ເພື່ອຮັບປະກັນຄວາມສະຫງົບປອດໄພແກ່ກອງປະຊຸມສຸດຍອດອາຊຽນ ຄັ້ງທີ 44-45 ກົມໃຫຍ່ຕໍາຫຼວດ ໄດ້ຈັດຝຶກຊ້ອມກຳ ລັງວິຊາສະເພາະ 3 ເລົ່າຮົບ ຄື: ກຳລັງຕໍາຫຼວດຈະລາຈອນ, ກຳລັງຕໍາຫຼວດໝາວິຊາສະເພາະ ແລະ ກຳລັງຕໍາຫຼວດດັບເພິງ ໃນວັນທີ 27 ກັນຍາ 2024, ໂດຍການເຂົ້າຮ່ວມ ຂອງທ່ານ ພົຕ ຄຳກິ່ງ ຜຸຍຫຼ້າມະນີວົງ ຮອງລັດຖະມົນຕີ, ຫົວ ໜ້າກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ, ມີຄະນພັກ-ຄະນະບັນຊາກົມໃຫຍ່ຕໍາຫຼວດເຂົ້າຮ່ວມ.
ທ່ານ ພົຈວ ປອ ວັນທອນ ສຸລິສັກ ຮອງຫົວໜ້າກົມໃຫຍ່ຕຳຫຼວດ ໄດ້ກ່າວວ່າ: ເພື່ອເປັນການຈັດຕັ້ງຜັນຂະຫຍາຍແຜນແມ່ບົດ ຂອງກະຊວງປ້ອງກັນຄວາມສະຫງົບ ວ່າດ້ວຍການປ້ອງກັນກອງປະຊຸມສຸດຍອດອາຊຽນ ຄັ້ງທີ 44, 45 ທີ່ນະຄອນຫຼວງວຽງຈັນ ໃນປີ 2024 ໃຫ້ກາຍເປັນແຜນວຽກລະອຽດຂອງບັນດາເຫຼົ່າຮົບວິຊາສະເພາະທີ່ກ່ຽວຂ້ອງ, ພ້ອມທັງເປັນການກວດກາຄືນຜົນການກະກຽມ, ການຝຶກຊ້ອມ ແລະ ຄວາມພ້ອມດ້ານກໍາລັງ, ພາຫະ ນະ-ອຸປະກອນ ເຕັກນິກ, ກົນໄກການປະ ສານງານໃນການປະຕິບັດຕົວຈິງ ເພື່ອໃຫ້ການປະ ຕິບັດໜ້າທີ່ໃຫ້ມີຄວາມຄ່ອງຕົວ, ຄວາມເປັນເອກະພາບໃນການຊີ້ນໍາ-ບັນຊາ, ການຈັດຕັ້ງປະຕິບັດບັນດາມາດຕະການທາງດ້ານວິຊາສະເພາະ, ຍົກສູງຄວາມສໍານິສຳນານ ຂອງກໍາລັງທີ່ຈະເຂົ້າ ຮ່ວມເຮັດວຽກງານປ້ອງກັນກອງປະຊຸມສຸດຍອດອາຊຽນ ຄັ້ງທີ 44, 45 ໃຫ້ມີຄວາມປອດໄພ 100%.
ການຝືກຊ້ອມໃນຄັ້ງນີ້ ໄດ້ແບ່ງອອກເປັນ 3 ກ້ອນກຳລັງ ຄື:
1. ກ້ອນກຳລັງກົມຕຳຫຼວດຈະລາຈອນ ສະແດງ 2 ລາຍການ ຄື: ການຂີ່ລົດຮູບແບບ 2 ແຖວ ແລະ ຮູບແບບຕັ້ງຂະບວນຕົວຈິງ ມີລົດໂມໂຕເປີດທາງນໍາໜ້າ ແລະ ລົດສະຫຼາມ, ລົດພິທີການ ແລະ ລົດຂອງແຂກໃນຂະບວນ ພ້ອມທັງມີລົດໂມໂຕອັດທ້າຍ ເພື່ອຫຼີກລ່ຽງນັກຂັບຂີ່ທີ່ຈະລະເມີດ ໃນການແຊງຂະບວນດັ່ງກ່າວ ເວລາປະຕິບັດໜ້າທີ່ສັນຈອນຕາມເສັ້ນທາງແມ່ນມີເຈົ້າໜ້າທີ່ຕຳຫຼວດ ຈະລາຈອນ ອໍານວຍຄວາມສະດວກຕາມເສັ້ນທາງ 3 ແຍກ, 4 ແຍກ, ພ້ອມທັງອໍານວຍຄວາມສະດວກຈາກຕົ້ນທາງຫາປາຍທາງ ເຊັ່ນ: ສະໜາມບິນ ຫາ ສະຖານທີ່ພັກເຊົາ ແລະ ສະຖານ ທີ່ປະຊຸມຂອງແຂກພາຍໃນ ແລະ ຕ່າງປະເທດ ໃຫ້ມີຄວາມປອດໄພຮ້ອຍສ່ວນຮ້ອຍ;
2. ກ້ອນກຳລັງກົມຕຳຫຼວດຝຶກແອບ ແລະ ນໍາໃຊ້ໝາວິຊາສະເພາະ ສະແດງ 3 ລາຍການ ຄື: ນໍາໃຊ້ໜາວິຊາສະເພາະ ຈໍານວນ 10 ໂຕ, ສະແດງຮູບແຖວ,ສະແດງໝາວິຊາສະເພາະດົມກິ່ນທາດລະເບີດ ແລະ ຢາເສບຕິດ, ສະແດງ ໝາວິຊາສະ ເພາະໄລ່ຈັບເປົ້າໝາຍ ພ້ອມປະ ສານສຽງແຕກ, ເຮັດໃຫ້ໝາວິຊາສະເພາະມີລະບຽບວິໄນ ປະຕິບັດຕາມຄໍາສັ່ງຂອງຄູຝຶກ.
3. ກ້ອນກຳລັງ ຕຳຫຼວດສະກັດກັ້ນ ແລະ ຕ້ານອັກຄີໄພ ສະແດງ 4 ລາຍການສະແດງ ຄື: ການອອກປະຕິບັດໜ້າທີ່ມອດໄຟ ຫຼື ວ່າແລ່ນຍາວ, ການໜີໄພ ແລະ ກູ້ໄພໃນອາຄານສູງ, ການມອດໄຟໃນອາຄານສູງ ແລະ ການສາທິດມອດໄຟໄໝ້ຂັ້ນຕົ້ນ. ທັງນີ້, ເພື່ອຮັບປະກັນໃຫ້ແຂກພາຍໃນ ແລະ ຕ່າງປະເທດ ທີ່ມາເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 44-45 ທີ່ ສປປລາວ ເປັນເຈົ້າພາບ ໃຫ້ມີຄວາມອຸ່ນໃຈ ແລະ ໜັ້ນໃຈເຖິງຄວາມປອດໄພ ໃນການປ້ອງກັນຂອງກຳລັງວິຊາສະເພາະ ທີ່ໄດ້ຮັບການມອບໝາຍ ຈາກຂັ້ນເທິງຮັບປະກັນຄວາມສະຫງົບປອດໄພຮອບດ້ານ.
