ທ່ານ ນາງ ປານີ ຮວງພະຈັນ ປະທານສະມາຄົມ ເພື່ອການພັດທະນາເສດຖະກິດ-ສັງຄົມ ລາວ-ຣັດເຊຍ ພ້ອມຄະນະ ໄດ້ເຂົ້າຢ້ຽມຂໍ່ານັບ ທ່ານ ພົນໂທ ກົງທອງພົງວິຈິດ ກຳມະການສູນກາງພັກ ຮອງລັດຖະມົນຕີ ກະຊວງປ້ອງກັນຄວາມສະຫງົບ ໃນວັນທີ 31 ຕຸລາ 2023 ເພື່ອເປັນການແນະນຳຕົວໃນການມາຮັບໜ້າທີ່ເປັນ ປະທານສະມາຄົມ ເພື່ອການພັດທະນາເສດຖະກິດ-ສັງຄົມ ລາວ-ຣັດເຊຍ.
ທ່ານ ນາງ ປານີ ຮວງພະຈັນ ໄດ້ສະແດງຄວາມຂອບໃຈຕໍ່ຄະນະພັກ-ຄະນະນຳ ກະຊວງປ້ອງກັນຄວາມສະຫງົບ ທີ່ໃຫ້ການສະໜັບສະໜູນຈົນໄດ້ຮັບອະນຸມັດຈາກພັກ-ລັດ ສ້າງຕັ້ງສະມາຄົມ ເພື່ອການພັດທະນາເສດຖະກິດ-ສັງຄົມ ລາວ-ຣັດເຊຍ ພ້ອມທັງແຈ້ງຈຸດປະສົງໃນການເຂົ້າມາຢ້ຽມຂໍ່ານັບ ທ່ານຮອງລັດຖະມົນຕີ ກະຊວງ ປກສ ໃນຄັ້ງນີ້ ເປັນໂອກາດທີ່ດີໃນການເສີມສ້າງສາຍພົວພັນລະຫວ່າງ ກະຊວງປ້ອງກັນຄວາມສະຫງົບ ແລະ ສະມາຄົມ ເພື່ອການພັດທະນາເສດຖະກິດ-ສັງຄົມ ລາວ-ຣັດເຊຍ.
ພ້ອມນັ້ນ, ຍັງເປັນການຂໍທິດຊີ້ນຳປຶກສາຫາລື ເພື່ອເສີມຂະຫຍາຍສາຍພົວພັນການຮ່ວມມືສອງຝ່າຍ ລະຫວ່າງ ສປປ ລາວ ແລະ ສະຫະພັນ ຣັດເຊຍ ໃຫ້ນັບມື້ນັບເຂັ້ມແຂງໄປເລື້ອຍໆ ໂດຍແມ່ນສະມາຄົມ ເພື່ອການພັດທະນາເສດຖະກິດ-ສັງຄົມ ລາວ-ຣັດເຊຍ ເປັນຂົວຕໍ່ລະຫວ່າງສອງເສດຖະກິດ ລາວ-ຣັດເຊຍ.
ເຊິ່ງມີຈຸດມຸ່ງຫວັງໃນການດຶງດູດເອົານັກທຸລະກິດ ກໍຄື ນັກການພັດທະນາຈາກ ສະຫະພັນ ຣັດເຊຍ ມາລົງທຶນດຳເນີນທຸລະກິດ ຢູ່ ສປປລາວ ໂດຍສະເພາະແມ່ນໃນຂະແໜງສຶກສາ ແລະ ກິລາ, ຂະແໜງແຮງງານ ແລະສະຫວັດດີການສັງຄົມ, ອຸດສາຫະກຳ ແລະ ການຄ້າ, ການທະນາຄານ ເພື່ອສົ່ງເສີມການຄ້າ ແລະ ການລົງທຶນ ລາວ-ຣັດເຊຍ ຕາມທ່າແຮງ ແລະ ຄວາມອາດສາມາດຕົວຈິງຂອງແຕ່ລະປະເທດ.
ແລກປ່ຽນການຢ້ຽມຢາມຂອງນັກທຸລະກິດ ລະຫວ່າງສອງປະເທດ ເພື່ອສ້າງເງື່ອນໄຂຮ່ວມມືກັນດ້ານທຸລະກິດ-ການຄ້າ ລາວ-ຣັດເຊຍ, ສະໜັບສະໜູນດ້ານການເງິນແກ່ເມືອງ ແລະ ບ້ານທຸກຍາກ ທີ່ໄດ້ຮັບຜົນກະທົບຈາກໄພພິບັດທາງທຳມະຊາດ, ອັກຄີໄພ ແລະ ອື່ນໆໃນສັງຄົມ.
ທ່ານ ພົນໂທ ກົງທອງ ພົງວິຈິດ ໄດ້ສະແດງຄວາມຊົມເຊີຍຕໍ່ຄະນະສະມາຄົມ ທີ່ມີຄວາມຕື່ນຕົວສະໝັກໃຈປະກອບທຶນ, ຊັບສິນ ແລະ ສະຕິປັນຍາ ເພື່ອສ້າງຕັ້ງສະມາຄົມ ຕາມແນວທາງນະໂຍບາຍຂອງພັດ-ລັດ ແລະ ໃນນາມ ກະຊວງ ປກສ ພ້ອມທີ່ໃຫ້ຄຳປຶກສາຕາມທິດນຳຂອງຂັ້ນເທິງ.
ອີກເທື່ອໜຶ່ງ, ສະມາຄົມ ກໍຕ້ອງເຄື່ອນໄຫວທຸລະກິດໃຫ້ສອດຄ່ອງກັບແນວທາງນະໂຍບາຍຂອງພັກ-ລັດ, ກຸ້ມຕົນເອງທາງດ້ານການເງິນ, ເຕັກນິກ ແລະ ວິຊາການ, ໂປ່ງໃສ, ເປີດເຜີຍ, ມີປະຊາທິປະໄຕ ແລະ ມີຄວາມສະເໝີພາບ, ບຸກຄົນຮັບຜິດຊອບດ້ວຍຕົນເອງ ຕໍ່ໜ້າກົດໝາຍທຸກການເຄື່ອນໄຫວຂອງສະມາຄົມ ເພື່ອນຳຜົນປະໂຫຍດມາໃຫ້ປະເທດຊາດ.
