ວັນທີ 12 ມັງກອນ 2024 ຫ້ອງວ່າການກະຊວງ ປກສ ນໍາໂດຍ ພົຈວ ສຸລິນະ ແກ້ວປະເສີດ ຫົວໜ້າຫ້ອງວ່າການກະຊວງ ປກສ ພ້ອມຄະນະ ເຂົ້າອວຍພອນທ່ານ ພົຕ ສາຍໃຈ ກົມມະສິດ ຫົວໜ້າຫ້ອງວ່າການກອງທັບ ກະຊວງປ້ອງກັນປະເທດ ພ້ອມຄະນະ ເນື່ອງໃນໂອກາດສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ (20 ມັງກອນ 1949-20 ມັງກອນ 2024).
ພົຈວ ສຸລິນະ ແກ້ວປະເສີດ ໄດ້ກ່າວວ່າ: ເນື່ອງໃນໂອກາດສະເຫຼີມສະຫຼອງ ວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ, ເຊິ່ງເປັນວັນທີ່ມີຄວາມໝາຍສໍາຄັນທາງປະຫວັດສາດ ແລະ ສະແດງໃຫ້ເຫັນການເຕີບໃຫຍ່ຂະຫຍາຍຕົວ, ຜົນງານໄຊຊະນະຂອງກອງທັບປະຊາຊົນລາວ ທີ່ຍາດມາໄດ້ໃນໄລຍະຜ່ານມາ. ໃນໂອກາດດັ່ງກ່າວ, ຂໍອວຍພອນໄຊໃຫ້ຄະນະພັກ-ຄະນະນໍາ ຫ້ອງວ່າການກອງທັບ ຕະຫຼອດຮອດນາຍ ແລະ ພົນທະຫານ ຈົ່ງມີສຸຂະພາບແຂງແຮງ ພ້ອມກັນເຮັດສໍາເລັດໜ້າທີ່ອັນມີກຽດຂອງບັນດາທ່ານທີ່ພັກ-ລັດ ແລະ ການຈັດຕັ້ງມອບໝາຍໃຫ້.
ພົຕ ສາຍໃຈ ກົມມະສິດ ໄດ້ກ່າວສະແດງຄວາມຂອບໃຈມາຍັງ ຫ້ອງວ່າການກະຊວງ ປກສ ທີ່ເຫັນໄດ້ຄວາມໝາຍສໍາຄັນຂອງວັນສ້າງຕັ້ງກອງທັບປະຊາຊົນລາວ; ພ້ອມນີ້, ຍັງເປັນການຮັດແໜ້ນຄວາມສາມັກຄີ ລະຫວ່າງ ກອງທັບປະຊາຊົນລາວ ແລະ ກໍາລັງ ປກສ ເວົ້າລວມ, ເວົ້າສະເພາະຫ້ອງວ່າການກອງທັບ ແລະ ຫ້ອງວ່າການກະຊວງ ປກສ ໃຫ້ມີຄວາມແໜ້ນແຟ້ນຂຶ້ນກວ່າເກົ່າ.
