ໃນວັນທີ 14 ພະຈິກ 2024 ຄະນບໍລິຫານງານຊາວໜຸ່ມກົມໃຫຍ່ການເມືອງ ກະຊວງປ້ອງກັນຄວາມສະຫງົບ ໄດ້ຈັດພິທີມອບ-ຮັບໜ້າທີ່ເລຂາຄະນະບໍລິຫານງານຊາວໜຸ່ມກົມໃຫຍ່ການເມືອງ ປກສ ລະຫວ່າງ ພັອ ປອ ວຽງໄຊ ທໍາມະສິດ ເລຂາຄະນະບໍລິຫານງານຊາວໜຸ່ມກົມໃຫຍ່ການເມືອງ ປກສ ( ຜູ້ເກົ່າ ) ແລະ ພັຕ ປອ ຈັນທະສອນ ຄຸດທະຄົມ ເລຂາຄະນະບໍລິຫານງານຊາວໜຸ່ມກົມໃຫຍ່ການເມືອງ ປກສ (ຜູ້ໃໝ່ ), ເຂົ້າຮ່ວມໂດຍ ພົຈວ ໜູໃບ ອິນທິສານ ຮອງຫົວໜ້າກົມໃຫຍ່ການເມືອງ ປກສ, ມີຄະນະບໍລິຫານງານຊາວໜຸ່ມກົມໃຫຍ່ການເມືອງຊຸດເກົ່າ ແລະ ຊຸດໃໝ່ເຂົ້າຮ່ວມ.
ພັອ ປອ ວຽງໄຊ ທໍາມະສິດ ໄດ້ກ່າວລາໜ້າທີ່ວ່າ: ໂດຍໄດ້ຮັບການເລືອກຕັ້ງໃນກອງປະຊຸມໃຫຍ່ ຄັ້ງທີ VIII ໃນວັນທີ 28 ມີນາ 2019 ໄດ້ຮັບຮອງແຕ່ງຕັ້ງໃຫ້ເປັນເລຂາຄະນະບໍລິຫານງານຊາວໜຸ່ມກົມໃຫຍ່ການເມືອງປ້ອງກັນຄວາມສະຫງົບເປັນຕົ້ນມາ; ຕະຫຼອດໄລຍະເວລາດັ່ງກ່າວ, ພາຍໃຕ້ການຊີ້ນຳ-ນຳພາຂອງຄະນະພັກກົມໃຫຍ່ການເມືອງປ້ອງກັນຄວາມສະຫງົບ; ທັງໄດ້ຮັບການສະໜັບ ສະໜູນສາມັກຄີຊ່ວຍເຫຼືອຈາກບັນດາສະຫາຍຄະນະບໍລິຫານງານຊາວໜຸ່ມ, ໜ່ວຍຊາວໜຸ່ມ, ຕະຫຼອດຮອດສະມາຊິກຊາວໜຸ່ມອ້ອມຂ້າງກົມໃຫຍ່ການເມືອງ, ໄດ້ເອົາໃຈໃສ່ວຽກງານສຶກສາອົບຮົມການເມືອງ-ແນວຄິດ ເປັນວຽກງານບູລິມະສິດອັນດັບໜຶ່ງ ເພື່ອແນ່ໃສ່ສ້າງທັດສະນະແນວຄິດໃຫ້ແກ່ສະມາຊິກຊາວໜຸ່ມ ເພື່ອສ້າງເງື່ອນໄຂໃຫ້ສະມາຊິກຊາວໜຸ່ມທົ່ວກົມໃຫຍ່ການເມືອງ ປກສ ໄດ້ຮັບການຝຶກຝົນຫຼໍ່ຫຼອມທາງດ້ານຄຸນສົມບັດສິນທຳປະຕິວັດ, ຍົກສູງນໍ້າໃຈຮັກຊາດ, ຮັກລະບອບໃໝ່,ໂດຍຕິດພັນກັບການຊຸກຍູ້ຄະນະຊາວໜຸ່ມແຕ່ລະໜ່ວຍທີ່ຂຶ້ນກັບຈັດຕັ້ງແບ່ງຈຸ, ແບ່ງວຽກຄຸ້ມຄອງການເຄື່ອນໄຫວສະມາຊິກຊາວໜຸ່ມ ແນໃສ່ໃຫ້ສະມາຊິກຊາວໜຸ່ມໃຫ້ມີສະຕິລະວັງຕົວໃນການປ້ອງກັນຕົນເອງ, ປ້ອງກັນການຈັດຕັ້ງ ເພື່ອບໍ່ໃຫ້ກຸ່ມຄົນບໍ່ດີເຂົ້າມາທໍາລາຍມ້າງເພຢ່າງເດັດຂາດ; ນອກນັ້ນ, ໄດ້ຖືເອົາວຽກງານປຸກລະດົມຂະບວນການດ້ານຕ່າງໆ ເປັນພາລະບົດບາດຕົ້ນຕໍໃນການເຄື່ອນໄຫວວຽກງານຂອງຕົນ ເນື່ອງໃນໂອກາດວັນສຳຄັນຕ່າງໆ ຂອງພັກ, ຂອງຊາດ ແລະ ຂອງກຳລັງ ປກສ ເປັນສຳຄັນ ໂດຍຕິດພັນກັບການປະຕິບັດຂໍ້ແຂ່ງຂັນ 4 ບຸກ ແລະ 15 ຂໍ້ແຂ່ງຂັນຂອງຊາວໜຸ່ມກະຊວງ ປກສ ວາງອອກ ເພື່ອຫັນມາເປັນແຜນການອັນລະອຽດ ແລະ ນຳມາຈັດຕັ້ງຜັນຂະຫຍາຍໃຫ້ເກີດດອກອອກຜົນ.
ແຕ່ຖ້າທຽບໃສ່ກັບຄວາມຮຽກຮ້ອງຕ້ອງການຂອງໜ້າທີ່ການເມືອງແລ້ວ, ກໍຍັງມີຂໍ້ຄົງຄ້າງຫຼາຍປະການທີ່ພວກເຮົາທຸກຄົນຕ້ອງໄດ້ສືບຕໍ່ປັບປຸງແກ້ໄຂ ແລະ ເສີມຂະຫຍາຍບັນດາຈຸດດີຜົນງານຕ່າງໆ ທີ່ພວກເຮົາໄດ້ພ້ອມກັນສັງເກດຕີລາຄາຕໍ່ກອງປະຊຸມ ຄັ້ງຜ່ານມາແລ້ວນັ້ນ, ສະເໜີໃຫ້ເລຂາ ແລະ ຄະນະບໍລິຫານງານຊາວໜຸ່ມກົມໃຫຍ່ການເມືອງຊຸດໃໝ່ ໃຫ້ສືບຕໍ່ເອົາໃຈໃສ່ວຽກງານສຶກສາອົບຮົມການເມືອງ-ແນວຄິດແກ່ສະມາຊິກ ເພື່ອເຮັດໃຫ້ສະມາຊິກຮັບຮູ້ ແລະ ເຂົ້າໃຈຢ່າງເລິກເຊິ່ງຕໍ່ກັບແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ຂໍ້ກໍານົດກົດລະບຽບຂອງກໍາລັງ ກໍຄືຂອງກົມໃຫຍ່ການເມືອງ ປກສ, ສືບຕໍ່ປຸກລະດົມສະມາຊິກຊາວໜຸ່ມໃນການເປັນເຈົ້າການຈັດຕັ້ງປະຕິບັດວຽກງານວິຊາສະເພາະຕາມການມອບໝາຍດ້ວຍຄວາມຮັບຜິດຊອບສູງ, ຍົກສູງສະຕິຄວາມຮັບຜິດຊອບຕໍ່ໜ້າທີ່ວຽກງານຂອງຕົນ, ສ້າງທັດສະນະແນວຄິດໃຫ້ຮູ້ຮັກອາຊີບ ແລະ ພັດທະນາຕົນເອງໃຫ້ມີຄວາມຮູ້ຄວາມສາມາດ, ມີຫົວຄິດປະດິດສ້າງໃນການເຮັດໜ້າທີ່ວຽກງານ ກໍຄືການແກ້ໄຂບັນຫາຕ່າງໆ ຕ້ອງໃຫ້ມັນຖືກຕ້ອງຕາມລະບຽບຫຼັກການ, ຄຽງຄູ່ກັບການເອົາໃຈໃສ່ປະຕິບັດຕາມແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ຂອງກໍາລັງ ປກສ ຢ່າງເຂັ້ມງວດ.
ຈາກນັ້ນ, ເລຂາຄະນະບໍລິຫານງານຊາວໜຸ່ມກົມໃຫຍ່ການເມືອງ ປກສ ( ຜູ້ເກົ່າ ) ແລະ ທ່ານເລຂາຄະນະບໍລິຫານງານຊາວໜຸ່ມກົມໃຫຍ່ການເມືອງ ປກສ (ຜູ້ໃໝ່ ) ກໍໄດ້ລົງນາມເຊັນບົດບັນທຶກມອບ-ຮັບໜ້າທີ່ຢ່າງເປັນທາງການ ໂດຍມີ ພົຈວ ໜູໃບ ອິນທິສານ ຮອງຫົວໜ້າກົມໃຫຍ່ການເມືອງ ປກສ, ມີຄະນະບໍລິຫານງານຊາວໜຸ່ມກົມໃຫຍ່ການເມືອງຊຸດເກົ່າ ແລະ ຊຸດໃໝ່ເຂົ້າຮ່ວມເປັນສັກຂີພະຍານ.
