ໃນວັນທີ 31 ສິງຫາ 2022 ທີ່ກະຊວງ ປກສ, ທ່ານ ພົນໂທ ກົງທອງ ພົງວິຈິດ ຮອງລັດຖະມົນຕີ ກະຊວງປ້ອງກັນຄວາມສະຫງົບ ແຫ່ງ ສປປ ລາວ ເຂົ້າຮ່ວມກອງປະຊຸມໂຕະມົນ “ຫຼຽນຢູນກາງ” (ຮູບແບບກອງປະຊຸມທາງໄກ) ທີ່ ສປ ຈີນ ເປັນເຈົ້າພາບ, ມີບັນດາຜູ້ຊີ້ນຳໃນອະດີດ ແລະ ປັດຈຸບັນຂອງວຽກງານປະຕິບັດກົດໝາຍຈາກອາກຊັງຕິນ, ເບລາຣຸດຊີ, ກຳປູເຈຍ, ຮົງກາລີ, ມົງໂກລີ, ປາກິດສະຖານ, ຣັດເຊຍ, ແຊກບີ, ອາຟະຣິກາໃຕ້ ແລະ ປະເທດອື່ນໆເຂົ້າຮ່ວມ.
ຈຸດປະສົງຂອງການຈັດກອງປະຊຸມດັ່ງກ່າວ ແມ່ນເພື່ອເປັນການຊຸກຍູ້ການຂະຫຍາຍຕົວຂອງເວທີປຶກສາຫາລື ຫຼຽນຢູນກາງ, ສົ່ງເສີມໃຫ້ເວທີປຶກສາຫາລືຮັບໃຊ້ໃຫ້ແກ່ຄວາມຮຽກຮ້ອງຕ້ອງການດ້ານຄວາມປອດໄພ ແລະ ການພັດທະນາຂອງທຸກຝ່າຍຢ່າງມີປະສິດທິຜົນ ທັງເປັນການສະໜອງດ້ານຄວາມປອດໄພສາທາລະນະທີ່ເປັນຮູບປະທຳ ແລະ ມີປະສິດທິຜົນສູງໃຫ້ແກ່ປະຊາຄົມສາກົນ.
ກອງປະຊຸມຈະໄດ້ຄົ້ນຄວ້າປຶກສາຫາລືບັນດາຫົວຂໍ້ ຄື:
“ຂໍ້ສະເໜີກ່ຽວກັບຂອບການດໍາເນີນງານຂອງເວທີປຶກສາຫາລື ຫຼຽນຢູນກາງ”, ຂໍ້ສະເໜີດັ່ງກ່າວ ແມ່ນຜ່ານການປັບປຸງແກ້ໄຂຈາກການສະເໜີຂອງແຕ່ລະຝ່າຍໂດຍພື້ນຖານ ຈາກແນວຄວາມຄິດການຄຸ້ມຄອງເວທີປຶກສາຫາລື ຫຼຽນຢູນກາງ ທີ່ໄດ້ນຳສົ່ງໃຫ້ບັນດາປະເທດໃນເມື່ອກ່ອນ;
ຄົ້ນຄວ້າປຶກສາຫາລືກ່ຽວກັບ “ຮ່າງຂອບວຽກກ່ຽວກັບ ຄະນະບໍລິຫານງານຊຸດທຳອິດຂອງເວທີປຶກສາຫາລື ຫຼຽນຢູນກາງ“ ເພື່ອພ້ອມກັນກຳນົດເວລາຜູ້ເຂົ້າຮ່ວມ ແລະ ວາລະກອງປະຊຸມຂອງເວທີປຶກສາຫາລື ຫຼຽນສູນກາງ;
ຫາລືກ່ຽວກັບ “ຮ່າງການຈັດຕັ້ງຂອງກອງເລຂາເວທີປຶກສາຫາລື ຫຼຽນຢຸນກາງ” ໂດຍໃຫ້ສິດແກ່ສະມາຄົມສົ່ງເສີມມິດຕະພາບຈີນ ເປັນເຈົ້າພາບຈັດເວທີປຶກສາຫາລື ຫຼຽນຢູນກາງ ໃນຄັ້ງຕໍ່ໄປ ແລະ ໃນນາມກອງເລຂາເພື່ອຮ່າງກົດລະບຽບຂອງເວທີປຶກສາຫາລື ພ້ອມທັງເປັນຜູ້ປະສານງານກັບທຸກຝ່າຍ ຕໍ່ກັບບັນດາຫົວຂໍ້ທີ່ແຕ່ລະຝ່າຍຍົກຂຶ້ນມາປຶກສາຫາລື ໃນກອງປະຊຸມໂຕະມົນ.
ໃນກອງປະຊຸມ, ຝ່າຍ ສປ ຈີນ ມີ ທ່ານ ເຈິງ ເຫວີຍ ຊຸງ ຮອງປະທານຄະນະກໍາມະການຕ້ານຢາເສບຕິດ ສປ ຈີນ ທັງເປັນ ຜູ້ຊີ້ນຳວຽກງານປັບປຸງຍົກລະດັບເວທີປຶກສາຫາລື ຫຼຽນຢູນກາງ, ທ່ານ ເສິນ ຈື້ ໝິນ ປະທານສະມາຄົມສົ່ງເສີມມິດຕະພາບຈີນ ແລະ ທ່ານ ຫຼີ ເຢົ້າ ກວາງ ຫົວໜ້າກອງບັນຊາການ ປກສ ແຂວງຈຽງຊູ ເຂົ້າຮ່ວມ.
