍາໂທວິຊາສະເພາະ 2 ປີ, ລະບົບກໍ່ສ້າງປະ ລິນຍາຕີ 4 ປີ, ລະບົບຕໍ່ເນື່ອງປະລິນຍາຕີ 2 ປີ, ລະບົບປະລິນຍາຕີພາສາອັງກິດ 5 ປີ, ລະບົບອະນຸປະລິນຍາຕີພາສາຈີນ 3 ປີ, ພາຍຫຼັງສຳເລັດການຮຽນພາກທິດສະດີແລ້ວກໍລົງຝຶກຫັດຕົວຈິງຢູ່ບັນດາກົມວິຊາສະເພາະ, ບັນດາກອງບັນຊາການປ້ອງ ກັນຄວາມສະຫງົບແຂວງ, ແລ້ວຈັດຕັ້ງການປະເມີນດ້ວຍການຂຽນບົດລາຍງານໂຄງການຈົບຊັ້ນ, ບົດວິທະຍານິພົນ ຫຼື ສອບ ເສັງ ແລະ ຮັບໃບປະກາສະນີຍະບັດ, ນັກສຶກສາສະຖາ ບັນການສຶກສາແຫ່ງນີ້ແມ່ນກຳລັງຕຳຫຼວດອາຊີບທັງໝົດ, ເຊິ່ງໄດ້ຜ່ານການຄັດ ເລືອກມາຈາກບັນດາກົມ-ກອງອ້ອມຂ້າງກະຊວງ ແລະ ກອງບັນຊາການປ້ອງກັນຄວາມສະຫງົບແຂວງທົ່ວປະ ເທດຕາມມາດຖານຂອງກະຊວງປ້ອງກັນຄວາມສະ ຫງົບ, ທັງສອດຄ່ອງກັບລະບຽບການຂອງກະຊວງສຶກສາທິການ ແລະ ກິລາວາງອອກ, ເມື່ອສໍາເລັດການສຶກສາແລ້ວກໍຈະໄດ້ກັບຄືນສູ່ກົມກອງເກົ່າ ເພື່ອສັບຊ້ອນໜ້າທີ່ວິຊາສະເພາະປະຈັນບານຕອບຕ້ານ ແລະ ຮັບມືກັບເລ່ລ່ຽມການເຄື່ອນໄຫວຂອງພວກກໍ່ອາຊະຍາກຳປະເພດຕ່າງໆ, ປະກອບສ່ວນດັດສົມສະຕິເຄົາລົບລະບຽບ, ກົດໝາຍຢ່າງເຂັ້ມງວດ; ເຊິ່ງໄລຍະຜ່ານມາ, ກໍໄດ້ຮັບຄໍາສັນລະເສີນຈາກຜູ້ຄຸ້ມຄອງ ແລະ ຜູ້ຊົມໃຊ້ຜະລິດຕະພັນຂອງວິທະຍາຄານ, ການພົບປະແລກປຽນບົດຮຽນຄັ້ງນີ້ຈະເສີມສ້າງສາຍພົວພັນຮ່ວມມື ໃນການພັດທະນາກໍາລັງຕຳຫຼວດ ໃຫ້ມີຄຸນນະພາບສູງຂຶ້ນ, ສາມາດຮັບມື-ປະເຊີນໜ້າຢ່າງຄ່ອງຕົວກັບທຸກສະຖານະການທີ່ເປັນໄພຂົ່ມ ຂູ່ຄວາມສະຫງົບ ແລະ ຄວາມໝັ້ນຄົງຂອງປະເທດ.
ໂອກາດດຽວກັນນີ້, ພົນເອກ ເອກ ໂມໂນແສນ ກໍໄດ້ສະແດງຄວາມຂອບໃຈເປັນຢ່າງສູງມາຍັງ ພົນຈັດຕະວາ ປອ ວົງເຊໂດນ ພັນທະແກ້ວ ພ້ອມຄະນະ ທີ່ໃຫ້ການຕ້ອນຮັບຢ່າງອົບອຸ່ນ ພ້ອມທັງຍ້ອງຍໍຊົມເຊີຍຕໍ່ຜົນງານພົ້ນເດັ່ນຂອງວິທະຍາຄານໃນການກໍ່ສ້າງນາຍ ແລະ ພົນຕໍາຫຼວດ ໃຫ້ມີຄວາມຮູ້ຄວາມສາມາດໃນຂະແໜງການຕ່າງໆ ເພື່ອປະກອບສ່ວນເຂົ້າໃນການສ້າງສາພັດທະນາປະເທດຊາດ ໃຫ້ຈະເລີນຮຸ່ງເຮືອງ. ຈາກນັ້ນ, ທັງສອງຝ່າຍ ກໍໄດ້ພົບປະແລກປ່ຽນບົດຮຽນເຊິ່ງກັນແລະກັນ ດ້ານວຽກງານການສຶກສາ ໂດຍສະເພາະກໍຄືວຽກງານວິຊາສະເພາະ ເພື່ອຍົກລະດັບຄວາມຮູ້ຄວາມສາມາດ ໃຫ້ແກ່ນາຍ ແລະ ພົນຕຳຫຼວດ, ກົນໄກການປະສານງານຂອງສອງວິທະຍາຄານ ເພື່ອສົ່ງເສີມວຽກງານການສຶກສາ ແລະ ວຽກງານວິຊາສະເພາະຂອງສອງຂະແໜງການໃຫ້ມີຄວາມເຕີບໃຫຍ່ເຂັ້ມແຂງຂຶ້ນໄປເລື້ອຍໆ.
ຂ່າວ: ແກ້ວ