ໃນວັນທີ 29 ສິງຫາ 2024, ທີ່ນະຄອນຫຼວງວຽງຈັນ ໄດ້ຈັດກອງປະຊຸມລັດຖະມົນຕີອາຊຽນ + ສ.ເກົາຫຼີ ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 5 ໂດຍພາຍໃຕ້ການເປັນປະທານຮ່ວມຂອງ ທ່ານ ພັອ ທະວີ ໂຊດຊົງ ລັດຖະມົນຕີກະຊວງຍຸຕິທໍາ ແຫ່ງ ຣາຊະອານະຈັກໄທ ແລະ ທ່ານ ໂຣ ແມນຊົກ ຫົວໜ້າອົງການໄອຍະການ, ພະແນກຕ້ານຢາເສບຕິດ ແລະ ອາຊະຍາກໍາທີ່ມີການຈັດຕັ້ງ, ອົງການໄອຍະການສູງສຸດ ແຫ່ງ ສາທາລະນະລັດ ເກົາຫຼີ, ໂດຍການເຂົ້າຮ່ວມຂອງ ທ່ານ ດຣ ກາວ ກິມ ຮຸນ ເລຂາທິການໃຫຍ່ອາຊຽນ, ມີລັດຖະມົນ ຕີ ບັນດາປະເທດສະມາຊິກອາຊຽນ ແລະ ຕີມໍເລສເຕ ຮັບຜິດຊອບວຽກ ງານຕ້ານອາຊະຍາກໍາຂ້າມຊາດ, ພ້ອມດ້ວຍຄະນະຜູ້ແທນເຂົ້າຮ່ວມ.
ຜູ້ເຂົ້າຮ່ວມກອງປະຊຸມໃນຄັ້ງນີ້ໄດ້ພ້ອມກັນຕີລາຄາຄືນຜົນຂອງການຈັດຕັ້ງປະຕິບັດບັນດາແຜນການຮ່ວມມືຕ້ານອາຊະຍາກໍາຂ້າມຊາດລະຫວ່າງອາຊຽນ ແລະ ສ.ເກົາຫຼີ ໃນໄລຍະຜ່ານມາ ພ້ອມທັງລາຍງານຜົນຂອງກອງປະຊຸມເຈົ້າໜ້າທີ່ອາວຸໂສອາຊຽນ + ສ.ເກົາຫຼີ ວ່າດ້ວຍການຕ້ານອາຊະຍາກໍາຂ້າມຊາດຄັ້ງທີ 17, ຜົນຂອງກອງປະຊຸມເຈົ້າໜ້າທີ່ອາວຸໂສອາຊຽນ+ ສ.ເກົາ ຫຼີ ເພື່ອກະກຽມໃຫ້ແກ່ກອງປະຊຸມລັດຖະມົນຕີອາຊຽນ + ສ.ເກົາຫຼີ ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 5.
ກອງປະຊຸມໄດ້ແລກປ່ຽນທັດສະນະກ່ຽວກັບການຈັດຕັ້ງປະຕິບັດແຜນງານໃນການຮ່ວມມືສະກັດກັ້ນ ແລະ ຕ້ານອາຊະຍາກໍາຂ້າມຊາດລະຫວ່າງອາຊຽນ ແລະ ສ.ເກົາຫຼີ ໃນໄລຍະປີ 2019-2025 ເປັນຕົ້ນແມ່ນການພົວພັນຮ່ວມມືໃນການຕ້ານ, ສະກັດກັ້ນ ແລະ ແກ້ໄຂບັນຫາຢາເສບຕິດ, ການກໍ່ການຮ້າຍ, ການຄ້າມະນຸດ, ການລັກລອບຄ້າຂາຍອາວຸດເສິກ, ອາຊະຍາກໍາທາງເສດຖະ ກິດ, ການຟອກເງີນ, ອາຊະຍາກໍາທາງຄອມພິວເຕີ, ການໂຈລະກໍາທາງທະເລ, ການຄ້າຂາຍສັດປ່າ ແລະ ໄມ້ຫວງຫ້າມ ແລະ ການລັກລອບນໍາຄົນເຂົ້າ-ອອກເມືອງ ແລະ ບັນຫາອື່ນໆທີ່ກ່ຽວຂ້ອງ. ພ້ອມນີ້, ກອງປະຊຸມຍັງໄດ້ກໍານົດວັນເວລາ ແລະ ສະຖານທີ່ຈັດກອງປະຊຸມລັດຖະມົນຕີອາຊຽນ+ ສ.ເກົາຫຼີ ວ່າດ້ວຍອາຊະຍາກໍາຂ້າມຊາດ ຄັ້ງທີ6 ທີ່ປະເທດມາ ເລເຊຍ ຈະເປັນເຈົ້າພາບ, ກອງປະຊຸມໄດ້ຮັບຮອງເອົາຖະແຫຼງການຮ່ວມຂອງກອງປະຊຸມລັດຖະມົນຕີອາຊຽນ+ ສ.ເກົາຫຼີ ວ່າດ້ວຍການຕ້ານອາຊະຍາກໍາຂ້າມຊາດຄັ້ງທີ5 ແລະ ບົດລາຍງານຜົນຂອງກອງປະຊຸມດັ່ງດ່າວ, ເພື່ອເຮັດໃຫ້ການພົວພັນຮ່ວມ ມືຕ້ານອາຊະຍາກໍາຂ້າມຊາດລະຫວ່າງອາຊຽນ ແລະ ສ.ເກົາຫຼີ ມີປະສິດທິພາບ ແລະ ມີປະສິດທິຜົນສູງຂຶ້ນ.
