ໃນວັນທີ 11 ກຸມພາ 2025, ອົງຄະນພັກ ກອງບັນຊາການປ້ອງກັນຄວາມສະຫງົບແຂວງ ສາລະວັນ ສໍາເລັດການດໍາເນີນກອງປະຊຸມໃຫຍ່ຜູ້ແທນ ຄັ້ງທີ V ພາຍຫຼັງດຳເນີນເປັນ 1 ວັນ, ໂດຍການເປັນປະທານຂອງ ສະຫາຍ ພົຈວ ສີເສີດ ສອນດາລາ ກຳມະການພັກແຂວງ ເລຂາອົງຄະນະພັກ ຫົວໜ້າກອງບັນຊາການປ້ອງກັນຄວາມສະຫງົບແຂວງ, ເປັນກຽດເຂົ້າ ຮ່ວມໂດຍ ສະຫາຍ ດາວວົງ ພອນແກ້ວ ກຳມະການສູນກາງພັກ ເລຂາພັກ-ເຈົ້າແຂວງສາລະວັນ ປະທານປ້ອງກັນຄວາມສະຫງົບຂັ້ນແຂວງ, ສະຫາຍ ແຫວນເພັດ ລັດດາວົງ ຄະນະປະຈໍາພັກແຂວງ ຫົວໜ້າຄະນະຈັດຕັ້ງແຂວງ, ສະຫາຍ ພົຕ ປອ ສຸວັນນີ ສີສຸພາບມີໄຊ ຫົວໜ້າກົມໃຫຍ່ການເມືອງປ້ອງກັນຄວາມສະຫງົບ, ມີບັນດາສະຫາຍຄະນະປະຈໍາພັກ-ຄະນະພັກກອງບັນຊາການ ປກສ ພ້ອມດ້ວຍສະມາຊິກພັກ ເຂົ້າຮ່ວມ.
ສະຫາຍ ພົຈວ ສີເສີດ ສອນດາລາ ໄດ້ກ່າວໄຂກອງປະຊຸມ ພ້ອມທັງຜ່ານຮ່າງລາຍງານການເມືອງທັງສອງພາກ ໂດຍໄດ້ຕີລາຄາຜົນຂອງການຈັດຕັ້ງປະຕິບັດວຽກງານ ຂອງອົງຄະນະພັກກອງບັນຊາການ ປກສ ແຂວງ ໃນໄລຍະຜ່ານມາ, ໄດ້ເອົາໃຈໃສ່ຈັດຕັ້ງຜັນຂະຫຍາຍມະ ຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ V ຂອງຄະນະບໍລິ ຫານພັກກະຊວງ ປ້ອງກັນຄວາມສະຫງົບ, ມະຕິກອງປະຊຸມໃຫຍ່ ຄັ້ງທີ IX ຂອງຄະນະບໍລິ ຫານງານພັກແຂວງ ແລະ ມະຕິກອງ ປະຊຸມໃຫຍ່ ຄັ້ງທີ IV ຂອງຄະນະພັກກອງບັນຊາ ການ ປກສ ແຂວງ ໄດ້ຮັບຜົນຫຼາຍດ້ານເປັນຕົ້ນ: ໄດ້ປະຕິບັດ 4 ຄາດໝາຍ 4 ແຜນງານໃຫຍ່ ແລະ 41 ໂຄງການທີ່ຄະນະບໍລິຫານງານພັກກະຊວງປ້ອງກັນຄວາມສະຫງົບວາງອອກ. ພ້ອມທັງ ຍົກໃຫ້ເຫັນບັນດາຜົນສຳເລັດ ທີ່ຄະນະພັກຍາດມາໄດ້ ໂດຍສະເພາະໄດ້ປັບປຸງກົງຈັກການຈັດຕັ້ງ, ບຸກຄະລະກອນ ສ້າງ ແລະ ປັບປຸງບັນດານິຕິກຳ, ປັບປຸງຕາໜ່າງກໍາລັງປິດລັບ, ຈັດຕັ້ງປະຕິບັດບັນດາໂຄງການ, ກິດຈະກຳທີ່ ກ່ຽວຂ້ອງເຖີງວຽກງານວິຊາສະເພາະຂອງບັນດາເຫຼົ່າວິຊາສະເພາະ, ຄຸ້ມຄອງ ແລະ ນໍາໃຊ້ບັນດາເຕັກນິກວິຊາ ສະເພາະເຂົ້າໃນວຽກງານສືບຄົ້ນຫາ, ເພື່ອຕ້ານ ແລະ ສະກັດກັ້ນບັນດາກົນອຸບາຍ ແລະ ການເຄື່ອນ ໄຫວຂອງບັນດາ ອິດທິກຳລັງປໍລະປັກ, ກຸ່ມຄົນບໍ່ຫວັງດີຢູ່ພາຍໃນ ແລະ ຕ່າງປະເທດ.
ນອກນີ້, ຍັງໄດ້ໄດ້ສຸມໃສ່ວຽກງານແກ້ໄຂປະກົດການຫຍໍ້ທໍ້ໃນສັງຄົມ ເປັນຕົ້ນແມ່ນວຽກ ງານສືບຂ່າວອາຍາກຳສະພາບການ, ດໍາເນີນການສືບຄົ້ນຫາ, ວຽກງານຊັນນະສູດລະແວງສົງໃສ, ວຽກງານກໍ່ສ້າງ ແລະ ນຳໃຊ້ຕາໜ່າງປິດລັບ ກຳນົດຟື້ນທີ່, ເປົ້າໝາຍຄຸ້ມຄອງຕິດ ຕາມປະເພດຕ່າງໆ ໃນຂອບເຂດທົ່ວແຂວງ. ໃນໄລຍະ 05 ປີຜ່ານມາ, ມີຄະດີເກີດຂຶ້ນທັງໝົດ 300 ເລື່ອງ, ສາມາດແກ້ໄຂໄດ້ 151 ເລື່ອງ; ວຽກງານຕໍຳຫຼວດຈາລະຈອນໄດ້ປະຕິບັດແຜນການຫຼຸດຜ່ອນອຸປະຕິເຫດ, ແກ້ໄຂສະພາບຈະລາຈອນແອອັດ ດ້ວຍການລົງໂຄສະນາປ້ອງກັນ ອຸປະຕິເຫດ 158 ຄັ້ງ, ມີຜູ້ເຂົ້າຮ່ວມ 4.831.212 ເທື່ອຄົນ, ຄະດີອຸປະຕິເຫດເກີດຂຶ້ນທັງໝົດ 802 ລາຍ, ພາຫະນະເປເພ 1.803 ຄັນ, ຄົນໄດ້ຮັບບາດເຈັບ 1.306 ຄົນ, ເສຍຊີວິດ 137 ຄົນ, ມູນຄ່າເສຍຫາຍ 20.375.865.000 ກີບ. ນອກນີ້, ຍັງໄດ້ເອົາໃຈໃສ່ໂຄສະນາວຽກງານຕ້ານອັກຄີໄພ 25 ຄັ້ງ, ຜູ້ເຂົ້າຮ່ວມ 876 ຄົນ. ຜ່ານມາ, ມີອັກຄີໄພເກີດຂຶ້ນທັງໝົດ 56 ຄັ້ງ, ມູນຄ່າເສຍຫາຍທັງໝົດ 47.361.085.000 ກີບ. ພິ ເສດແມ່ນໄດ້ແກ້ໄຂຂໍ້ຂັດແຍ່ງກັນກ່ຽວກັບບັນຫາທີ່ດິນລະຫວ່າງປະຊາຊົນ ກັບຜູ້ສໍາປະ ທານຢູ່ບ້ານໜອງບົວນ້ອຍ ແລະ ການສຳປະທານສວນກ້ວຍຈີນ ຢູ່ບ້ານຫາງພູວຽງຄໍາ ເມືອງສາລະວັນ ເຫັນວ່າມີຄວາມສະຫງົບ ແລະ ຄວາມເປັນລະບຽບຮຽບຮ້ອຍດີ.
ໃນກອງປະຊຸມ, ຍັງໄດ້ຜ່ານບົດສຳຫຼວດການນຳພາລວມຂອງຄະນະພັກກອງບັນຊາການ ປກສ ແຂວງຊຸດເກົ່າ, ຜ່ານມາດຖານເງື່ອນໄຂຜູ້ສະໝັກເລືອກຕັ້ງຄະນະພັກຊຸດໃໝ່, ເຊີ່ງມີຜູ້ສະໝັກທັງໝົດ 13 ສະຫາຍ, ເລືອກເອົາ 11 ສະຫາຍ, ຜ່ານການດຳເນີນການປ່ອນບັດຄັດເລືອກເອົາຄະນະພັກຊຸດໃໝ່ ແລະ ຜົນຂອງກອງປະຊຸມຄັ້ງປະຖົມມະລຶກໄດ້ເຫັນດີຄັດ ເລືອກເອົາ ສະຫາຍ ພົຈວ ສີເສີດ ສອນດາລາ ເປັນເລຂາຄະນະພັກ, ສະຫາຍ ພັອ ແພງສີ ໄຊຍະເພັດ ເປັນຮອງເລຂາຄະນະພັກ, ສະຫາຍ ພັອ ເອກະລາດ ແທ່ງສົມບັດ ເປັນປະທານກວດກາ ແລະ ອີກ 8 ສະຫາຍ ເປັນຄະນະພັກ. ສ່ວນຜູ້ແທນສົມບູນທີ່ໄດ້ເຂົ້າຮ່ວມ ກອງປະຊຸມໃຫຍ່ຂອງອົງຄະນະພັກແຂວງ ຄັ້ງທີ X ມີທັງໝົດ 15 ສະຫາຍ ແລະ ຜູ້ແທນສຳຮອງ 3 ສະຫາຍ.
