ວັນທີ 3 ພະຈິກ 2023, ທີ່ກອງບັນຊາການ ປກສ ແຂວງບໍລິຄໍາໄຊ ໄດ້ຈັດກອງປະຊຸມຕິດຕາມກວດກາຊຸກຍູ້ວຽກງານປ້ອງກັນກໍາລັງ, ໂດຍມີ ພົຈວ ແອນ ອູ່ນອານົງນຸດ ຮອງຫົວໜ້າກົມໃຫຍ່ການເມືອງ ກະຊວງ ປກສ, ມີ ພັອ ກົງຈັນ ໄຊປັນຍາ ຫົວ ໜ້າກອງບັນຊາການ ປກສ ແຂວງບໍລິຄຳໄຊ ພ້ອມດ້ວຍຄະນະພັກ ຄະນະກອງບັນຊາ ການ ປກສ ແຂວງ, ບັນດາຫ້ອງ, ກອງພັນ, ຄ້າຍຄຸມຂັງ-ດັດສ້າງ, ໂຮງຮຽນ ປກສ ຊັ້ນຕົ້ນເລກ 4, ກອງບັນຊາການ ປກສ 7 ຕົວເມືອງ ພ້ອມດ້ວຍນາຍຕຳຫຼວດ ເຂົ້າຮ່ວມ.
ໃນປະຊຸມ, ພັອ ຈັນທາ ວັນນະແສງ ຫົວໜ້າກົມປ້ອງກັນກຳລັງ ກະຊວງ ປກສ ໄດ້ຜ່ານບັນດາເອກະສານກ່ຽວກັບວຽກງານການຕ້ານ, ສະກັດກັ້ນ ແລະ ແກ້ໄຂບັນດາປະກົດການຫຍໍ້ທໍ້ທີ່ເກີດຂຶ້ນຢູ່ໃນກຳລັງປ້ອງກັນຄວາມສະຫງົບຄວາມຈໍາ ເປັນໃນການກໍ່ສ້າງ ແລະ ປັບປຸງກໍາລັງປ້ອງກັນຄວາມສະຫງົບປະຊາຊົນ, ສະພາບການເຄື່ອນໄຫວໜ້າທີ່ວຽກງານວິຊາສະເພາະຂອງກຳລັງປ້ອງກັນຄວາມສະຫງົບໃນໄລຍະຜ່ານມາ; ບັນດາປະກົດການຫຍໍ້ທໍ້ທີ່ເກີດຂຶ້ນຢູ່ໃນກຳລັງປ້ອງກັນຄວາມສະຫງົບ ທີ່ຈະຕ້ອງສຸມໃສ່ໃນການຕ້ານ, ສະກັດກັ້ນ ແລະ ແກ້ໄຂ້ໃຫ້ທັນການທີ່ ຕິດພັນກັບຂົງເຂດວຽກງານການເມືອງ ນຳພາ-ແນວຄິດ, ຂົງເຂດປ້ອງກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມ, ຂົງເຂດປ້ອງກັນຄວາມສະຫງົບທາງດ້ານການເມືອງ, ຂົງເຂດວຽກງານທີ່ພົວພັນກັບເສດຖະກິດ, ຂົງເຂດວຽກງານເສນາທິການ, ຂົງເຂດການເຄື່ອນໄຫວວຽກງານຕິດຕາມ-ກວດກາ ແລະ ປ້ອງກັນກຳລັງ; ບັນດາທິດທາງ ແລະ ມາດຕະການໃນການແກ້ໄຂບັນຫາປະກົດການຫຍໍ້ທໍ້ໃນກຳ ລັງປ້ອງ ກັນຄວາມສະຫງົບ, ມາດຕະການໃນການຕ້ານ ແລະ ສະກັດກັ້ນບັນຫາປະກົດການຫຍໍ້ທໍ້ໃນກຳລັງປ້ອງກັນຄວາມສະຫງົບ; ແນໃສ່ເພື່ອສ້າງຄວາມເປັນເອກະພາບ ໃນດ້ານການຈັດຕັ້ງປະຕິບັດທົ່ວກຳລັງປ້ອງກັນຄວາມສະຫງົບ ເພື່ອຕີຖອຍບັນດາປະ ກົດການຫຍໍ້ທໍ້ທີ່ເກີດຂຶ້ນໃນກໍາລັງປ້ອງກັນຄວາມສະຫງົບປະຊາຊົນ ຕິດພັນກັບການແກ້ໄຂປະກົດການຫຍໍ້ທໍ້ໃນສັງຄົມ ແລະ ແນໃສ່ປັບປຸງກຳລັງປ້ອງກັນຄວາມສະຫງົບ ໃນທົ່ວປະເທດໃຫ້ມີຄວາມໜັກແໜ້ນ, ເຂັ້ມແຂງໃນທຸກດ້ານ, ກາຍເປັນກຳລັງທີ່ມີຄວາມຈົງຮັກພັກດີຕໍ່ພັກ-ລັດ, ຕໍ່ປະເທດຊາດ, ຕໍ່ປະຊາຊົນບັນດາເຜົ່າ ແລະ ສາມາດເຮັດຫຼ້ອນໜ້າທີ່ການເມືອງທີ່ພັກ-ລັດ ແລະ ປະຊາຊົນມອບໝາຍໃຫ້.
ໃນໂອກາດດັ່ງກ່າວ, ພົຈວ ແອນ ອູ່ນອານົງນຸດ ຍັງໄດ້ເນັ້ນໜັກໃຫ້ທົ່ວກຳລັງ ປກສ ແຂວງບໍລິຄຳໄຊ ໃຫ້ເອົາໃຈໃສ່ວຽກງານສຶກສາອົບຮົມການເມືອງ-ແນວຄິດ ໃຫ້ເປັນປົກກະຕິ, ຕິດຕາມ, ກວດກາ, ຊຸກຍູ້ວຽກງານປ້ອງກັນກຳລັງຢ່າງຕໍ່ເນື່ອງ, ຄຸ້ມ ຄອງພະນັກງານຕອບຕ້ານທຸກໆປະກົດການຫຍໍ້ທໍ້ໃນກຳລັງຢ່າງ ເຂັ້ມງວດ, ແນ່ໃສ່ເຮັດໃຫ້ກຳລັງປ້ອງກັນຄວາມສະຫງົບ ແຂວງບໍລິຄໍາໄຊມີຄວາມ ປອດໄສ ເຂັ້ມແຂງ ໜັກແໜ້ນ. ພ້ອມນັ້ນ, ກໍຕ້ອງເສີມການຮຽນຮູ້, ຮັກສາຈັນຍາບັນ, ຈັນຍາທຳ, ປະຕິບັດລະບຽບ, ກົດໝາຍຂອງກຳລັງປ້ອງກັນຄວາມສະຫງົບວາງ ອອກຢ່າງເຂັ້ມງວດ.
