ທ້າຍອາທິດຜ່ານມານີ້, ພົຕ ວັນທອງ ກອງມະນີ ກຳມະການສູນກາງພັກ ເລຂາພັກແຂວງ ເຈົ້າແຂວງອັດຕະປື ໂອ້ລົມຕໍ່ນາຍຕຳຫຼວດຫຼັກແຫຼ່ງກອງບັນຊາການ ປກສ ແຂວງ, ໂດຍການຕ້ອນຮັບຂອງ ພົຈວ ສີເວີນ ແກ້ວສີວົງສາ ຫົວໜ້າກອງບັນຊາ ການ ປກສ ແຂວງ, ມີຄະນະພັກ-ຄະນະກອງບັນຊາການ, ຄະນະຫ້ອງ, ກອງພັນເຄື່ອນທີ່, ຄ້າຍຄຸມຂັງ-ດັດສ້າງ, ພ້ອມດ້ວຍກອງບັນຊາການ ປກສ 5 ຕົວເມືອງ ແລະ ນາຍຕຳຫຼວດຫຼັກແຫຼ່ງ ເຂົ້າຮ່ວມ.
ໃນພີທີ, ທ່ານເຈົ້າແຂວງອັດຕະປື ແຂວງໄດ້ຮັບຟັງການລາຍງານຜົນການຈັດຕັ້ງປະຕິບັດວຽກງານຂອງແຕ່ລະເຫຼົ່າວິຊາສະ ເພາະ ຈາກທ່ານຫົວໜ້າກອງ ບັນຊາການ ປກສ ແຂວງ ເປັນຕົ້ນ: ວຽກງານການເຊື່ອມຊຶມມະຕິຂອງພັກ, ຄຳສັ່ງ ແລະ ເອກະສານອື່ນໆຂອງລັດ ກໍຄືຂອງກະຊວງ ປກສ, ການດຳເນີນຊີວິດການ ເມືອງພາຍໃນພັກ, ການກະກຽມການດຳເນີນກອງປະຊຸມສາມຂັ້ນຂອງພັກ, ວຽກງານກໍ່ສ້າງພັກ-ກໍ່ສ້າງພະນັກງານພາຍໃນກຳລັງປ້ອງກັນຄວາມສະຫງົບ ໃຫ້ປອດໃສ ເຂັ້ມແຂງ ໜັກແໜ້ນ ເພື່ອເຮັດໃຫ້ວຽກງານປ້ອງກັນຄວາມສະຫງົບມີຄວາມກ້າວໜ້າ, ຕັ້ງໜ້າຜັນຂະຫຍາຍວຽກງານປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ, ຫັນເອົາພະນັກງານລົງກໍ່ສ້າງຮາກຖານ ເພື່ອເຮັດໃຫ້ຮາກຖານມີຄວາມເຂັ້ມແຂງ ເພື່ອຮັບປະກັນເຮັດໃຫ້ແຂວງອັດຕະປື ມີສະຖຽນລະພາບທາງດ້ານການເມືອງ ສັງ ຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍໂດຍພື້ນຖານ, ວຽກງານປະກົດການຫຍໍ້ທໍ້ທີ່ເກີດຂຶ້ນໃນສັງຄົມ, ການສະກັດກັ້ນຢາເສບຕິດ, ການລັກ ອບຄ້າ-ຂາຍເຖື່ອນ, ບັນຫາອຸບັດຕິເຫດຕາມທ້ອງຖະໜົນຫຼວງ, ການກວດກາຄົນເຂົ້າ-ອອກເມືອງຢູ່ດ່ານ ແລະ ການຄຸ້ມຄອງຄົນຕ່າງປະເທດ.
ໂອກາດດັ່ງກ່າວ, ທ່ານເຈົ້າແຂວງອັດຕະປື ກໍໄດ້ສະແດງຄວາມຍ້ອງຍໍຊົມ ເຊີຍມາຍັງຄະນະພັກ-ຄະນະບັນຊາ, ນາຍ ແລະ ພົນຕຳຫຼວດທຸກເຫຼົ່າວິຊາສະເພາະ ທີ່ໄດ້ເສຍສະ ລະເຫື່ອແຮງ ແລະ ສະຕິປັນຍາເຂົ້າໃນການປະຕິບັດໜ້າທີ່ວິຊາສະເພາະ, ສະກັດກັ້ນ ແລະ ຕ້ານປະກົດການຫຍໍ້ທໍ້ໃນສັງຄົມໃຫ້ມີຄວາມສະຫງົບໂດຍພື້ນຖານ ເປັນຕົ້ນແມ່ນໃນໄລຍະການຈັດຕັ້ງປະຕິບັດເນື້ອໃນວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ.
ນອກນັ້ນ, ທ່ານຍັງໄດ້ເນັ້ນໃຫ້ຄະນະພັກ-ຄະນະກອງບັນຊາການ ປກສ ແຂວງ ກໍຄືນາຍ ແລະ ພົນຕຳຫຼວດ ຈົ່ງສືບຕໍ່ເປັນເຈົ້າການໃນການຈັດຕັ້ງປະຕິບັດໜ້າທີ່ວິຊາສະເພາະໃຫ້ໄດ້ຮັບຜົນດີຂຶ້ນເລື້ອຍໆ. ພ້ອມກັນນີ້, ໃຫ້ສືບຕໍ່ສືກສາອົບຮົມການເມືອງນຳພາແນວຄິດໃຫ້ນາຍ ແລະ ພົນຕຳຫຼວດພາຍໃນກົມກອງໃຫ້ມີຄຸນທາດການເມືອງໜັກແໜ້ນ, ສືບຕໍ່ແກ້ໄຂປາກົດ ການຫຍໍ້ທໍ້ທີ່ເກີດຂຶ້ນພາຍໃນກຳລັງ ປກສ ເພື່ອໃຫ້ກາຍເປັນກຳລັງທີ່ປອດໃສຂາວສະອາດສົມກັບເປັນທີ່ໄວ້ວາງໃຈຈາກສັງ ຄົມ, ສືບຕໍ່ປົກປັກຮັກສາຄວາມເປັນລະບຽບຮຽບຮ້ອຍທາງດ້ານສັງຄົມ, ໄດ້ແກ້ໄຂປາກົດ ການຫຍໍ້ທໍ້ທີ່ເກີດຂຶ້ນທາງສັງຄົມໃຫ້ວ່ອງໄວ ແລະ ທັນການໂດຍອີງໃສ່ມະຕິ, ຄຳສັ່ງ ແລະ ນິຕິກຳອື່ນໆຂອງຂັ້ນເທິງທີ່ກ່ຽວຂ້ອງ.
