ໃນໂອກາດເຂົ້າຮ່ວມກອງປະຊຸມສະຫຼຸບວຽກງານພະລາທິການ ປ້ອງກັນຄວາມສະ ຫງົບ ປະຈຳປີ 2023 ແລະ ທິດທາງແຜນ ການປີ 2024, ໃນວັນທີ 30 ມັງກອນ ນີ້, ພົທ ກົງທອງ ພົງວິຈິດ ກຳມະການສູນກາງພັກ ຮອງລັດຖະມົນຕີ ກະຊວງ ປກສ ໄດ້ເນັ້ນໃຫ້ຄະນະພັກ-ຄະນະບັນຊາ ກົມໃຫຍ່ພະລາທິການ ປກສ ແຕ່ລະຂັ້ນ ເອົາໃຈໃສ່ ສຶກສາອົບຮົມການເມືອງ-ນໍາພາແນວຄິດ ໃຫ້ນາຍ ແລະ ພົນຕໍາຫຼວດ ໃນຖັນແຖວພະລາທິການ ໃຫ້ກຳແໜ້ນພາລະບົດບາດ, ໜ້າທີ່ ແລະ ຂອບເຂດສິດຂອງການຈັດຕັ້ງພະລາທິການ ແຕ່ລະຂັ້ນ; ສຸມໃສ່ປັບປຸງກົງຈັກການຈັດຕັ້ງຂົງເຂດວຽກງານພະລາທິການ ໃຫ້ຖືກຕ້ອງສອດຄ່ອງຕາມຂໍ້ຕົກລົງ ເລກທີ 3519/ປກສ ວ່າດ້ວຍວຽກງານພະລາທິການ ປ້ອງກັນຄວາມສະຫງົບ, ສຸມໃສ່ຮັບປະກັນພະລາທິການຮອບດ້ານ ໃຫ້ຄົບຖ້ວນ, ທັນເວລາ ແລະ ຫັນໄປສູ່ເພິ່ງຕົນເອງ, ກຸ້ມຕົນເອງເທື່ອລະກ້າວ.
ຄຽງຄູ່ກັນນັ້ນ, ກໍຕ້ອງປັບປຸງ ແລະ ສ້າງນິຕິກໍາຮັບໃຊ້ວຽກງານພະລາທິການໃຫ້ຮັດກຸມ, ສອດຄ່ອງ ແລະ ມີຄວາມເປັນເອກະ ພາບກັນ ໃນຂອບເຂດທົ່ວປະເທດ, ຈັດຕັ້ງປະຕິບັດແຜນງົບປະມານ ແລະ ແຜນການລົງທຶນຂອງລັດ ທີ່ກະຊວງປ້ອງກັນຄວາມສະຫງົບ ໄດ້ຮັບອະນຸມັດຈາກລັດຖະບານ, ເອົາໃຈໃສ່ປະກອບພາຫະນະ, ວັດຖຸອຸປະກອນເຕັກນິກ, ເຄື່ອງອຸປະໂພກ-ບໍລິໂພກ ໃຫ້ພຽງພໍ ແລະ ທັນກັບຄວາມຮຽກຮ້ອງຕ້ອງການ ຂອງໜ້າທີ່ວຽກງານ ແລະ ສຸມໃສ່ຮັບປະກັນສຸຂະພາບນາຍ ແລະ ພົນຕໍາຫຼວດ ໃຫ້ມີສຸຂະພາບເຂັ້ມແຂງ, ແຂງແຮງ ສາມາດຮັບປະກັນໃຫ້ການຈັດຕັ້ງປະຕິບັດວຽກງານວິຊາສະເພາະ ຂອງກຳລັງປ້ອງກັນຄວາມສະຫງົບ ສຳເລັດຕາມລະດັບຄາດໝາຍທີ່ວາງໄວ້.
ໃນກອງປະຊຸມຄັ້ງນີ້, ມີ ພົຕ ທອງສຸກ ຍ່າເອີລາວລີ ຫົວໜ້າກົມໃຫຍ່ພະລາທິການ ປ້ອງກັນຄວາມສະຫງົບ ມີບັນດາຫົວ ໜ້າ, ຮອງຫົວໜ້າ, ຫ້ອງວ່າການກະຊວງ, ກົມໃຫຍ່, ກົມ, ກອງ, ວິທະຍາຄານ, ກອງບັນຊາການ ປກສ ແຂວງ-ນະຄອນ ຫຼວງ, ຕາງໜ້າກົມໃຫຍ່ພະລາທິການກອງທັບ ພ້ອມດ້ວຍພະນັກງານຫຼັກແຫຼ່ງພາຍໃນກົມໃຫຍ່ພະລາທິການປ້ອງກັນຄວາມສະຫງົບ ເຂົ້າຮ່ວມ.
