ກອງບັນຊາການປ້ອງກັນເຄື່ອນທີ່ ແລະ ວິທະຍາຄານການເມືອງປ້ອງກັນຄວາມສະຫງົບ ໄດ້ຈັດພິທີປະກາດເລື່ອນຊັ້ນໃຫ້ນາຍຕຳຫຼວດຜູ້ທີ່ມີຜົນງານດີເດັ່ນ ແລະ ຄົບມາດຖານເງື່ອນໄຂໃນການເລື່ອນຊັ້ນ ໃນວັນທີ 17 ພະຈິກ 2023, ເປັນປະທານ ແລະ ປະດັບຊັ້ນ ໂດຍ ພົຈວ ພູນສະຫວັນ ພັນທະເສນາ ຫົວໜ້າກອງບັນຊາການປ້ອງກັນເຄື່ອນທີ່, ພັອ ຊາຍຄອງ ເພັດຊະວົງ ຫົວໜ້າອຳນວຍການວິທະຍາຄານການເມືອງປ້ອງກັນຄວາມສະຫງົບ, ມີບັນດາຄະນະກອງບັນຊາການ, ອຳນວຍການ, ພ້ອມດ້ວຍຫົວໜ້າຫ້ອງ-ຮອງຫ້ອງ, ຄະນະວິຊາ ແລະ ຄູ-ອາຈານ ເຂົ້າຮ່ວມ.
ໃນພິທີ, ຄະນະຮັບຜິດຊອບໄດ້ຜ່ານຂໍ້ຕົກລົງຂອງລັດຖະມົນຕີກະຊວງປ້ອງກັນຄວາມສະຫງົບ ວ່າດ້ວຍການເລື່ອນຊັ້ນໃຫ້ນາຍຕໍາຫຼວດກອງບັນຊາການປ້ອງກັນເຄື່ອນທີ່; ໃນນີ້, ເລື່ອນຊັ້ນ ພັນຕີ ຂຶ້ນຊັ້ນ ພັນໂທ ຈໍານວນ 7 ສະຫາຍ ຍິງ 1 ສະຫາຍ, ຮ້ອຍ ເອກ ຂຶ້ນຊັ້ນ ພັນຕີ ຈໍານວນ 15 ສະຫາຍ ແລະ ຮ້ອຍໂທ ຂຶ້ນຊັ້ນ ຮ້ອຍເອກ ຈໍານວນ 5 ສະຫາຍ ຍິງ 1 ສະຫາຍ; ເລື່ອນຊັ້ນໃຫ້ນາຍຕຳຫຼວດ ວິທະຍາຄານການເມືອງປ້ອງ ກັນຄວາມ ສະຫງົບ; ໃນນີ້, ເລື່ອນຊັ້ນ ພັຕ ຂຶ້ນ ພັນໂທ 7 ສະຫາຍ ຍິງ 2 ສະຫາຍ, ເລື່ອນຊັ້ນ ຮ້ອຍເອກ ຂຶ້ນ ພັນຕີ 4 ສະຫາຍ ຍິງ 1 ສະຫາຍ, ຮ້ອຍໂທ ຂຶ້ນຊັ້ນ ຮ້ອຍ ເອກ 4 ສະຫາຍ ຍິງ 1 ສະ ຫາຍ.
ໂອກາດດັ່ງກ່າວ, ຄະນະປະທານ ກໍໄດ້ໂອ້ລົມເນັ້ນໃຫ້ຜູ້ໄດ້ຮັບການເລື່ອນຊັ້ນ ເພີ່ມທະວີຄວາມຮັບຜິດຊອບຕໍ່ໜ້າທີ່ການເມືອງຂອງຕົນໃຫ້ສູງຂຶ້ນ, ສຸມທຸກກຳລັງເຫື່ອແຮງ ແລະ ສະຕິປັນຍາຂອງຕົນ ປະກອບສ່ວນເຂົ້າໃນວຽກງານວິຊາສະເພາະທີ່ການຈັດຕັ້ງມອບໝາຍໃຫ້, ເອົາໃຈໃສ່ຊອກຮູ້ຮໍ່າຮຽນ ເພື່ອເຮັດໃຫ້ຕົນເອງມີຄວາມຮູ້-ຄວາມສາມາດປະກອບສ່ວນເຂົ້າໃນວຽກງານປ້ອງກັນຄວາມສະຫງົບໃຫ້ເຕີບໃຫຍ່ເຂັ້ມແຂງ.
ຂ່າວ: ຄຳໂຖ
