ຕອນເຊົ້າວັນທີ 12 ກຸມພາ 2025 ກົງກັບວັນພຸດ ຂຶ້ນ 15 ຄໍ່າເດືອນ 3 (ວັນບຸນມາຄະບູຊາ) ພສ 2566, ທ່ານ ພົນເອກ ວິໄລ ຫຼ້າຄຳຟອງ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີແຫ່ງ ສປປ ລາວ ລັດຖະມົນຕີກະຊວງປ້ອງກັນຄວາມສະຫງົບ, ທ່ານ ປ້ານາລີ ສີສຸລິດ ພັນລະຍາ ເລຂາທິການໃຫຍ່ ປະທານປະເທດ ແຫ່ງ ສປປ ລາວ, ທ່ານ ນາງ ສວນສະຫວັນ ວິຍະເກດ ກໍາມະການສູນກາງພັກ ລັດຖະມົນຕີກະຊວງຖະແຫຼງຂ່າວ,ວັດທະນະທຳ ແລະ ທ່ອງທ່ຽວ,ທ່ານ ອາລຸນໄຊ ສູນນະລາດ ເຈົ້າແຂວງຈໍາປາສັກ ພ້ອມດ້ວຍພັນລະຍາ ແລະ ການນໍາຈາກສູນກາງ, ການນໍາແຂວງ, ການນໍາເມືອງຈໍາປາສັກ ໄດ້ຮ່ວມກັບ ຊາວພຸດພາຍໃນແຂວງຈໍາປາສັກ, ຕ່າງແຂວງ ແລະ ຕ່າງປະເທດ ທີ່ເຫຼື້ອມໃສໃນພຸດທະສາສະໜາ ມາຮ່ວມກັນທຳບຸນຕັກບາດຖວາຍເຄື່ອງໄຊຍະທານຕ່າງໆທີ່ສະຖານບູຮານວັດພູຈຳປາສັກ ມໍລະລົກໂລກ ແຫ່ງທີສອງຂອງລາວ.
ໃຫ້ຄວາມເມດຕາເຂົ້າຮ່ວມ ເປັນປະທານຝ່າຍສົງຂອງ ພຣະອາຈານໃຫຍ່ ມະຫາສຸວັນ ຈັນທະລາດ ປະທານອົງການພຸດທະສາສະໜາສໍາພັນລາວ (ອພສ) ແຂວງຈໍາປາສັກ ພ້ອມດ້ວຍ ຄະນະ ອພສ ຈາກສູນກາງ, ຄະນະ ອພສ ແຂວງ, ຄະນະ ອພສ ນະຄອນປາກເຊ, ຄະນະ ອພສ ບັນດາເມືອງ, ພຣະເຖລານຸເຖລະ.
ຝ່າຍຄາລະວາດ ໃຫ້ກຽດເຂົ້າຮ່ວມໂດຍມທ່ານ ພົນເອກ ວິໄລ ຫຼ້າຄຳຟອງ ຮອງນາຍົກລັດຖະມົນຕີແຫ່ງ ສປປ ລາວ, ທ່ານ ນາງ ນາລີ ສີສຸລິດ ພັນລະຍາ ເລຂາທິການໃຫຍ່ ປະ ທານປະເທດ ແຫ່ງ ສປປ ລາວ, ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫຼງຂ່າວ,ວັດທະນະທຳ ແລະ ທ່ອງທ່ຽວ,ທ່ານ ອາລຸນໄຊ ສູນນະລາດ ເຈົ້າແຂວງຈໍາປາສັກ ພ້ອມດ້ວຍພັນລະຍາ, ທ່ານ ສາຍທອງ ໄຊຍະວົງ ຮອງເລຂາພັກແຂວງ ປະທານສະພາປະຊາຊົນແຂວງ, ທ່ານ ສະນັ່ນ ສີພາພົມມະຈັນ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ, ທ່ານ ສະຫວາດ ແກ້ວບັນດິດ ເຈົ້າເມືອງຈຳປາສັກ, ບັນດາທ່ານການນຳຂອງແຂວງ, ເມຶອງ, ພະແນກການກົມກອງອ້ອມຂ້າງແຂວງ, ອອກຕົນຍາດໂຍມຊາວພຸດ ແລະ ນັກທ່ອງທ່ຽວເຂົ້າຮ່ວມຢ່າງຫຼວງຫຼາຍ.
ໃນພິທີ, ທ່ານ ພົນເອກ ວິໄລ ຫຼ້າຄຳຟອງ ຮອງນາຍົກລັດຖະມົນຕີແຫ່ງ ສປປ ລາວ ໃຫ້ ກຽດຂຶ້ນໄຕ້ທຽນໄຊ ໄຫວ້ພະລັດຕະນະໄຕ, ທ່ານ ອາລຸນໄຊ ສູນນະລາດ ເຈົ້າແຂວງຈໍາປາສັກ ລັ່ນຄ້ອງ 9 ບາດ. ຈາກນັ້ນ, ພຣະອາຈານໄດ້ນຳພາຄະນະສົງຈຳນວນ 390 ກ່ວາອົງ ແລະ ອອກຕົນຍາດໂຍມທັງຫຼາຍດຳເນີນພິທີທາງສາສະໜາ ໄຫວ້ພຣະຣັດຕະນະໄຕ, ກ່າວຄຳຖວາຍປັດໄຈ, ລາດທະນາສິນ,ຢາດນໍ້າໃຫ້ພອນແກ່ອອກຕົນຍາດຍົມ,ຈາກນີ້ ອອກຕົນຍາດໂຍມກໍໄດ້ໃສ່ບາດຖວາຍປັດໄຈທານ ແດ່ພະສົງ, ຂື້ນຂາບໄຫວ້ຂໍພອນຈາກສິ່ງສັກສິດ ທີ່ສະຖານບູຮານວັດພູບາສີສູ່ຂັວນຕາມຄວາມເຊື່ອ ຕາມຈິດໃຈໃສສັດທາຂອງຕົນ.
ການທຳບຸນຕັກບາດທີ່ສະຖານບູຮານວັດພູຈຳປາສັກ ນອກຈາກເປັນການສືບທອດຮີດຄອງປະເພນີວັດທະນະທຳອັນດີງາມຂອງຊາດ ທີ່ຊາວເມືອງ ກໍຄືແຂວງ ຈຳປາສັກສືບທອດມາແຕ່ບູຮານນະການໃຫ້ຄຽງຄູຢູ່ກັບຄົນລາວຕະຫຼອດໄປແລ້ວ ຍັງເປັນການສະເຫຼີມສະຫຼອງເປີດປີທ່ອງທ່ຽວລາວ. ພ້ອມນັ້ນ, ຍັງເປັນການອຸທິດສ່ວນບຸນກຸສົນ ເພື່ອເປັນສີລິມົງຄຸນໃຫ້ແກ່ບັນພະບູລຸດ, ຜູ້ມີພະຄຸນ ຕະຫຼອດສັບພະສັດທັງຫຼາຍ ແລະ ຍັງເປັນການເຜີຍແຜ່ວັດ ທະນະທຳ ແລະ ດຶງດູດນັກທ່ອງທ່ຽວໃຫ້ສົນໃຈເຂົ້າມາທ່ອງທ່ຽວຊົມວັດພູມໍລະດົກໂລກແຫ່ງທີ 2 ຂອງລາວໃຫ້ນັບມື້ຫຼາຍຂຶ້ນ.
ໃນພິທີດັ່ງກ່າວ, ພຣະອາຈານໃຫຍ່ ມະຫາສຸວັນ ຈັນທະລາດ ໄດ້ເທສະໜາແດ່ອອກຕົນຍາດໂຍມໃນໂອກາດບຸນວັດພູ ແລະ ບຸນມາຄະບູຊາປີນີ້ໃຫ້ຍຶດໜັ້ນໃນການທຳຄວາມດີ, ພ້ອມກັນຮັກສາສິນ ແລະ ຈະເລີນເດີນຕາມຄຳສັ່ງສອນຂອງອົງສຳມາສຳພຸດທະເຈົ້າ ທັງເປັນເຈົ້າການປົກປັກຮັກສາຮີດຄອງປະເພນີ ວັດທະນະທຳອັນດີງາມຂອງຊາດ ນີ້ໄວ້ຕະຫຼອດໄປ.
