ຫ້ອງການກວດກາ ແລະ ຄວບຄຸມຢາເສບຕິດ ກົມໃຫຍ່ຕໍາຫຼວດ ກະຊວງ ປກສ ໄດ້ຈັດກອງປະຊຸມປຶກສາຫາລື ແລະ ແລກປ່ຽນຄໍາຄິດເຫັນກ່ຽວກັບການຄວບຄຸມສານເຄມີ ໃນວັນທີ 16 ມີນາ 2023, ເປັນປະທານໂດຍ ພົຕ ຄໍາກິ່ງ ຜຸຍຫຼ້າມະນີວົງ ຮອງລັດຖະມົນຕີ ຫົວໜ້າກົມໃຫຍ່ຕໍາຫຼວດ ກະຊວງປ້ອງກັນຄວາມສະຫງົບ, ມີບັນດາກະຊວງ ແລະ ກົມກອງອ້ອມຂ້າງກົມໃຫຍ່ຕໍາຫຼວດ ເຂົ້າຮ່ວມ.
ພັອ ສາລີ ພຸດທະວົງ ຫົວໜ້າກົມສະກັດກັ້ນ ແລະ ຕ້ານຢາເສບຕິດ ກົມໃຫຍ່ຕຳຫຼວດ ກະຊວງ ປກສ ກ່າວວ່າ: ການຈັດກອງປະຊຸມປຶກສາຫາ ລືສ້າງກົນໄກການປະສານງານຮ່ວມມືດ້ານວິຊາການ ເພື່ອແນໃສ່ການກວດກາຄວບຄຸມການນໍາເຂົ້າສານເຄມີໃຫ້ມີຄວາມຮັດກຸມ ແລະ ໄດ້ມືການແລກປ່ຽນດ້ານຂໍ້ມູນນໍາກັນເປັນໄລຍະ. ເຖິງຢ່າງໃດກໍຕາມ, ອີງຕາມການເກັບກຳຂໍ້ມູນນຳເຂົ້າ, ສົ່ງອອກ ແລະ ການນໍາໃຊ້ສານເຄມີ; ເຊິ່ງຕິດພັນກັບຫຼາຍຂົງເຂດ ໂດຍສະເພາະແມ່ນຂົງເຂດສາທາລະນະສຸກ; ອຸດສາຫະກຳ ແລະ ການຄ້າ; ຂຸດຄົ້ນບໍ່ແຮ່ ແລະອື່ນໆ. ປັດຈຸບັນ, ໄດ້ມີຫຼາຍບໍລິ ສັດ ໄດ້ມີການຂໍອະນຸຍາດນຳເຂົ້າສານເຄມີ ເພື່ອມາເກັບມ້ຽນ ແລະ ສົ່ງຂາຍຕາມຄວາມຕ້ອງການຂອງບັນດາບໍລິສັດທີ່ຕ້ອງການຊື້, ເຊິ່ງເຮັດໃຫ້ການນຳເຂົ້າເຄມີນັບມື້ເພີ່ມຂຶ້ນເລື້ອຍໆ ຈຶ່ງເຮັດໃຫ້ການຄວບຄຸມການນຳໃຊ້, ສົ່ງອອກ ແລະ ສົ່ງຜ່ານນັບມື້ນັບມີຄວາມຫຍຸ້ງຍາກຂຶ້ນ, ເນື່ອງຈາກວ່າການປະສານສົມທົບ ແລະ ການຄຸ້ມຄອງການອະນຸມັດຍັງບໍ່ທັນເປັນເອກະພາບ.
ສະນັ້ນ, ເຈົ້າໜ້າທີ່ຕໍາຫຼວດ ຈຶ່ງໄດ້ມີການກວດພົບເຫັນການຂົນສົ່ງເຄື່ອນຍ້າຍສານເຄມີໄປບັນດາເຂດແຂວງພາກເໜືອ ໂດຍມີຈຸດໝາຍປາຍ ທາງເບື້ອງຝັ່ງມຽນມາ ແລະ ຖືກເຈົ້າໜ້າທີ່ຢຶດໄວ້ຢູ່ແຂວງຫຼວງນໍ້າທາ ປະເພດສານໂຊດຽມໄຊຍານາຍ 600 ຖັງ (30ໂຕນ), ສານອາຊິດໄຮໂດຣຄຣໍລິກ 53 ຖັງ (63ໂຕນ) ແລະ ເປັນທີ່ສັງເກດໄດ້ວ່າ ສານເຄມີດັ່ງກ່າວ ສາມາດນໍາໄປເປັນສ່ວນປະສົມເຮັດອັນໃດໜຶ່ງ ຫຼື ການຜະລິດຢາເສບຕິດ.
ປັດຈຸບັນ, ພວກເຮົາກໍາລັງດໍາເນີນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດຂອງລັດຖະບານ, ເຊິ່ງມີຄວາມມຸ່ງໝັ້ນຢ່າງໜັກແໜ້ນໃນການແກ້ໄຂບັນຫາຢາເສບຕິດ ໂດຍການມີສ່ວນຮ່ວມຂອງທຸກຊັ້ນຄົນຕ້ອງມີຄວາມຮັບຜິດຊອບ ເພື່ອເຮັດໃຫ້ວາລະດັ່ງ ກ່າວ ສາມາດຈັດຕັ້ງຜັນຂະຫຍາຍຢ່າງເປັນຮູບປະທໍາ ແລະ ມີຜົນສໍາເລັດ.
ໃນໂອກາດນີ້, ພົຕ ຄໍາກິ່ງ ຜຸຍຫຼ້າມະນີວົງ ກ່າວວ່າ: ຕໍ່ກັບບັນຫາດັ່ງກ່າວນີ້, ກອງປະຊຸມປຶກສາຫາລືແລກປ່ຽນຄັ້ງນີ້ ຈະເປັນອີກວາລະໜຶ່ງທີ່ຈະສ້າງເງື່ອນໄຂໃນການຕີລາຄາຄືນເຖິງຜົນໄດ້ຮັບ, ດ້ານດີ-ຂໍ້ຄົງຄ້າງ ແລະ ພ້ອມກັນປຶກສາຫາລື ເພື່ອຊອກຫາວິທີການ ແລະ ມາດຕະການທີ່ເໝາະສົມໃນການຮ່ວມມືກັນຢ່າງແໜ້ນແຟ້ນ ເພື່ອສາມາດກຳນົດເປັນ ແຜນການດຳເນີນງານໃນຕໍ່ໜ້າແບບຢັ້ງ ຢືນ ແລະ ຍາວນານ.
