ກອງປະຊຸມປະຈຳປີ ການຈັດຕັ້ງພາຄີຕ້ານການສໍ້ລາດບັງຫຼວງອາຊຽນ ຄັ້ງທີ 19 (ອາຊຽນ-ແພັກ ASEAN-PAC) ພາຍໃຕ້ຫົວຂໍ້: “ສືບຕໍ່ການຮ່ວມມືຍົກສູງຂີດຄວາມສາມາດຂອງອົງການ ແລະ ການຮ່ວມມືໃນການຕ້ານການສໍ້ລາດບັງຫຼວງ ລະຫວ່າງ ອາຊຽນ-ແພັກ ເພື່ອປະກອບສ່ວນເຂົ້າໃນການບັນລຸເປົ້າໝາຍການພັດທະນາແບບຍືນຍົງ ໃນປີ 2030” ໄດ້ຈັດຂຶ້ນໃນລະຫວ່າງວັນທີ 29-30 ພະຈິກ 2023 ທີ່ນະຄອນຫຼວງວຽງຈັນ ສປປ ລາວ.
ເຂົ້າຮ່ວມໂດຍ ທ່ານ ປອ ຄຳພັນ ພົມມະທັດ ປະທານອົງການກວດກາແຫ່ງລັດ ແຫ່ງ ສປປ ລາວ, ທ່ານ H.E. YONN SINAT ຮອງປະທານອົງການຕ້ານການສໍ້ລາດບັງຫຼວງ ຣາຊະອານາຈັກ ກຳປູເຈຍ, ມີບັນດາຄະນະຜູ້ແທນຈາກອົງການຕ້ານການສໍ້ລາດບັງຫຼວງຂອງ 10 ປະເທດອາຊຽນ ຫຼື ອາຊຽນແພັກ, ຄະນະຜູ້ແທນຈາກອົງການ UNODC ແລະ ແຂກຮັບເຊີນ ເຂົ້າຮ່ວມ.
ໃນກອງປະຊຸມ ໄດ້ມີການມອບໜ້າທີ່ເຈົ້າພາບກອງປະຊຸມອາຊຽນ-ແພັກ ໂດຍ ທ່ານ H.E. YONN SINAT ຮອງປະທານອົງການຕ້ານການສໍ້ລາດບັງຫຼວງ ຣາຊະອານາຈັກ ກຳປູເຈຍ ກ່າວຮັບໜ້າທີ່ເປັນປະທານອາຊຽນ-ແພັກ ແລະ ກ່າວເປີດພິທີໂດຍ ທ່ານ ປອ ຄຳພັນ ພົມມະທັດ ປະທານອົງການກວດກາແຫ່ງລັດ ສປປ ລາວ; ເຊິ່ງທ່ານໄດ້ກ່າວສະແດງຄວາມຕ້ອນຮັບບັນດາທ່ານຫົວໜ້າ ພ້ອມດ້ວຍຄະນະຜູ້ແທນອາຊຽນ-ແພັກ ແລະ ບັນດາແຂກທີ່ມີກຽດທີ່ໄດ້ເຂົ້າຮ່ວມກອງປະຊຸມໃນຄັ້ງນີ້ ອົງການກວດກາແຫ່ງລັດ ສປປ ລາວ ຮູ້ສຶກພາກພູມໃຈ ທີ່ໄດ້ຮັບໜ້າທີ່ເປັນເຈົ້າພາບຈັດກອງປະຊຸມປະຈຳປີ ອາຊຽນ-ແພັກ (ASEAN-PAC) ຄັ້ງທີ 19, ເຊິ່ງຈະດໍາເນີນແຕ່ວັນທີ 29 ຫາວັນທີ 30 ພະຈິກ 2023 ແລະ ໄດ້ຮັບກຽດເປັນປະທານກອງປະຊຸມອາຊຽນ-ແພັກ ເປັນຄັ້ງທີ 2.
ຈຸດປະສົງຂອງກອງປະຊຸມໃນຄັ້ງນີ້ ແມ່ນເພື່ອມຸ່ງເນັ້ນການຜັນຂະຫຍາຍ ແລະ ຈັດຕັ້ງປະຕິບັດບົດບັນທຶກການຮ່ວມມືຂອງອົງການຕ້ານການສໍ້ລາດບັງຫຼວງ ຂົງເຂດອາຊີຕາເວັນອອກສຽງໃຕ້ (ອາຊຽນ-ແພັກ) ໂດຍສະແດງຜ່ານຫົວຂໍ້ທີ່ສໍາຄັນ ຄື: ສືບຕໍ່ການຮ່ວມມືຍົກສູງຂີດຄວາມສາມາດຂອງອົງການ ແລະ ການຮ່ວມມືໃນການຕ້ານການສໍ້ລາດບັງຫຼວງ ລະຫວ່າງ ອາຊຽນ-ແພັກ ເພື່ອປະກອບສ່ວນເຂົ້າໃນການບັນລຸເປົ້າໝາຍການພັດທະນາແບບຍືນຍົງ ໃນປີ 2030.
ຫຼັງຈາກນັ້ນ, ໃນກອງປະຊຸມ ຍັງໄດ້ຮັບຟັງສະເໜີບົດສູນທອນພົດຂອງ ພະນະທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ, ການລາຍງານຂອງປະເທດສະມາຊິກ ແລະ ສົນທະນາ, ແລກປ່ຽນບົດຮຽນ, ປະສົບການກ່ຽວກັບການຕ້ານການສໍ້ລາດບັງຫຼວງຂອງແຕ່ລະປະເທດ, ຮ່ວມມືກັນສ້າງຊ່ອງທາງ, ວິທີການ, ມາດຕະການຕ່າງໆໃນການສະກັດກັ້ນ ແລະ ຕ້ານການສໍ້ລາດບັງຫຼວງທຸກຮູບແບບ ໃຫ້ເຂັ້ມແຂງຂຶ້ນ, ຮັບຟັງການນຳສະເໜີບົດຂອງ ຜູ້ຕາງໜ້າ ອົງການສະຫະປະຊາຊາດ ເພື່ອຕ້ານຢາເສບຕິດ ແລະ ອາຊະຍາກຳ UNODC.
ນອກນີ້, ຍັງຈະໄດ້ເປັນສັກຂີພະຍານການເຊັນບົດບັນທຶກການຮ່ວມມືສອງຝ່າຍ ລະຫວ່າງ ອົງການກວດກາແຫ່ງລັດ ສປປ ລາວ ກັບ ຄະນະກຳມະການລົບລ້າງການສໍ້ລາດບັງຫຼວງ ອິນໂດເນເຊຍ ແລະ ອົງການຕ້ານການສໍ້ລາດບັງຫຼວງ ສປປ ລາວ ກັບ ຄະນະກຳມະການຕ້ານການສໍ້ລາດບັງຫຼວງ ສາທາລະນະລັດ ສະຫະພາບ ມຽນມາ ອີກດ້ວຍ.
