ຕອນເຊົ້າທີ 18 ມີນາ 2023 ທີ່ນະຄອນຫຼວງວຽງຈັນ ສປປ ລາວ, ບັນດາເຈົ້າໜ້າທີ່ກອງເລຂາຄະນະກະກຽມຄວາມພ້ອມລ່ວງໜ້າຂອງກະ ຊວງປ້ອງກັນຄວາມສະຫງົບ ສປປ ລາວ ແລະ ກະຊວງພາຍໃນ ຣາຊະອານາຈັກກຳປູ ເຈຍ, ໄດ້ປະຊຸມຮ່ວມກັນ ເພື່ອຮັບຟັງການລາຍງານສະ ພາບ ແລະ ການກະກຽມຄວາມພ້ອມຮອບດ້ານ ໃຫ້ແກ່ກອງປະຊຸມ ວ່າດ້ວຍການຮ່ວມມືສອງຝ່າຍປະຈຳປີ 2023 ລະຫວ່າງ ກະຊວງປ້ອງກັນຄວາມສະຫງົບ ສປປ ລາວ ແລະ ກະຊວງພາຍໃນ ແຫ່ງ ຣາຊະອານາຈັກກຳປູເຈຍ, ທີ່ກະຊວງປ້ອງກັນຄວາມສະຫງົບລາວ ເປັນເຈົ້າພາບໃນລະ ຫວ່າງວັນທີ 17-20 ມີນາ 2023, ເຂົ້າຮ່ວມເປັນປະທານໂດຍ ພັນເອກ ກີ້ ຈັນທະວົງສາ ຫົວໜ້າກົມພົວພັນຕ່າງປະເທດ ຫ້ອງວ່າການກະຊວງປ້ອງກັນຄວາມສະຫງົບລາວ ແລະ ພົນໂທ ພາດ ສຸພະນິດ ຫົວໜ້າກົມພົວພັນຕ່າງປະເທດ ກະຊວງພາຍໃນກຳປູເຈຍ.
ພັນເອກ ກີ້ ຈັນທະວົງສາ ໄດ້ລາຍງານໃຫ້ຮູ້ວ່າ: ປັດຈຸບັນ, ກະຊວງປ້ອງກັນຄວາມສະຫງົບລາວ ແມ່ນມີຄວາມພ້ອມຮອບດ້ານໃນການເປັນເຈົ້າພາບຈັດກອງປະຊຸມ ວ່າດ້ວຍການຮ່ວມມືສອງຝ່າຍ ປະຈຳປີ 2023 ລະຫວ່າງ ກະຊວງປ້ອງກັນຄວາມສະຫງົບລາວ ແລະ ກະຊວງພາຍໃນກຳປູ ເຈຍ ໃນລະຫວ່າງວັນທີ 17 ຫາ 20 ມີນາ 2023 ນີ້; ເປັນຕົ້ນແມ່ນ ຄວາມພ້ອມທາງດ້ານວຽກງານປ້ອງກັນຄວາມສະຫງົບ, ຄວາມປອດໄພ ແລະ ການອຳນວຍຄວາມສະ ດວກ ໃຫ້ກັບການນຳກະຊວງ ແລະ ຄະນະຜູ້ແທນ ກະ ຊວງພາຍໃນກຳປູເຈຍ ໃນການພັກເຊົາ ແລະ ການເຄືອນໄຫວຕ່າງໆ, ຄວາມພ້ອມທາງດ້ານພິທີການ ແລະອື່ນໆ.
ຫຼັງຈາກນັ້ນ; ທັງສອງຝ່າຍກໍໄດ້ປຶກສາຫາລື, ພ້ອມທັງ ເຫັນດີເປັນເອກະພາບຕໍ່ບັນຫາຕ່າງໆ ແລະ ໃຫ້ຄໍາຢືນຢັນຮ່ວມກັນວ່າ ທັງສອງຝ່າຍພ້ອມທີ່ໃຫ້ຄວາມຮ່ວມມື ແລະ ປະສານສົມທົບກັນ ເພື່ອເຮັດໃຫ້ການປະຕິບັດແຜນການຕ່າງໆ ມີຄວາມສະດວກ, ມີຄວາມຮັບປະກັນ ແລະ ສຳເລັດຕາມຄາດໝາຍ.
ພາບ-ຂ່າວ: ຄຳໂຖ
