ໃນວັນທີ 21 ທັນວາ 2023, ຄະນະຜູ້ແທນກົມຕໍາຫຼວດຈະລາຈອນ ກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມ ນໍາໂດຍ ທ່ານ ພົນຈັດຕະວາ ຫງຽນ ວັນ ຈຸງ ຫົວໜ້າກົມຕຳຫຼວດຈະລາຈອນ ຫວຽດນາມ ເຂົ້າຢ້ຽມຂໍ່ານັບ ທ່ານ ພົນຕີ ຄໍາກິ່ງ ຜຸຍຫຼ້າມະນີວົງ ຮອງລັດຖະມົນຕີ ຫົວໜ້າກົມໃຫຍ່ຕໍາຫຼວດ ກະຊວງ ປ້ອງກັນຄວາມສະຫງົບ ແຫ່ງ ສປປ ລາວ ເພື່ອລາຍງານຜົນສໍາເລັດ ການແລກປ່ຽນບົດຮຽນວຽກງານວິຊາສະເພາະ ຮ່ວມກັບ ກົມຕໍາຫຼວດຈະລາຈອນ ແຫ່ງ ສປປ ລາວ.
ໃນພິທີ, ທ່ານ ພົນຈັດຕະວາ ຫງຽນ ວັນ ຈຸງ ກໍໄດ້ລາຍງານໃຫ້ທ່ານ ຮອງລັດຖະມົນຕີ ກະຊວງ ປກສ ຮັບຊາບກ່ຽວກັບຜົນສໍາເລັດໃນການຜຶກສາຫາລືແລກປ່ຽນບົດຮຽນວຽກງານວິຊາສະເພາະ ຮ່ວມກັບກົມຕໍາຫຼວດຈະລາຈອນ ແຫ່ງ ສປປ ລາວ; ພ້ອມທັງ ໃຫ້ຄໍາໝັ້ນສັນຍາວ່າ ທັງສອງກົມຕໍາຫຼວດຈະລາຈອນຈະສືບຕໍ່ຊ່ວຍເຫຼືອເຊິ່ງກັນແລະກັນ ເປັນຕົ້ນແມ່ນດ້ານການຈັດຕັ້ງຝຶກອົບຮົມຝຶກອົບຮົມວຽກງານວິຊາສະ ເພາະ, ການສ້າງກົນໄກປະສານງານລະຫວ່າງຕຳຫຼວດຈະລາຈອນ ຫວຽດ ນາມ ແລະ ລາວ ສໍາລັບແຂວງທີ່ມີຊາຍແດນຕິດຈອດ ແລະ ວຽກງານສໍາຄັນອື່ນໆ.
ໂອກາດດັ່ງກ່າວ, ທ່ານ ພົນຕີ ຄໍາກິ່ງ ຜຸຍຫຼ້າມະນີວົງ ກໍໄດ້ກ່າວຕ້ອນຮັບທ່ານຫົວ ໜ້າກົມຕຳຫຼວດຈະລາຈອນຫວຽດນາມ ພ້ອມຄະນະ ແລະ ສະແດງຄວາມຊົມເຊີຍ ທີ່ກົມຕໍາຫຼວດຈະລາຈອນ ຫວຽດນາມ ແລະ ລາວ ໄດ້ແລກປ່ຽນບົດຮຽນວຽກ ງານວິຊາສະເພາະຮ່ວມກັນ ແລະ ຫວັງຢ່າງຍິ່ງວ່າບັນຫາທີ່ພວກສະຫາຍຫາລືກັນຈະເປັນປະ ໂຫຍດທີ່ດີໃຫ້ການປະຕິບັດວງຽກງານວິຊາສະເພາະຂອງກົມຕໍາຫຼວດຈະລາຈອນຂອງທັງສອງປະເທດ ແລະ ຫວັງຢ່າງຍິງວ່າກົມຕໍາຫຼວດຈະລາຈອນ ແຫ່ງ ສສ ຫວຽດນາມ ຈະສືບຕໍ່ຈັດຕັ້ງປະຕິບັດຕາມຂໍ້ຕົກລົງຮ່ວມມື ວຽກງານຕໍາຫຼວດ ຂອງສອງກະຊວງ ເວົ້າລວມ, ເວົ້າສະເພາະ ກໍຄືຂໍ້ຕົກລົງລະຫວ່າງກົມຕໍາຫຼວດຈະລາຈອນ ກົມໃຫຍ່ຕໍາຫຼວດ ກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ ກົມຕໍາຫຼວດຈະລາຈອນ ກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມ ທີ່ໄດ້ລົງນາມຮ່ວມກັນ ແລະ ສືບຕໍ່ໃຫ້ການຊ່ວຍເຫຼືອເຊິ່ງກັນແລະກັນ ເພື່ອເຮັດໃຫ້ການປະຕິບັດໜ້າທີ່ວຽກງານວິຊາສະເພາະຂອງທັງສອງກົມມີຜົນສໍາເລັດ ແລະ ເຕີບໃຫຍ່ຂະຫຍາຍຕົວຂຶ້ນໄປເລື້ອຍໆ.
ຂ່າວ: ຈັນສະໝອນ
