ກອງປະຊຸມຮ່ວມມືສະກັດກັ້ນ ແລະ ຕ້ານອາຊະຍາກຳລະຫວ່າງກຳລັງຕຳຫຼວດ ກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມ ແລະ ກຳລັງຕຳຫຼວດ ກະຊວງປ້ອງກັນຄວາມສະຫງົບ ແຫ່ງ ສປປ ລາວ ຄັ້ງທີ XIII ໄດ້ຈັດຂຶ້ນໃນລະຫວ່າງວັນທີ 13-16 ຕຸລາ 2024 ທີ່ນະຄອນຫຼວງຮ່າໂນ້ຍ ສສ ຫວຽດນາມ; ຄະນະຜູ້ແທນກໍາລັງຕຳຫຼວດຫວຽດ ນາມ ນໍາໂດຍສະຫາຍ ພົນຕີ ຫງວຽນ ວັນ ລອງ ຮອງລັດຖະມົນຕີ ກະຊວງປ້ອງກັນຄວາມສະຫງົບ ຫວຽດນາມ ເປັນຫົວໜ້າຄະນະ; ຄະນະຜູ້ແທນກໍາລັງຕຳຫຼວດລາວ ນໍາໂດຍສະ ຫາຍ ພົນຕີ ຄໍາກິ່ງ ຜຸຍຫຼ້າມະນີວົງ ຮອງລັດຖະມົນຕີ, ຫົວໜ້າກົມໃຫຍ່ຕໍາຫຼວດ ກະຊວງປ້ອງກັນຄວາມສະຫງົບ ລາວ ເປັນຫົວໜ້າຄະນະ; ພ້ອມດ້ວຍຄະນະຜູ້ແທນຂອງບັນດາກົມກອງ ແລະ ກອງບັນຊາການປ້ອງກັນຄວາມສະຫງົບ ແຂວງ ທີ່ມີຊາຍແດນຕິດຈອດຂອງລະຫວ່າງກໍາລັງຕໍາຫຼວດສອງປະເທດເຂົ້າຮ່ວມ.
ກອງປະຊຸມເຫັນດີເປັນເອກະພາບສືບຕໍ່ເສີມຂະຫຍາຍມູນເຊື້ອໄມຕີຈິດມິດຕະພາບແບບພິເສດ, ການຮ່ວມມືຮອບດ້ານ ແລະ ຄວາມເຂົ້າໃຈເຊິ່ງກັນແລະກັນ ບົນພື້ນຖານສະຫາຍອ້າຍນ້ອງລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ຫວຽດນາມ-ລາວ ເວົ້າລວມ, ເວົ້າສະເພາະ ການຮ່ວມມືລະຫວ່າງສອງກຳລັງຕໍາຫຼວດ ຫວຽດນາມ-ລາວ. ກອງປະຊຸມໄດ້ພ້ອມກັນແລກປ່ຽນຄວາມຄິດເຫັນ, ປຶກສາຫາລືຢ່າງກົງໄປກົງມາ, ສ້າງສັນ ແລະ ມີຄວາມເປັນເອກະພາບສູງຕາມເນື້ອໃນແຜນການຮ່ວມມືຕໍ່ໜ້າ ຄື: ສອງຝ່າຍຈັດຕັ້ງປະຕິ ບັດຕາມບົດບັນທຶກໃຫ້ໄດ້ຮັບຜົນດີ, ຕາມການຕົກລົງສາກົນທີ່ສອງຝ່າຍເປັນສະມາຊິກ; ປະສານສົມທົບໃນການກວດກາ, ຕີລາຄາ, ສະເໜີປັບປຸງ, ບັນດາເອກະສານຮ່ວມມື, ຕ້ານອາຊະຍາກຳ ລະຫວ່າງ ສອງກະຊວງ ໃຫ້ເໝາະສົມກວ່າເກົ່າ ໃນສະພາບການໃໝ່. ໃນນັ້ນ, ມີບົດບັນທຶກຊ່ວຍເຫຼືອທາງຍຸຕິທຳ ກ່ຽວກັບພົນລະເຮືອນ ແລະ ທາງອາຍາ ລະຫວ່າງ ສສ ຫວຽດນາມ ແລະ ສປປ ລາວ ທີ່ໄດ້ລົງນາມໃນປີ 1998; ສົນທິສັນຍາ ລະ ຫວ່າງ ລັດຖະ ບານ ຫວຽດນາມ ແລະ ລາວ ວ່າດ້ວຍການຮ່ວມມືໃນການຄວບຄຸມຢາເສບຕິດ, ສານອອກລິດທາງຈິດປະສາດ ແລະ ສານເຄມີຕົ້ນ ປີ 1998; ແຜນການປະສານສົມທົບໃນການຈັດ ຕັ້ງປະຕິບັດ ລະຫວ່າງ ຄະນະກຳມະການປ້ອງກັນ ແລະ ຕ້ານຢາເສບຕິດຫວຽດນາມ ແລະ ຄະນະກຳມະຕ້ານຢາເສບຕິດລາວ ກ່ຽວກັບການກວດກາ ແລະ ສະກັດກັ້ນຂົນສົ່ງຢາເສບ ຕິດ, ຄ້າຂາຍສານເຄມີຕົ້ນຜິດກົດໝາຍ ທີ່ໄດ້ເຊັນກັນໃນປີ 1999; ສົນທິສັນຍາ ວ່າດ້ວຍການສະກັດກັ້ນ, ຕ້ານການຄ້າມະນຸດ ແລະ ປົກປ້ອງຜູ້ຖືກເຄາະຮ້າຍ ລະຫວ່າງລັດຖະບານ ຫວຽດນາມ ແລະ ລັດຖະບານ ລາວ ທີ່ໄດ້ລົງນາມໃນວັນທີ 03 ພະຈິກ 2010; ບົດບັນ ທຶກລະຫວ່າງ ກະຊວງປ້ອງກັນຄວາມສະຫງົບ ສສ ຫວຽດນາມ ແລະ ກະຊວງປ້ອງກັນຄວາມສະຫງົບ ສປປ ລາວ ວ່າດ້ວຍການຮ່ວມມືສະກັດກັ້ນ, ຕ້ານຢາເສບຕິດ ທີ່ໄດ້ລົງນາມໃນວັນທີ ໃນວັນທີ 09 ສິງຫາ 2021 ຢູ່ທີ່ນະຄອນຫຼວງວຽງຈັນ ສປປ ລາວ. ເພີ່ມທະວີການຮ່ວມມືຢ່າງຮອບດ້ານໃນການປະສານສົມທົບ, ຊ່ວຍເຫຼືອເຊິ່ງກັນ ແລະ ກັນ ໃນ
ເວທີສາກົນກ່ຽວກັບວຽກງານສະກັດກັ້ນ ແລະ ຕ້ານອາຊະຍາກໍາ ຄື: INTERPOL, ASENNAPOL ບົນພື້ນຖານໄມຕີຈິດມິດຕະພາບ ແລະ ການຮ່ວມມືຮອບດ້ານລະຫວ່າງກຳລັງຕຳຫຼວດຂອງສອງປະເທດ ຫວຽດນາມ-ລາວ, ຍົກສູງພາລະບົດ ບາດຂອງກໍາລັງຕໍາຫຼວດສອງປະເທດໃນເວທີສາກົນ. ຍູ້ແຮງການຮ່ວມມືຮອບດ້ານໃນການປະສານສົມທົບໃນວຽກງານສະກັດກັ້ນ ແລະ ຕ້ານອາຊະຍາ ກໍາເຂົ້າສູ່ລວງເລິກ ຕາມພາລະບົດບາດ ແລະ ໜ້າ ທີ່ກຳລັງຕຳຫຼວດຂອງສອງປະເທດ, ໃຫ້ເອົາໃຈໃສ່ ຄື: ສອງຝ່າຍໄດ້ມອບໃຫ້ບັນດາກົມກອງທີ່ກ່ຽວຂ້ອງຮ່ວມມືໃນການແລກປ່ຽນຂໍ້ມູນຂ່າວສານກ່ຽວກັບວຽກງານສະກັດກັ້ນ, ຕ້ານອາຊະຍາກໍາ, ຮັກສາຄວາມເປັນລະບຽບຮຽບຮ້ອຍທາງສັງຄົມ; ໂດຍສະເພາະແມ່ນອາຊະຍາກຳຂ້າມຊາດລະຫວ່າງສອງປະເທດ, ອາຊະຍາກໍາຢາເສບຕິດ, ອາຊະຍາກໍານໍາໃຊ້ເຕັກໂນໂລຊີຂັ້ນສູງ; ອາຊະຍາກໍາທາງອິນເຕີເນັດ, ອາຊະຍາກໍາທາງດ້ານເສດຖະກິດ, ອາຊະຍາກໍາຄ້າມະ ນຸດ, ອາຊະຍາກໍາສິ່ງແວດລ້ອມ, ການສໍ້ໂກງທາງໂທລະຄົມ, ການໄລ່ຊອກ-ໄລ່ຈັບເປົ້າ ໝາຍ… ເພີ່ມທະວີໃນການປະສານສົມທົບໂດຍຜ່ານບັນດາຫ້ອງການກັບຫ້ອງການສະກັດກັ້ນ, ຕ້ານອາຊະຍາກໍາບໍລິເວນຊາຍແດນ (BLO) ລະຫວ່າງ ຫວຽດນາມ ແລະ ລາວ, ເພີ່ມທະວີໃນການແລກປ່ຽນຂໍ້ມູນຂ່າວສານຂອງແຕ່ລະວຽກ, ເປົ້າໝາຍທີ່ກ່ຽວຂ້ອງ ເປັນຕົ້ນແມ່ນເປົ້າໝາຍທີ່ກ່ຽວຂ້ອງກັບບັນດາແຂວງທີ່ມີຊາຍແດນຕິດຈອດ.
ພ້ອມນັ້ນ, ສອງຝ່າຍເຫັນດີສ້າງຕັ້ງໜ່ວຍປະສານງານແລກປ່ຽນຂໍ້ມູນຂ່າວສານລະຫວ່າງສອງກຳລັງຕໍາຫຼວດ ເຊັ່ນ: ມອບໃຫ້ຫ້ອງການອົງການຕຳຫຼວດສືບສວນ-ສອບສວນ ກະ ຊວງປ້ອງກັນຄວາມສະຫງົບ ຫວຽດນາມ ແລະ ຫ້ອງການກົມໃຫຍ່ຕຳຫຼວດ ກະຊວງປ້ອງ ກັນຄວາມສະຫງົບ ລາວ ເປັນຜູ້ປະສານງານ; ໃນກໍລະນີຮີບດ່ວນ, ຕຳຫຼວດບັນດາທ້ອງຖິ່ນຕິດກັບຊາຍແດນ ຫຼື ບັນດາໜ່ວຍງານວິຊາສະເພາະສາມາດແລກປ່ຽນຂໍ້ມູນຂ່າວສານໂດຍກົງ, ແຕ່ຕ້ອງລາຍງານຕໍ່ການນຳຂັ້ນເທິງຮັບຊາບ ແລະ ແຈ້ງໃຫ້ໜ່ວຍປະສານງານຂອງກຳລັງຕຳຫຼວດສອງປະເທດໄດ້ຮັບຊາບ, ເພື່ອຕິດຕາມ. ມອບໃຫ້ຜູ້ຕາງໜ້າກຳລັງຕຳຫຼວດສອງປະ ເທດທີ່ປະຈຳຢູ່ຫວຽດນາມ ແລະ ລາວ ເພີ່ມທະວີການແລກປ່ຽນສະພາບການ, ປະສົບ ການ ແລະ ຈັດຕັ້ງຜັນຂະຫຍາຍຄຳເຫັນຊີ້ນຳຂອງສອງກະຊວງ; ສົມທົບກັນແກ້ໄຂບັນດາບັນຫາເກີດໃໝ່ທີ່ກ່ຽວຂ້ອງເຖິງການສະກັດກັ້ນ, ຕ້ານອາຊະຍາກຳຢ່າງທັນການ, ມີປະສິດທິຜົນ, ຮັບປະກັນຄວາມເປັນລະບຽບຮຽບຮ້ອຍ, ຄວາມປອດໄພໃນສັງຄົມ. ພ້ອມນີ້, ມອບ ໃຫ້ຫ້ອງການ INTERPOL ລາວ ແລະ ຫ້ອງການ INTERPOL ຫວຽດນາມ, ແລກປ່ຽນ, ມອບ-ຮັບ, ແກ້ໄຂຂໍ້ມູນເປົ້າໝາຍລະຫວ່າງສອງກໍາລັງຕໍາຫຼວດ ຫວຽດນາມ-ລາວ. ພ້ອມທັງເພີ່ມທະວີໃນການຮ່ວມມືການແລກປ່ຽນຂໍ້ມູນຂ່າວສານ, ປະສານສົມທົບກັນໃນການສືບສວນກວດກາ, ເກັບກຳພະຍານຫຼັກຖານ, ໄລ່ຊອກ-ໄລ່ຈັບອາຊະຍາກຳທາງອາຍາ, ເສດ ຖະກິດ, ສິ່ງແວດລ້ອມ, ຄ້າມະນຸດ ໂດຍສະເພາະແມ່ນອາຊະຍາກຳຂ້າມຊາດລະຫວ່າງສອງປະເທດ ເຊັ່ນ: ສໍ້ໂກງທາງໂທລະຄົມ, ຄ້າຂາຍເຖື່ອນ; ອາຊະຍາກຳການຂົນ-ສົ່ງສິນຄ້າຜິດກົດໝາຍ; ການຜະລິດ, ຄ້າຂາຍສິນຄ້າປອມ, ລະເມີດ ສິດຊັບສິນທາງປັນຍາ, ທາງການທະ ນາຄານ, ຮຸ້ນ; ຂຸດຄົ້ນປ່າໄມ້, ແຮ່ທາດຜິດກົດໝາຍ, ການຄ້າຂາຍສັດປ່າ, ສິນຄ້າປະເພດສັດ ປ່າຫວງຫ້າມ… ແລະ ປະສານສົມທົບກັນສືບສວນຄະດີກ່ຽວຂ້ອງເຖິງບັນດາອາຊະຍາກຳດັ່ງກ່າວ ຕາມຂໍ້ກຳນົດກົດ ໝາຍຂອງແຕ່ລະປະເທດ. ໃນກໍລະນີທີ່ຈຳເປັນ, ສອງຝ່າຍຈະແຕ່ງຕັ້ງຄະນະປະສານງານເພື່ອສືບສວນ-ສອບສວນ, ຕິດຕາມ, ກຳແໜ້ນສະພາບຄວາມສະຫງົບ, ຄວາມເປັນລະບຽບຮຽບຮ້ອຍທາງສັງຄົມ, ສະພາບອາຊະຍາກຳຢູ່ບໍລິເວນຊາຍແດນ ຫຼື ຈຸດຫຼໍ່ແຫຼມຂອງສອງປະເທດ ເພື່ອສ້າງແຜນການປະສານສົມທົບຮ່ວມມືກັນສະກັດກັ້ນ ແລະ ແກ້ໄຂຢ່າງທັນເວລາ.
ນອກນັ້ນ, ເອົາໃຈໃສ່ໃນການປະສານສົມທົບພິສູດ, ນໍາຈັບ ແລະ ສົ່ງຕົວບັນດາເປົ້າໝາຍເຊິ່ງເປັນພົນລະເມືອງຂອງປະເທດນີ້ທີ່ມີການກະທຳຜິດລະເມີດກົດໝາຍ ແລ້ວໜີໄປຢູ່ປະເທດນັ້ນ ເພື່ອໃຫ້ສອດຄ່ອງກັບກົດໝາຍຂອງແຕ່ລະປະເທດ ແລະ ສາ ກົນ. ໃນກໍລະນີພິເສດ, ສອງຝ່າຍອາດຈະສ້າງໜ່ວຍງານວິຊາສະເພາະຮ່ວມກັນ ຫຼື ສາມາດແຕ່ງຕັ້ງພະນັກງານຂອງຕົນໄປຍັງປະເທດຂອງກັນ ໂດຍການຕົກລົງເຫັນດີຂອງແຕ່ລະຝ່າຍ ເພື່ອພ້ອມກັນແກ້ໄຂບັນຫາອາຊະຍາກໍາຂ້າມຊາດທີ່ພົວພັນເຖິງສອງປະເທດໃຫ້ທັນເວລາ ພ້ອມທັງປະຕິບັດບັນດາມາດຕະການມອບ-ຮັບເປົ້າໝາຍໃຫ້ກັນ ຫຼື ໃຫ້ການສະໜັບສະໜູນຊ່ວຍເຫຼືອກັນທາງດ້ານນິຕິກຳຕາມສົນທິສັນຍາວ່າດ້ວຍການຊ່ວຍເຫຼືອເຊິ່ງກັນ ແລະ ກັນ, ກ່ຽວກັບຄະດີທາງອາຍາ ແລະ ທາງແພ່ງ ລະຫວ່າງ ຫວຽດນາມ ແລະ ລາວ ທີ່ໄດ້ລົງນາມວັນທີ 06 ກໍລະກົດ 1998 ຢູ່ນະຄອນຫຼວງຮ່າໂນ້ຍ.
ກອງປະຊຸມຄັ້ງນີ້, ສອງຝ່າຍເຫັນດີຮ່ວມກັນຂະຫຍາຍການຮ່ວມມືໃນການກໍ່ສ້າງ, ບໍາລຸງວິ ຊາສະເພາະບົນພື້ນຖານສົນທິ ສັນຍາ ແລະ ການຕົກລົງຂອງລັດຖະບານສອງປະເທດ. ໃນນັ້ນ, ກຳລັງຕຳຫຼວດຫວຽດນາມ ຈະຈັດຕັ້ງຊຸດຝຶກອົບຮົມໄລຍະສັ້ນໃຫ້ແກ່ກຳລັງຕຳຫຼວດລາວ ກ່ຽວກັບວຽກງານເຕັກນິກທາງອາຍາ, ວຽກງານສືບສວນ-ສອບສວນຄະດີອາຍາ (ເປັນຕົ້ນແມ່ນອາຊະຍາກໍາຢາເສບຕິດ, ເສດຖະກິດ, ສິ່ງແວດລ້ອມ), ວຽກງານໄລ່ຊອກ-ໄລ່ຈັບເປົ້າໝາຍ… ສືບຕໍ່ຄົ້ນຄວ້າ, ສະເໜີຕອບສະໜອງພາຫະນະ, ອຸປະກອນເຕັກນິກທີ່ທັນ ສະໄໝຮັບໃຊ້ວິຊາສະເພາະ ເພື່ອເພີ່ມເຕີມໃສ່ແຜນການຮ່ວມມືຊ່ວຍ ເຫຼືອປະຈຳປີ ລະ ຫວ່າງ ສອງກະຊວງ, ສອງລັດຖະບານ ລາວ ແລະ ຫວຽດນາມ ກ່ຽວກັບການຊ່ວຍເຫຼືອເຊິ່ງກັນ ແລະ ກັນ, ຕາມຄວາມສາມາດຂອງແຕ່ລະຝ່າຍ, ຈັດຕັ້ງບັນດາການເຄື່ອນໄຫວຮ່ວມມືຄົ້ນຄວ້າ, ແລກປ່ຽນບັນດາຜົນງານກ່ຽວກັບວິທະຍາສາດອາຍາ ແລະ ການໝູນໃຊ້ເຕັກນິກອາຍາເຂົ້າໃນວຽກງານຕົວຈິງຕໍ່ສູ້ສະກັດກັ້ນ, ຕ້ານອາຊະຍາກຳ.
ສຳລັບກອງບັນຊາການປ້ອງກັນຄວາມສະຫງົບແຂວງທີ່ມີຊາຍແດນຮ່ວມກັນ ແລະ ບັນດາແຂວງ, ນະຄອນແຮກສ່ຽວໃຫ້ເພີ່ມທະວີການໂຄສະນາເຜີຍແຜ່, ສຶກສາອົບຮົມໃຫ້ປະຊາ ຊົນເຂດບໍລິເວນຊາຍແດນເຄົາລົບເອກະລາດ, ອະທິປະໄຕ, ກົດໝາຍ ແລະ ຮີດຄອງປະເພ ນີຂອງແຕ່ລະປະເທດ, ປະຕິບັດສົນທິສັນຍາ ແລະ ລະບອບລະບຽບການຢູ່ຕາມຊາຍແດນ ແລະ ດ່ານຊາຍແດນ, ເຊິ່ງລັດຖະບານ ຫວຽດນາມ ແລະ ລາວ ໄດ້ລົງນາມຮ່ວມກັນ, ຊຸກຍູ້ວຽກງານການໂຄສະນາສະກັດກັ້ນ ແລະ ຕ້ານຢາເສບຕິດໃຫ້ແກ່ປະຊາຊົນຢູ່ບໍລິເວນຊາຍ ແດນ, ກໍ່ສ້າງບ້ານ, ກຸ່ມບ້ານ, ຊຸມຊົນ ແລະ ໂຮງຮຽນປອດຢາເສບຕິດ, ເພື່ອແນ່ໃສ່ຮັກສາຄວາມສະຫງົບ, ຄວາມເປັນລະບຽບຮຽບຮ້ອຍຢູ່ເຂດບໍລິເວນຊາຍແດນ; ປະສານສົມທົບກັນກວດກາ, ສືບສວນ-ສອບສວນ, ໄລ່ຊອກ-ໄລ່ຈັບ ອາຊະຍາກຳຂອງປະເທດນີ້ທີ່ເອົາຕົວຫຼົບໜີໄປຍັງປະເທດອື່ນ; ສົມທົບກັນແກ້ໄຂບັນດາ “ ຈຸດຫຼໍ່ແຫຼມ ” ກ່ຽວກັບການປ້ອງກັນຄວາມສະຫງົບ, ປອດໄພ, ຄວາມເປັນລະບຽບຮຽບຮ້ອຍຢູ່ເຂດຊາຍ ແດນ; ຢຶດອາວຸດ, ທາດລະເບີດ, ອຸປະກອນຊ່ວຍໜູນ, ໝາກກະໂພກ ແລະ ອື່ນໆທີ່ກ່ຽວຂ້ອງກັບອາຊະຍາກໍາ.
ບັນດາກອງບັນຊາການປ້ອງກັນຄວາມສະຫງົບແຂວງທີ່ມີຊາຍແດນຮ່ວມກັນ ແລະ ກອງບັນຊາການຕຳຫຼວດບັນດາແຂວງ, ນະຄອນແຮກສ່ຽວ ຜັດປ່ຽນກັນຈັດຕັ້ງການພົບປະແລກປ່ຽນສະພາບ, ບົດຮຽນປະສົບການ ແລະ ແກ້ໄຂບັນຫາເກີດໃໝ່ໃນຂອບເຂດຂອງສອງແຂວງ, ໃນກໍລະນີທີ່ຈຳເປັນ, ບັນດາກອງບັນຊາການປ້ອງກັນຄວາມສະຫງົບບັນດາແຂວງ, ນະຄອນສາມາດແຕ່ງຕັ້ງພະນັກງານໄປສົມທົບກັບອີກຝ່າຍ ເພື່ອຮ່ວມກັນແກ້ໄຂບັນຫາເກີດໃໝ່ ແລະ ລາຍງານໃຫ້ການນຳກະຊວງສອງປະເທດໄດ້ຮັບຊາບ, ຊີ້ນຳ, ເປັນເຈົ້າການປະສານສົມທົບກັນ. ສືບຕໍ່ຜັນຂະຫຍາຍການກໍ່ສ້າງ ແລະ ນຳໃຊ້ຫ້ອງການປະສານງານຂອງກໍາລັງຕຳຫຼວດ ຢູ່ບ້ານຕິດກັບຊາຍແດນ ແລະ ບ້ານບໍ່ຕິດຊາຍແດນແຕ່ເປັນຈຸດຫຼໍ່ແຫຼມກ່ຽວກັບອາຊະຍາກໍາຢາເສບຕິດຂອງລາວ ໂດຍທີ່ກະຊວງປ້ອງກັນຄວາມສະຫງົບ ຫວຽດນາມ ໃຫ້ການຊ່ວຍເຫຼືອ ໃຫ້ມີປະສິດທິຜົນ.
ພ້ອມນັ້ນ, ສອງຝ່າຍ ຍັງສືບຕໍ່ຈັດຕັ້ງປະຕິບັດໃຫ້ໄດ້ຮັບໝາກຜົນການແລກປ່ຽນຂໍ້ມູນ ກ່ຽວກັບການແກ້ໄຂບັນຫາການເຄື່ອນຍ້າຍທີ່ຢູ່ອາໃສຂອງປະຊາຊົນລຽບຕາມຊາຍແດນ ແລະ ການແຕ່ງງານບໍ່ຖືກຕ້ອງຕາມກົດໝາຍ ເພີ່ມທະວີຄົ້ນຄວ້າບັນດາຫຼັກການປະສານສົມທົບ ລະຫວ່າງ ສອງປະເທດ ແລະ ສືບຕໍ່ຜັນຂະຫຍາຍໂຄງການສູນປິ່ນປົວບໍາບັດ ແລະ ຟື້ນຟູສຸຂະພາບຜູ້ຕິດຢາເສບຕິດ ຢູ່ແຂວງວຽງຈັນ; ຮັບປະກັນຄຸນະພາບ ໝາກຜົນ ແລະ ຖືກຕ້ອງຕາມບົດບັນທຶກຊ່ວຍຈໍາທີ່ໄດ້ຮ່ວມລົງນາມກັນ ແລະ ເຫັນດີສືບຕໍ່ຜັດປ່ຽນກັນຈັດຕັ້ງກອງປະຊຸມປີລະຄັ້ງ, ເຊິ່ງກອງປະຊຸມຮ່ວມມືສະກັດກັ້ນ, ຕ້ານອາຊະຍາກຳລະຫວ່າງກຳລັງຕຳຫຼວດ, ກະຊວງປ້ອງກັນຄວາມສະຫງົບ ຫວຽດນາມ ແລະ ກຳລັງຕຳຫຼວດ, ກະຊວງປ້ອງກັນຄວາມສະຫງົບ ລາວ ຄັ້ງທີ XIV ຈະຈັດຂຶ້ນຢູ່ ສປປ ລາວ.
