ເນື່ອງໃນໂອກາດທີ່ກະຊວງປ້ອງກັນຄວາມສະຫງົບ ກະກຽມຄວາມພ້ອມດ້ານຕ່າງໆ ໃຫ້ແກ່ການດໍາເນີນກອງປະຊຸມໃຫຍ່ຜູ້ແທນຂອງອົງຄະນະພັກກະຊວງ ຄັ້ງທີ VI ໄດ້ສໍາເລັດໂດຍພື້ນຖານ ແລະ ເພື່ອຈະກ້າວເຂົ້າສູ່ວາລະການດໍາເນີນກອງປະຊຸມໃຫຍ່ຢ່າງເປັນທາງການ ໃນລະຫວ່າງວັນທີ 5-6 ສິງຫາ 2025.
ໃນຕອນເຊົ້າຂອງວັນທີ 5 ສິງຫາ 2025, ການນໍາກະຊວງປ້ອງ ກັນຄວາມສະຫງົບ ນໍາໂດຍ ສະຫາຍ ພົອ ວິໄລ ຫຼ້າຄຳຟອງ ກຳມະການກົມການເມືອງສູນກາງພັກ ຄະນະເລຂາທິການສູນກາງພັກ ເລຂາຄະນະພັກ, ລັດຖະມົນຕີກະຊວງປ້ອງກັນຄວາມສະຫງົບ ໄດ້ເຂົ້າວາງພວງມາລາຢູ່ທີ່ອານຸສາວະລີນັບຮົບນິລະນາມ (ດາວແດງ) ແລະ ວາງກະຕ່າດອກໄມ້ຢູ່ໜ້າຮູບປັ້ນຫຼໍ່ຂອງ ປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກຂອງປວງຊົນລາວທັງຊາດ ຢູ່ທີ່ຫໍພິພິທະພັນປະທານ ໄກສອນ ພົມວິຫານ (ຫຼັກ 6).
ການວາງພວງມາລາ ແລະ ວາງກະຕ່າດອກໄມ້ຂອງການນໍາກະຊວງປ້ອງກັນຄວາມສະຫງົບຄັ້ງນີ້ ເພື່ອສະແດງຄວາມເຄົາລົບຮັກ, ຄວາມກະຕັນຍູຮູ້ບຸນຄຸນເຖິງຄຸນງາມຄວາມດີ, ນໍ້າໃຈຕໍ່ສູ້ຢ່າງພິລະອາດຫານ ແລະ ບໍ່ຍອມຈຳນົນຂອງບັນພະບູລຸດ ກໍຄືບັນດານັກຮົບປະຕິວັດທີ່ເສຍສະຫຼະຊີວິດ, ເລືອດເນື້ອ ເພື່ອພາລະກິດປະຕິວັດຢ່າງພິລະອາດຫານ ເວົ້າສະເພາະ ກໍຄື ນັກຮົບປະຕິວັດທີ່ເສຍສະຫຼະຊີວິດ, ເລືອດເນື້ອ ເພື່ອດິນແດນອັນຄົບຖ້ວນ ແລະ ປະຊາຊົນຢ່າງອົງອາດກ້າຫານ ພາຍໃຕ້ການນຳພາ-ຊີ້ນໍາ ອັນສະ ຫຼາດສ່ອງໃສຂອງພັກປະຊາຊົນປະຕິ ວັດລາວ ຈົນສາມາດຍາດໄດ້ໄຊຊະນະອັນໃຫຍ່ຫຼວງ ແລະ ປະກາດເອກະລາດ, ສະຖາປະ ນາເປັນ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນຢ່າງສະຫງ່າຜາເຜີຍ ໃນວັນທີ 2 ທັນວາ 1975 ເຊິ່ງຄຸນງາມຄວາມດີອັນໃຫຍ່ຫຼວງນັ້ນໄດ້ຖືກຈາລຶກໄວ້ໃນຊີວິດຈິດໃຈຂອງປະຊາຊົນຊາວລາວທັງຊາດຕະຫຼອດໄປ ແລະ ເພື່ອສະແດງຄວາມເຄົາລົບຮັກ, ກະຕັນ ຍູ-ຮູ້ບຸນຄຸນ ແລະ ສະດຸດີຕໍ່ຊື່ສຽງຮຽງນາມ, ຄຸນງາມຄວາມດີ ແລະ ຜົນງານອັນໃຫຍ່ຫຼວງຂອງປະທານ ໄກສອນ ພົມວິຫານ ທີ່ໄດ້ອຸທິດຕະຫຼອດຊີວິດ ເພື່ອພາລະກິດຕໍ່ສູ້ຍາດເອົາເອກະລາດແຫ່ງຊາດ, ອິດສະຫຼະພາບມາໃຫ້ປະຊາຊົນລາວບັນດາເຜົ່າ ທັງເປັນຜູ້ໃຫ້ກໍາເນີດ, ເອົາໃຈໃສ່ສຶກສາອົບຮົມ, ທະນຸບໍາລຸງ, ຝຶກຝົນຫຼໍ່ຫຼອມ ກໍາລັງປ້ອງກັນຄວາມສະຫງົບລາວ ໃຫ້ນັບມື້ນັບເຕີບໃຫຍ່ເຂັ້ມແຂງຕະຫຼອດມາ.
