ໃນວັນທີ 8 ພຶດສະພາ 2023, ພົຕ ວັນທອງ ກອງມະນີ ກຳມະການສູນກາງພັກ ຮອງລັດຖະມົນຕີກະຊວງ ປກສ ໄດ້ລົງເຄື່ອນໄຫວພົບປະໂອ້ລົມ ແລະ ຊີ້ນໍາວຽກງານປ້ອງກັນຄວາມສະຫງົບ ຮອບດ້ານຢູ່ ປກສ ເມືອງໄຊທານີ ນະຄອນຫຼວງວຽງຈັນ, ໂດຍມີ ພົຈວ ປອ ບົວພັນ ຟອງມະນີ ຫົວໜ້າກອງບັນຊາການ ປກສ ນະຄອນຫຼວງວຽງຈັນ, ຫົວໜ້າກອງບັນຊາການ ປກສ ເມືອງ, ການນໍາຂອງເມືອງ, ພ້ອມດ້ວຍນາຍ ແລະ ພົນຕໍາຫຼວດພາຍໃນກອງບັນຊາການ ເຂົ້າຮ່ວມ.
ໃນພິທີ, ພັທ ຈັນເພັງ ແກ້ວປະເສີດ ຫົວໜ້າກອງບັນຊາການ ປກສ ເມືອງໄຊທານີ ໄດ້ລາຍງານສະພາບຈຸດພິເສດ ແລະ ການຈັດຕັ້ງປະຕິບັດວຽກງານວິຊາສະເພາະຮອບດ້ານໃຫ້ທ່ານຮອງລັດຖະມົນຕີກະຊວງ ປກສ ໄດ້ຮັບຊາບ ເປັນຕົ້ນແມ່ນວຽກງານການນຳພາຂອງຄະນະພັກ-ຄະນະກອງບັນຊາການ, ວຽກງານຮັກສາຄວາມສະຫງົບທາງດ້ານການເມືອງ, ວຽກງານຮັກສາຄວາມເປັນລະບຽບຮຽບຮ້ອຍໃນສັງຄົມ, ວຽກງານຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ, ວຽກງານພະລາທິການ ແລະ ວຽກງານອື່ນໆ.
ໃນໂອກາດດັ່ງກ່າວ, ພົຕ ວັນທອງ ກອງມະນີ ໄດ້ໃຫ້ທິດຊີ້ນໍາຫຼາຍບັນຫາ, ເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ນາຍ ແລະ ພົນຕໍາຫຼວດ ປກສ ເມືອງໄຊທານີ ສາມາດຍາດມາໄດ້ໃນໄລຍະຜ່ານມາ, ພ້ອມທັງໄດ້ເນັ້ນໃຫ້ຄະນະພັກ-ຄະນະບັນຊາເອົາໃຈໃສ່ ເຮັດວຽກງານສຶກສາອົບຮົບການເມືອງ-ນຳພາແນວຄິດໃຫ້ກຳລັງເປັນປົກກະຕິ, ຍົກສູງຄວາມຮັບຜິດຕໍ່ໜ້າທີ່ການເມືອງທີ່ໄດ້ຮັບມອບໝາຍ, ເພີ່ມທະວີຄວາມເປັນແບບຢ່າງນຳໜ້າທຸກດ້ານ ແລະ ຍົກສູງສະຕິຕໍ່ການຈັດຕັ້ງ, ເປັນເຈົ້າການປະຕິບັດລະບຽບຂອງກຳລັງຢ່າງເຂັ້ມງວດ; ຕ້ອງປະຕິບັດຫຼັກການລວມສູນປະຊາທິປະໄຕຢ່າງເຂັ້ມງວດ, ຖືຄວາມເປັນເອກະພາບພາຍໃນຄະນະເປັນບັນຫາສຳຄັນຕັດສິນວຽກງານ; ເອົາໃຈໃສ່ປັບປຸງແບບແຜນນຳພາ ແລະ ແບບແຜນວິທີເຮັດວຽກໃຫ້ມີຄຸນນະພາບ, ມີການແບ່ງງານມອບໝາຍໃນໝູ່ຄະນະຢ່າງຈະແຈ້ງ, ມີແຜນການ, ແຜນງານໃນແຕ່ລະໄລຍະທັງຕິດຕາມກວດກາ, ຖອດຖອນບົດຮຽນເປັນປົກກະຕິ; ສືບຕໍ່ຮັບປະກັນໃຫ້ເມືອງໄຊທານີ ມີຄວາມສະຫງົບ-ປອດໄພຢ່າງ ໜັກແໜ້ນ ຕ້ອງຫັນກຳລັງລົງກໍ່ສ້າງຮາກຖານການເມືອງຕິດພັນກັບການສ້າງບ້ານ-ກຸ່ມບ້ານພັດທະນາຕາມທິດ 3 ສ້າງຢູ່ພື້ນທີ່ຫຼ່ໍແຫຼມ.
ພ້ອມທັງສືບຕໍ່ຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດລະອຽດ ແລະ ທັງກວດກາຄືນແຕ່ລະດ້ານໃນ 6 ວຽກ ຈຸດສຸມຂອງແຜນດຳເນີນງານວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ, ກອງບັນຊາການຕ້ອງເປັນເສນາທິການດ້ານວິຊາສະເພາະໃຫ້ປະ ທານ, ຮອງປະທານ, ຄະນະກໍາມະການ ປກຊ-ປກສ ນະຄອນຫຼວງໃນການຕິດຕາມ, ກໍາແໜ້ນສະພາບຮອບດ້ານ ໂດຍມີປະສານສົມທົບແລກ ປ່ຽນຂໍ້ມູນກັບພາກສ່ວນກ່ຽວຂ້ອງ, ແຕ່ລະບັນຫາຕ້ອງມີແຜນ, ມີມາດຕະການ, ສາມາດນຳສະເໜີຂໍທິດໃນການແກ້ໄຂແຕ່ລະບັນຫາໃຫ້ທັນການ.
ພາບ-ຂ່າວ: ສິລິພອນ
