ກອງປະຊຸມລະຫວ່າງຄະນະເຈົ້າໜ້າທີ່ອາວຸໂສຂອງກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ ບັນດາຄະນະເຈົ້າໜ້າທີ່ອາວຸໂສຈາກກະຊວງພາຍໃນ ແຫ່ງ ຣາຊະອານາຈັກກຳປູເຈຍ ເພື່ອກະກຽມຄວາມພ້ອມທາງດ້ານເນື້ອໃນ ໃຫ້ແກ່ກອງປະຊຸມລະດັບລັດຖະມົນຕີ ຫຼື ກອງປະ ຊຸມວ່າດ້ວຍການຮ່ວມມືສອງຝ່າຍ ລະຫວ່າງ ກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ ກະຊວງພາຍໃນ ແຫ່ງ ຣາຊະອານາຈັກກຳ ປູເຈຍ ປະຈໍາປີ 2023, ໄດ້ຈັດຂຶ້ນໃນຕອນບ່າຍຂອງວັນທີ 18 ມີນາ ນີ້, ຢູ່ທີ່ໂຮງແຮມແລນມາກ ນະຄອນຫຼວງວຽງຈັນ, ໂດຍການເປັນປະ ທານ ຮ່ວມຂອງ ທ່ານ ພົນໂທ ກົງທອງ ພົງວິຈິດ ກຳມະການສູນກາງພັກ ຮອງລັດຖະມົນຕີ ຫົວໜ້າຄະນະເຈົ້າໜ້າທີ່ອາວຸໂສ ກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ ທ່ານ ພົນເອກ ງິ ຈັນພອນ ຮອງລັດຖະມົນຕີ ຫົວໜ້າຄະນະເຈົ້າໜ້າທີ່ອາວຸໂສ ກະຊວງພາຍໃນແຫ່ງຣາຊະອານາຈັກກຳປູເຈຍ, ພ້ອມດ້ວຍບັນດາຄະນະເຈົ້າໜ້າທີ່ອາວຸໂສຂອງທັງສອງຝ່າຍເຂົ້າຮ່ວມ.
ກອງປະຊຸມຮ່ວມກັນລະຫວ່າງບັນດາຄະນະເຈົ້າໜ້າທີ່ອາວຸໂສຂອງກະຊວງປ້ອງກັນຄວາມສະຫງົບລາວ ແລະ ກະຊວງພາຍໃນກຳປູເຈຍ ໃນຄັ້ງນີ້ ແມ່ນໄດ້ຮ່ວມກັນປຶກ ສາຫາລື, ຄົ້ນຄວ້າ, ທົບທວນຄືນບັນດາຄວາມພ້ອມທາງດ້ານເນື້ອໃນ ແລະ ພິຈາລະ ນາຮ່າງບົດບັນທຶກ ວ່າດ້ວຍການຮ່ວມມືສອງຝ່າຍ ປະຈຳປີ 2023 ເຊັ່ນ: ທົບທວນຄືນບັນດາຜົນສຳເລັດໃນການພົວພັນຮ່ວມມືລະຫວ່າງເຈົ້າໜ້າທີ່ ທີ່ກ່ຽວຂ້ອງຂອງສອງກະ ຊວງ ແລະ ບັນດາແຂວງທີ່ມີຊາຍແດນຕິດຈອດກັນຂອງສອງປະເທດ ໃນການຈັດຕັ້ງຜັນຂະຫຍາຍ ແລະ ຈັດຕັ້ງປະຕິບັດບັນດາແຜນການຮ່ວມມືຕ່າງໆ ທີ່ຄະນະຜູ້ແທນຂັ້ນສູງຂອງສອງກະຊວງ ໄດ້ມີການຕົກລົງຮັບຮອງເອົາ ແລະ ລັດຖະ ມົນຕີຂອງທັງສອງກະຊວງ ໄດ້ລົງນາມຮ່ວມກັນເອົາໄວ້ໃນປີ 2021 ຜ່ານມາ.
ພ້ອມທັງຮ່ວມກັນພິຈາລະນາກ່ຽວກັບເນື້ອໃນຂອງແຜນການຕ່າງໆທີ່ທັງສອງກະ ຊວງ ຈະສືບຕໍ່ຮ່ວມມືກັນຈັດຕັ້ງປະຕິບັດໃນປີ 2023; ເປັນຕົ້ນແມ່ນການຮ່ວມມືຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຕາມຊາຍແດນ, ການຮ່ວມມືໃນການກວດກາ ແລະ ຄວບຄຸມຢາເສບຕິດ, ການຮ່ວມມືດ້ານການຕ້ານການຄ້າມະນຸດ, ການຮ່ວມມືຮັກສາຄວາມສະຫງົບ ແລະ ຄວາມເປັນລະບຽບຮຽບ ຮ້ອຍຕາມບໍລິເວນຊາຍແດນ ແລະ ການຂ້າມຊາຍແດນ, ການຮ່ວມມືໃນການສະກັດກັ້ນ ແລະ ຕ້ານອາຊະຍາກໍາທາງໂທລະຄົມ ແລະ ຄອມພິວເຕີ, ການຮ່ວມມືແລກ ປ່ຽນການຢ້ຽມຢາມຂອງຄະນະຜູ້ແທນ, ການຮ່ວມມືດ້ານການກໍ່ສ້າງກໍາລັງ ແລະ ການຮ່ວມມືດ້ານອື່ນໆ ເພື່ອໃຫ້ມີຄວາມຖືກຕ້ອງ, ສອດຄ່ອງ ກັບແນວທາງການຕ່າງປະເທດຂອງສອງປະເທດ ແລະ ເຮັດໃຫ້ຫມາກຜົນຂອງການພົວພັນຮ່ວມມືລະຫວ່າງສອງກະຊວງໃນຕໍ່ໜ້ານີ້ ສາມາດຮັບປະກັນເຮັດໃຫ້ສອງປະເທດ ຄືລາວ ແລະ ກຳປູເຈຍ ມີຄວາມສະຫງົບ, ປອດໄພ ແລະ ສາມາດສ້າງເງື່ອນໄຂທີ່ເອື້ອອຳ ນວຍໃຫ້ແກ່ການສ້າງສາພັດທະນາໃຫ້ແກ່ທັງສອງປະເທດ.
ແຕ່ລະບັນຫາທີ່ຄະນະເຈົ້າໜ້າທີ່ອາວຸໂສຂອງທັງສອງກະຊວງ ໄດ້ຄົ້ນຄວ້າ ແລະ ມີຄວາມເຫັນດີເປັນເອກະພາບກັນໃນກອງປະຊຸມຄັ້ງນີ້ ຈະໄດ້ນຳເອົາເຂົ້າໄປໃຫ້ຄະນະຜູ້ແທນຂັ້ນສູງຂອງກະຊວງປ້ອງກັນຄວາມສະຫງົບລາວ, ກະຊວງພາຍໃນກຳປູເຈຍ ແລະ ບັນດາຄະນະຜູ້ແທນປ້ອງກັນຄວາມສະຫງົບແຂວງທີ່ມີຊາຍແດນຮ່ວມກັນຂອງສອງປະເທດ ພິຈາລະນາຮັບຮອງເອົາຢ່າງເປັນທາງການ ຢູ່ໃນກອງປະຊຸມລະດັບລັດຖະມົນຕີ ຫຼື ກອງປະຊຸມວ່າດ້ວຍການຮ່ວມມືສອງຝ່າຍ ທີ່ກະຊວງປ້ອງກັນຄວາມສະຫງົບ ສປປ ລາວ ຈະເປັນເຈົ້າພາບຈັດຂຶ້ນໃນວັນທີ 19 ມີນາ 2023.
ພາບ-ຂ່າວ: ບຸນເຫຼືອ
