ພິທີມອບ-ຮັບ ແລະ ເປີດນໍາໃຊ້ສູນບໍາບັດ, ຟື້ນຟູສຸຂະພາບຜູ້ຕິດຢາເສບຕິດ ຈັດຂຶ້ນໃນວັນທີ 17 ພະຈິກ 2023, ທີ່ບ້ານທົ່ງຫວາຍ ເມືອງທ່າແຕງ ແຂວງເຊກອງ, ໂດຍມີ ພົອ ວິໄລ ຫຼ້າຄໍາຟອງ ຮອງນາຍົກລັດຖະມົນຕີ ລັດຖະມົນຕີ ກະຊວງ ປກສ, ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ, ມີຂະແໜງການກ່ຽວຂ້ອງຈາກກະຊວງ ປກສ, ພ້ອມດ້ວຍພະແນກການ, ຫ້ອງ ການ-ອົງການທຽບ ເທົ່າອ້ອມຂ້າງແຂວງ ແລະ ເມືອງທ່າແຕງ ເຂົ້າຮ່ວມ.
ພັອ ຄໍາບານ ພົມມະນີວົງ ຫົວໜ້າກອງບັນຊາການ ປກສ ແຂວງເຊກອງ ໄດ້ລາຍງານວ່າ: ໂຄງການກໍ່ສ້າງ ແລະ ສ້ອມແປງສູນບໍາບັດ-ຟື້ນຟູສຸຂະພາບຜູ້ຕິດຢາເສບຕິດແມ່ນໂຄງການໜຶ່ງທີ່ມີຄວາມສໍາຄັນ, ຈໍາເປັນ ແລະ ຕິດພັນກັບການຈັດຕັ້ງປະຕິ ບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ເພື່ອເປັນບ່ອນບໍາບັດ ແລະ ຟື້ນຟູສຸຂະພາບໃຫ້ແກ່ລູກ-ຫຼານຂອງພໍ່-ແມ່ປະຊາຊົນ ຜູ້ຕິດຢາເສບຕິດທຸກປະເພດ, ທັງເປັນການກອບກູ້ເອົາຊີວິດອັນມືດມົນໄປສູ່ຊີວິດ ອັນແຈ່ມໃສ ແລະ ມີອະນາຄົດທີ່ດີ, ມີອາຊີບການທໍາມະຫາກິນທີ່ໝັ້ນຄົງ ເພື່ອໃຫ້ກາຍເປັນຊາວໜຸ່ມ-ໄວໜຸ່ມທີ່ມີອະນາຄົດສົດໃສຂອງພໍ່-ແມ່ ກໍຄື ປະເທດຊາດຕະຫຼອດໄປ.
ສູນບໍາບັດ-ຟື້ນຟູສຸຂະພາບຜູ້ຕິດຢາເສບຕິດຕັ້ງຢູ່ບ້ານທົ່ງຫວາຍ ເມືອງທ່າແຕງ ແຂວງເຊກອງ ຫ່າງຈາກເທສະບານແຂວງ ປະມານ 68 ກິໂລແມັດ; ການກໍ່ສ້າງສູນດັ່ງກ່າວ ແມ່ນໄດ້ຮັບການສະໜັບສະໜູນງົບປະມານຈາກການນໍາແຂວງ ແລະ ກະ ຊວງ ປກສ, ເລີ່ມລົງມືກໍ່ສ້າງ ໃນວັນທີ 20 ກຸມພາ 2023 ເປັນຕົ້ນມາ, ໂດຍນໍາໃຊ້ ເນື້ອທີ່ດິນທັງໝົດ 21.363 ຕາແມັດ ປະ ກອບມີ 7 ຕຶກອາຄານ, ສາມາດຮອງຮັບ ແລະ ບັນຈຸຜູ້ຕິດຢາເສບຕິດໄດ້ 500 ຄົນ.
ໃນໂອກາດນີ້, ທ່ານ ເຫຼັກໄຫຼ ສີວິໄລ ໄດ້ມີຄໍາເຫັນວ່າ: ບັນຫາຢາເສບຕິດເປັນໄພຄຸກຄາມຕໍ່ຄວາມໝັ້ນຄົງທາງດ້ານການເມືອງ, ຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມ ກໍຄື ການພັດທະນາເສດຖະກິດ-ສັງຄົມ ແລະ ເປັນພິດເປັນໄພຕໍ່ສຸຂະພາບ ກໍຄື ອະນາຄົດຂອງຜູ້ຕິດຢາເສບຕິດເອງ; ສໍາລັບແຂວງເຊກອງ ໃນໄລຍະຜ່ານມາ, ກໍໄດ້ຮັບຜົນກະ ທົບ ແລະ ມີຜູ້ຕິດຢາເສບຕິດເປັນຈໍານວນຫຼາຍສົມ ຄວນ ໂດຍສະເພາະແມ່ນໄວໜຸ່ມ-ຍິງສາວ ພາໃຫ້ເກີດມີປະກົດການຫຍໍ້ທໍ້ຕາມມາ ເປັນຕົ້ນ, ປຸ້ນຈີ້, ກໍ່ອາລະວາດ-ອາຊະຍາກໍາ, ຂີ້ລັກງັດແງະ ແລະອື່ນໆ.
ສະນັ້ນ, ເພື່ອແກ້ໄຂບັນຫາດັ່ງກ່າວໃຫ້ຫຼຸດໜ້ອຍຖອຍລົງ, ຄະນະພັກ-ອົງການປົກ ຄອງແຂວງ ຈຶ່ງໄດ້ຄົ້ນຄວ້າຕົກລົງມອບອາຄານພັກເຊົາຂອງເຂື່ອນໄຟຟ້າຫ້ວຍນໍ້າພັນຕອນເທິງໃຫ້ ກອງບັນຊາການ ປກສ ແຂວງ ເພື່ອກໍ່ສ້າງ ແລະ ສ້ອມແປງເປັນສູນບໍາບັດ-ຟື້ນຟູປີ່ນປົວ ແລະ ຮັກສາສຸຂະພາບຂອງຜູ້ຕິດຢາເສບຕິດ ອັນເປັນການປະກອບສ່ວນສໍາຄັນ ເພື່ອສືບຕໍ່ຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂ, ຕ້ານ ແລະ ສະກັດກັ້ນບັນຫາຢາເສບຕິດໃຫ້ຫຼຸດໜ້ອຍຖອຍລົງ.
