ກຳລັງປ້ອງກັນຄວາມສະຫງົບປະຊາຊົນ:  ຕັ້ງໜ້າເສີມຂະຫຍາຍ 3 ທາດແທ້ ແລະ 7 ມູນເຊື້ອ ຂອງກຳລັງປ້ອງກັນຄວາມສະຫງົບ.
  Ministry of Public Security
 
 
 
 
 
 
 
ແຈ້ງເຫດ ສຸກເສີນ: 1191
 
 
 
 
 
 
 
 
 
 
 

 

  

ຄຳຕອບສຽງສະທ້ອນຄວາມຫຍຸ້ງຍາກການເຮັດ ໃບຕາດິນ

ຄວາມ​ຫຍຸ້ງ­ຍາກ​ໃນ​ການ​ເຮັດ​ໃບ​ຕາ­ດິນ ໂດຍ​ສະເພາະ​ແມ່ນ​ໄລຍະ​ເວລາ​ຫຼ້າ​ຊ້າ ແລະ ລາ­ຄາ​ແພງ ຍັງ​ຄົງ​ສືບ​ຕໍ່​ສ້າງ​ຄວາມ ​ກົດ​ໜ່ວງ​ແກ່​ປະຊາຊົນ​ໃນ​ການ​ເປັນ​ເຈົ້າ​ຂອງ​ ກຳມະສິດ​ຢ່າງ​ຖືກຕ້ອງ, ຜູ້​ທຸກ ຍາກ​ເຂົ້າ​ບໍ່​ເຖິງ, ສະມາຊິກ​ສະພາ​ເຫັນ​ບັນຫາ ​ຈິ່ງ​ຮຽກຮ້ອງ​ລັດ​ຊ່ວຍ​ແກ້, ສ່ວນ​ພາກ​ລັດ​ໃຫ້​ຄຳ​ຕອບ​ຈະ​ກຳນົດ​ ມາດຕະຖານ​ການ​ໃຫ້​ບໍລິການ​ປະຊາຊົນ ​ອອກ​ໃບ​ຕາດິນ​ຊ້າ​ສຸດ ​ບໍ່​ກາຍ 4 ອາ­ທິດ.ທ່ານ ນູ​ລິນ ສິນ​ບັນດິດ ລັດຖະມົນຕີ​ວ່າການ​ກະ ຊວງ​ຊັບພະຍາກອນ​ທຳ​ມະ​ຊາດ ແລະ ສິ່ງແວດລ້ອມ ໄດ້​ຊີ້​ແຈງ​ຕໍ່​ກອງ​ປະຊຸມ​ສະພາ​ເມື່ອ​ອາທິດ​ຜ່ານ​ມາ​ ວ່າ: ໃບ​ຕາດິນ​ແມ່ນ​ເອກະສານ​ທີ່​ເປັນ​ຫຼັກ​ຖານ​ຕົ້ນຕໍ​ໜຶ່ງ​ດຽວ​ກ່ຽວ​ກັບ​ສິດ ​ນຳ​ໃຊ້​ ທີ່​ດິນ​ຢ່າງ​ຖາວອນ ຊຶ່ງ​ໃນ​ໄລຍະ​ຜ່ານ​ມາ​ກໍ​ຄື​ປະຈຸ​ບັນລັດຖະບານ​ເວົ້າ​ລວມ, ເວົ້າ​ສະເພາະ​ແມ່ນ​ກະຊວງ​ຊັບພະຍາກອນ​ທຳ​ມະ​ຊາດ ແລະ ສິ່ງແວດລ້ອມ ໄດ້​ເອົາໃຈໃສ່​ຊີ້​ນຳ​ເລັ່ງ​ອອກ​ໃບ​ຕາດິນ​ໃຫ້​ບັນລຸ 1 ລ້ານ​ຕອນ​ໃນ​ຂອບ​ເຂດ​ທົ່ວ​ປະເທດ ຕາມ ທີ່​ໄດ້​ກຳນົດ ​ໄວ້​ໃນ​ແຜນ​ພັດທະນາ​ເສດຖະກິດສັງຄົມ ຄັ້ງ​ທີVII; ເພື່ອ​ບັນລຸ​ຄາດໝາຍ​ໃນ​ການ​ອອກ​ໃນ​ຕາດິນ ແຕ່​ລະ​ປີ​ທີ່​ກະຊວງ​ໄດ້​ມອບ​ໝາຍ ​ໃຫ້​ແຕ່​ລະ​ແຂວງ  (ຕົວຢ່າງ​ໃນ​ສົກ​ປີ​ນີ້​ໄດ້​ວາງ​ຄາດໝາຍ​ອອກ​ໃບ​ຕາດິນ​ໃຫ້​ໄດ້ 120.000 ຕອນ ໃນ​ຂອບ​ເຂດ​ທົ່ວ​ປະເທດ ແລະ ໄດ້​ແບ່ງ​ຕົວ​ເລກ​ຄາດໝາຍ​ໃຫ້​ແຂວງ​ເຊັ່ນ: ແຂວງ​ສະຫວັນ​ນະ​ເຂດ 10.000 ຕອນ, ຫຼວງ​ພະ​ບາງ 7.000 ຕອນ) ໄປ​ຈັດ​ຕັ້ງ ​ປະຕິບັດ ໂດຍ​ກຳນົດ​ເອົາ​ບ້ານ​ເປົ້າໝາຍ​ຢູ່​ໃນ​ແຕ່​ລະ​ເມືອງ ແລະ ມອບ​ຄວາມ​ຮັບຜິດຊອບ ໃຫ້​ເມືອງ​ເປັນ​ຜູ້ຈັດ​ຕັ້ງ​ປະຕິບັດ​ຕົວ​ຈິງ ຊຶ່ງ​ໄດ້​ສ້າງຕັ້ງ​ຈຸ​ງານ​ອອກ​ໃບ​ຕາດິນ​ປະກອບ​ດ້ວຍ​ພະນັກງານ​ຢ່າງ​ໜ້ອຍ 4 ຄົນ, ມາ​ເຖິງ​ປະຈຸ​ບັນ ແມ່ນ ປະຕິບັດ​ໄດ້ 780.000 ກວ່າ​ຕອນ ເທົ່າ​ກັບ 78% ເມື່ອ​ທຽບໃສ່ ແຜນການ.

ສຳລັບ​ການ​ກຳນົດ​ເວລາ​ທີ່​ໃຊ້​ໃນ​ການ​ ອອກ​ໃບ​ຕາດິນ​ຢ່າງ​ເປັນ​ລະບົບ (ທີ່​ດຳເນີນ​ໄປ​ເປັນ​ໜ້າ​ກະດານ​ຄົບ​ທຸກ​ຕອນ​ດິນ​ໃນ​ບ້ານ ​ເປົ້າ​ໝາຍ​ທີ່​ ທາງ​ອົງ­ການ​ປົກ­ຄອງ​ແຂວງ​ໄດ້​ຕົກ­ລົງ​ໃຫ້​ດຳ­ເນີນ​ການ​ອອກ​ໃບ​ຕາດິນ) ແມ່ນ​ປະມານ 90 ວັນ  (ລວມ​ທັງ​ການ ​ແຈ້ງ​ການ​ປະກາດ​ຫາ​ຜູ້​ຄັດຄ້ານ 30 ວັນ) ແລະ ແບບ​ສະເພາະ​ຕອນ (ຕາມ​ການ​ຮ້ອງ​ຂໍ​ຂອງ​ບຸກຄົນ ຫຼື ນິຕິບຸກຄົນ) ແມ່ນ​ປະມານ 120 ວັນ (ລວມ​ທັງ​ການ​ແຈ້ງ​ປະກາດ​ຫາ​ຜູ້​ຄັດຄ້ານ 90 ວັນ).

ສຳລັບ​ຄ່າ​ທຳນຽມ ແລະ ຄ່າ​ໃຊ້​ຈ່າຍ​ຕ່າງໆ ທີ່​ເກັບ​ນຳ​ເຈົ້າ​ຂອງ​ຕອນ​ດິນ​ນັ້ນ ແມ່ນ​ປະຕິບັດ​ຕາມ​ລັດ​ຖະ​ບັນຍັດ​ຂອງ ​ປະທານ​ ປະເທດ ​ສະບັບ​ເລກ​ທີ 003/ປປທ, ວ່າ​ດ້ວຍ​ການ​ແຈ້ງ​ລາຄາ ຄ່າ​ແບບ​ພິມ 15.000 ກີບ​ຕໍ່​ຊຸດ, ຄ່າ​ຫຼັກ​ເຂດ 10.000 ກີບ​ຕໍ່​ຫຼັກ, ຄ່າ​ບໍລິການ​ວັດແທກ​ສຳລັບ​ປຸກ​ສ້າງ 100-350 ກີບ​ຕໍ່​ຕາ​ແມັດ, ສຳລັບ​ດິນ​ກະສິກຳ 15-30 ກີບ​ຕໍ່​ຕາ​ແມັດ (ຄອບຄົວ​ທຸກ​ຍາກ ​ແມ່ນ​ຈະ​ໄດ້​ຮັບ​ການ​ຍົກເວັ້ນ​ບໍ່​ເກັບ​ຄ່າ​ບໍລິການ​ ວັດແທກ), ຄ່າ​ທຳນຽມ​ໃບ​ຕາດິນ 15.000-30.000 ກີບ​ຕໍ່​ໃບ,ຖ້າ​ເປັນ​ທີ່​ດິນ​ປຸກ​ສ້າງ ​ໃນ​ເຂດ​ເທສະ​ບານ​ເນື້ອທີ່ 800 ຕາ​ແມັດ ຈະ​ມີຄ່າ​ໃຊ້​ຈ່າຍ​ທັງ​ໝົດ 365.000 ກີບ. ຖ້າ​ເປັນ​ທີ່​ດິນ​ກະສິກຳ​ເນື້ອທີ່ 1 ເຮັກຕາ ຈະ​ມີຄ່າ​ໃຊ້​ຈ່າຍ​ທັງ​ໝົດ 385.000 ກີບ.

ສະນັ້ນ ໃນຕໍ່ໜ້າ​ນີ້ ກະຊວງ​ຈະ​ໄດ້​ຈັດ​ຕັ້ງ​ຕາມ​ມາດ​ຕະການ​ຢ່າງ​ເຄັ່ງ​ຄັດ ດຳເນີນ​ການ​ຫັນ​ວຽກ​ງານ​ອອກ​ໃບ​ຕາດິນ​ໃຫ້​ທັນ​ສະໄໝ ໂດຍ​ການ​ນຳ​ໃຊ້​ເຕັກ​ໂນ​ໂລ​ຊີ​ໃໝ່​ເຂົ້າ​ຊ່ວຍ ເຊັ່ນ: ການ​ນຳ​ໃຊ້​ໂປຣ​ແກຣມ​ອອກ​ໃບ​ຕາດິນ, ອຸປະກອນ​ສຳ​ຫຼວດວັດແທກ ເພື່ອ​ເຮັດ ​ໃຫ້ການ​ປະຕິບັດ​ວຽກ​ງານ ວ່ອງໄວ, ສະດວກ, ຖືກຕ້ອງ ແລະ ຊັດ​ເຈນ​ຂຶ້ນ, ສ້າງ​ຈຸ​ງານ​ຂຶ້ນ​ທະບຽນ ​ອອກ​ໃບ​ຕາດິນ​ໃຫ້​ໄດ້ 136 ຈຸ​ງານ ແລະ ຕ້ອງການ​ງົບປະມານ 40 ຕື້​ກີ​ບ ເພື່ອ​ບັນລຸ​ຕົວ​ເລກ​ຄາດໝາຍ​ສູ້​ຊົນ​ຮອດ​ປີ 2015 (ກ້ອງ gpd 122 ໜ່ວຍ, total station 35 ຊຸດ).

ເລັ່ງ​ກຳນົດ​ມາດຕະຖານ​ໃນ​ການ​ໃຫ້​ ບໍລິການ​ປະຊາຊົນກ່ຽວ​ກັບ​ການ​ ອອກ​ໃບ​ຕາດິນກໍ​ຄື​ການ​ຈົດ​ທະບຽນ​ນິຕິ​ກຳ​ທີ່​ດິນໃຫ້​ມີ​ກຳນົດ ​ເວລາ​ ອັນ​ຈະແຈ້ງ ແລະ ເປັນ​ເອກະ​ພາບ​ໃນ​ທົ່ວ​ປະເທດເຊັ່ນ: ການ​ຈົດ​ທະບຽນ​ມອບໂອນ​ທີ່​ດິນ​ໝົດ​ຕອນ ຈະ​ໃຊ້​ເວ­ລາ 2 ອາທິດ, ກໍລະນີ​ມີ​ການ​ແບ່ງ​ແຍກ​ຕອນ​ດິນ​ຈະ​ໃຊ້​ເວລາ 4 ອາທິດ, ທ່ານ ໜູ​ລິນ ສິນ​ບັນດິດ ກ່າວ​ເນັ້ນ.

 

 

ເລືອກພາສາ:

  |

 
 
 
 
 
 

 
 
 
 
 
 
 
 
 

 

ກະຊວງ ປ້ອງກັນຄວາມສະຫງົບ
ບ້ານ ຫັດສະດີ,​ ເມືອງ ຈັນທະບູລີ, ນະຄອນຫຼວງວຽງຈັນ
ກະຊວງ ປ້ອງກັນຄວາມສະຫງົບ
© 2014 ສະຫງວນລິຂະສິດ
ອອກແບບ/ພັດທະນາ ໂດຍ:
ກົມສື່ສານ