ກະຊວງສຶກສາທິການ ແລະ ກິລາ ໄດ້ຈັດພິທີໄຂສົກຮຽນໃໝ່ ປະຈໍາສົກຮຽນ 2022-2023 ຂຶ້ນຢ່າງເປັນທາງການທົ່ວປະເທດ ໃນວັນທີ 1 ກັນຍາ 2022, ໂດຍມີ ທ່ານ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ, ມີຜູ້ບໍລິຫານການສຶກສາ ແລະ ກິລາທຸກຂັ້ນ, ພະນັກງານ, ຄູອາຈານ, ນັກຮຽນ-ນັກສຶກສາ ພ້ອມດ້ວຍພໍ່-ແມ່ຜູ້ປົກຄອງ ໃນຂອບເຂດທົ່ວປະເທດ ເຂົ້າຮ່ວມໃນຮູບແບບວິດີໂອທາງໄກ.
ທ່ານ ພຸດ ສິມມາລາວົງ ກ່າວວ່າ:
ສົກຮຽນ 2022-2023 ນີ້ ເປັນສົກຮຽນໜຶ່ງທີ່ທົ່ວຂະແໜງສຶກສາ ແລະ ກິລາ ຈະໄດ້ສຸມໃສ່ຈັດຕັັ້ງປະຕິບັດແຜນພັດທະນາການສຶກສາ ແລະ ກິລາ 5 ປີ ຄັັ້ງທີ IX (2021-2025) ໂດຍຈະເສີມຂະຫຍາຍສິ່ງທີ່ພວກເຮົາເຮັດໄດ້ດີ, ແກ້ໄຂບັນຫາ ແລະ ຂໍ້ຄົງຄ້າງໃນສົກຮຽນຜ່ານມາ ເປັນຕົ້ນແມ່ນອັດຕາການເຂົ້າຮຽນ, ຄຸນນະພາບການຮຽນ-ການສອນ ແລະ ຄຸນະພາບຂອງຜູ້ຮຽນ.
ໃນສົກຮຽນນີ້ ແມ່ນມີຄວາມສະດວກຫຼາຍກວ່າ ຖ້າທຽບກັບ 2 ສົກຮຽນຜ່ານມາ. ດັ່ງນັ້ນ, ກະຊວງຈຶ່ງໄດ້ກໍານົດເອົາວັນທີ 1 ກັນຍາ 2022 ເປັນມື້ໄຂສົກຮຽນໃໝ່ ຄືກັນກັບປະເພນີທີ່ພວກເຮົາເຄີຍຈັດຕັ້ງປະຕິບັດກັນມາ.
ເມື່ອຫວນຄືນເບິ່ງປະຫວັດການສຶກສາແລ້ວ ພວກເຮົາຈະເຫັນວ່າ: ການສຶກສາບໍ່ເຄີຍຢຸດຕິ, ບໍ່ວ່າຈະຢູ່ໃນພາວະສົງຄາມ ຫຼື ເກີດມີໄພພິບັດ, ນັກຮຽນ-ນັກສຶກສາ ກໍຕ້ອງໄດ້ຮັບການສຶກສາຢ່າງຕໍ່ເນື່ອງ.
ການໄຂສົກຮຽນໃໝ່ປີນີ້ ຍັງສືບຕໍ່ມີສິ່ງທ້າທາຍ ແລະ ທົດສອບພວກເຮົາສົມຄວນ ເນື່ອງຈາກຍັງມີການລະບາດຂອງພະຍາດອັກເສບປອດຈາກເຊື້ອຈຸ ລະໂຣກສາຍພັນໃໝ່ (ໂຄວິດ-19) ຢູ່; ເຖິງວ່າຄວາມຮຸນແຮງອາດຈະບໍ່ສູງ ແຕ່ພວກເຮົາກໍໃຕ້ອງມີສະຕິໃນການປ້ອງກັນ ໃນທຸກການເຄື່ອນໄຫວ ແລະ ບັນຫາໄພພິບັດທີ່ເກີດຂຶ້ນ ຢູ່ບັນດາແຂວງໃນທົ່ວປະເທດ ໂດຍສະເພາະ ແຂວງພາກເໜືອ.
ແນວໃດກໍຕາມ, ຍ້ອນຄວາມເອົາໃຈໃສ່ຂອງສູນກາງພັກ ແລະ ລັດຖະບານ ເຊິ່ງຍາມໃດກໍໄດ້ຖືເອົາວຽກງານການສຶກສາໄປກ່ອນກ້າວໜຶ່ງ; ພິເສດໃນປີນີ້ ພວກເຮົາຈະໄດ້ຮັບຟັງສານຂອງ ທ່ານນາຍົກລັດຖະມົນຕີ ແຫ່ງ ສປປ ລາວ ໃນມື້ໄຂສົກຮຽນໃໝ່. ສະນັ້ນ, ຈຶ່ງຢາກຮຽກຮ້ອງໃຫ້ຜູ້ບໍລິຫານການສຶກສາ, ຄູອາ-ຈານ, ລູກຫຼານນັກຮຽນ-ນັກສຶກສາ ນຳໄປສຶກສາເຜີຍແຜ່ ແລະ ຜັນຂະຫຍາຍເຂົ້າວຽກງານຕົວຈິງໃຫ້ເປັນຮູບປະທຳ.
