ກຳລັງປ້ອງກັນຄວາມສະຫງົບປະຊາຊົນ:  ຕັ້ງໜ້າເສີມຂະຫຍາຍ 3 ທາດແທ້ ແລະ 7 ມູນເຊື້ອ ຂອງກຳລັງປ້ອງກັນຄວາມສະຫງົບ.  
   
 
 
 
 
 

ກອງປະຊຸມໃຫຍ່ຄັ້ງທີ IX ຂອງພັກ

 
ແຈ້ງເຫດ ສຸກເສີນ: 1191
 
 
 
 
 
 
 
 
 
 
 
 
 
 
 
  

ສປປ ລາວ ​ເລີ່​ມ​ໃຫ້​ບໍລິການ​ຢາ​ຝັງ​ຄຸມ​ກຳ​ເນີ​ດ

ປັດຈຸບັນ ສປປ ລາວ ກໍ​ຄື​ ກະຊວງ​ສາທາລະນະ​ສຸກ ​ໄດ້​​ເປີດ​ນຳ​ໃຊ້​ຢາ​ຝັງ​ຄຸມ​ກຳ​ເນີ​ດ ສຳລັບ​ແມ່ຍິງ ​ແບບ ​ສະດວກ​ສະບາຍ, ມີ​ປະສິດທິ​ຜົນ​ສູງ ​ແລະ ສາມາດ​ໃຊ້​ໄດ້​ດົນ​ເຖິງ 3 ປີ​ ເປັນ​ວິທີ​ທີ່​ເໝາະ​ສົມ​ສຳລັບ​ ແມ່ຍິງ ​ທີ່​ຍັງ​ບໍ່​ພ້ອມ​ຈະ​ມີ​ລູກ ​ແລະ ຕ້ອງການ​ຢາກ​ມີ​ລູກ​ຫ່າງ ເຊິ່ງ​ເປັນ​ອີກທາງ​ເລືອກ​ໜຶ່ງ​ໃນ​ ການວາງ​ແຜນ​ຄອບຄົວ ນອກຈາກ​ການ​ຄຸມ​ກຳ​ເນີ​ດ ​ແບບກິນ​ຢາ​ເມັດ, ຢາສັກ​, ຖົງ​ຢາງ​ອະນາ​ໄມ, ການ​ໃສ່​ຮ່ວງ ​ແລະ ​ເຮັດ​ໝັນ​ຍິງ-ໝັນ​ຊາຍ.

ໃນ​ຕອນ​ເຊົ້າ​ວັນ​ທີ 21 ​ເດືອນ​ຕຸລາ ປີ 2014 ນີ້, ສູນ​ຮັກສາ​ສຸຂະພາບ​ແມ່ ​ແລະ ​ເດັກ, ກົມ​ອະນາ​ໄມ-ສົ່ງ​ເສີມ​ ສຸຂະພາບ ກະຊວງ​ສາທາລະນະ​ສຸກ ຮ່ວມ​ກັບ ອົງການ​ສະຫະ​ປະຊາ​ຊາດ ກອງ​ທຶນ​ສຳ​ລັບ​ປະຊາກອນ (UNFPA) ​ໄດ້​​ເປີດ​ນຳ​ໃຊ້​ຢາ​ຝັງ​ຄຸມ​ກຳ​ເນີ​ດໃນ ສປປ ລາວ ຢ່າງ​ເປັນ​ທາງ​ການ ໂດຍ​ການ ​ເຂົ້າ​ຮ່ວມ​ຂອງ ທ່ານ ດຣ. ນາງ​ ອິນ​ລາ​ວັນ ​ແກ້ວ​ບຸນ​ພັນ ລັດຖະມົນຕີ​ຊ່ວຍ​ວ່າການ​ກະຊວງ​ສາທາລະນະ​ສຸກ, ທ່ານ ດຣ. ຣັດຊານ ມົນ​ຕາ​ຊາ​ມິ (Hassan Mohtashami) ຜູ້ຕາງໜ້າອົງການ​ສະຫະ​ປະຊາ​ຊາດ ກອງ​ທຶນ​ສຳ​ລັບ​ ປະຊາກອນ, ມີ​ຄະ​ນະ​ກົມ, ​ຄະນະ​ອຳນວຍ​ການ​ໂຮງໝໍ ​ແລະ ພາກ ສ່ວນ​ກ່ຽວຂ້ອງ​ເຂົ້າ​ຮ່ວມ​ນັ້ນ, ທ່ານ ລັດຖະມົນຕີ​ຊ່ວຍ​ວ່າການ​ໄດ້​ກ່າວ​ວ່າ: ຢາ​ຝັງ​ຄຸມ​ກຳ​ເນີ​ດ ​ແມ່ນ​ໄດ້​ມີ​ການ​ນຳ​ໃຊ້​ຢູ່​ຫລາຍ​ປະ​ເທດ​ໃນ​ອາຊີ ​ແລະ ​ໃນ​ທົ່ວ​ໂລກ, ການ​ປະກາດ​ນຳ​ໃຊ້​ຢາ​ຝັງ​ຄຸມ​ກຳ​ເນີ​ດສຳລັບ​ແມ່ຍິງ ຢູ່ ສປປ ລາວ ນີ້ ຖື​ເປັນຄວາມ​ ພາກພູມ​ໃຈ ​ຂອງ ກະຊວງ​ສາທາລະນະ​ສຸກ ​ເພາະ​ ຈະ​ເປັນ​​ອີກທາງ​ເລືອກ​ໜຶ່ງ​ໃນ​ການວາງ​ແຜນ​ຄອບຄົວ, ​ແມ່ຍິງ​ສາມາດ ​ເຂົ້າ​ເຖິງ​ໄດ້​, ຍາມ​ໃດ​ພວກ​ເຂົາ​ຕ້ອງການ​ຈະ​ຖືພາ ​ແລະ ​ເກີດ​ລູກ ​ເຊິ່ງຢາ​ຝັງ ​ຄຸມ​ກຳ​ເນີ​ດ​ແມ່ນ ​ເໝາະ​ສົມ​ສຳ ລັບ​ແມ່ຍິງ ​ໂດຍ​ບໍ່​ຄຳນຶງ​ເຖິງ​ອາຍຸ ​ແລະ ຈຳນວນ​ຂອງ​ການ​ຖືພາ ​ແລະ ​ໃນ​ອະນາຄົດ​ອັນ​ໃກ້ໆ​ນີ້  ກະຊວງ​ ສາທາລະນະ​ສຸກ ຕ້ອງ​ໄດ້​ປັບປຸງ​ຄູ່​ມື​ການ​ປິ່ນປົວ​ແຫ່ງ​ຊາດ ກ່ຽວ​ກັບ​ຢາ​ຝັງ ​ແລະ ​ເຊື່ອມ​ສານ​ໃຫ້​ກາຍເປັນ​ ມາດຕະຖານ​ແຫ່ງ​ຊາດ ​ເພື່ອ​ສະໜັບ​ສະໜູນ​ຜູ້​ໃຫ້​ບໍລິການ​ສຸຂະພາບ ​ໃນ​ເວລາ​ທີ່​ໃຫ້​ບໍລິການ​​ໃຫ້​ຄຳ​ປຶກສາ, ການ​ບໍລິການ​ວາງ​ແຜນ​ຄອບຄົວ​ແກ່​ແມ່ຍິງ ​ແລະ ຄູ່​ແຕ່ງງານ.

ຢາ​ຝັງ​ຄຸມ​ກຳ​ເນີ​ດ ​ແມ່ນ​ການ​ຄຸມ​ກຳ​ເນີ​ດຊະນິດ​ໃໝ່ ມີ​ລັກສະນະ​ເປັນ​ທ່ອນ​ຢາງຫລອດ​ນ້ອຍໆ​ທີ່​ບັນຈຸ​ຮໍ​ໂມນ​ຄຸມ​ ກຳ​ເນີ​ດ ສາມາດ​ຫົດ-ຢືດ​ໄດ້ ​ເພື່ອ​ສອດ​ ເຂົ້າ​ໄປ​ໃນ​ກ້ອງ​ຜິວໜັງ​ດ້ານ​ໃນ​ກົກ​ແຂນ​ຂອງ​ແມ່ຍິງ ​ເຊິ່ງສາມາດ​ ປ້ອງ​ກັນ​ການ​ຖືພາ​ໄດ້​ຫລາຍ​ກວ່າ 99%, ປະຢັດ ​ໃສ່​ຄັ້ງດຽວ​ໃຊ້​ໄດ້​ເຖິງ 3 ປີ, ບໍ່​ຈຳ​ ເປັນຕ້ອງທຽວ​ໄປ​ຫາ​ ທ່ານໝໍ​ອີກ​ຫລາຍ​ເທື່ອ, ສາມາດ​ມີ​ລູກ​ໄດ້​ທັນທີ​ເມືອ​ເອົາ​ເຂັມ​ຄຸມ​ກຳ​ເນີ​ດອອກ ​ແລະ ສາມາດ​ເຮັດ​ວຽກ​ໜັກ ​ໄດ້​ເປັນ​ປົກກະຕິ.

ພິ​ ເສດ ສະ​ເພາະວັນ​ທີ 22 ​ເດືອນ ຕຸລາ ປີ 2014 ​​ເລີ່​ມແຕ່​ເວລາ 8:00​-16:00 ໂມງ ​ແມ່ຍິງ​ຜູ້​ທີ່​ສົນ​ໃຈ ​ຈະ​ນຳ​ໃຊ້​ວິທີ​ການ​ຄຸມ​ກຳ​ເນີ​ດ​ແບບ​ໃໝ່ໃຫ້​ໄປ​ ຮັບ​ຄຳ​ປຶກສາ ​ແລະ ບໍລິການ​ຝັງ​ຢາ​ຄຸມ​ກຳ​ເນີ​ດ​ໂດຍ​ບໍ່​ເສຍ​ຄ່າ ຢູ່​ທີ່​ໂຮງໝໍ​ມະ​ໂຫສົດ, ​ໂຮງໝໍ​ເສດຖະທິລາດ. ສ່ວນວັນ​ທີ 23 ​ເດືອນ ຕຸລາ ປີ 2014 ​ແຕ່​ເວລາ 8:00​-16:00 ໂມງ ​​ແມ່ນ​ຢູ່ໂຮງໝໍ​ມິດຕະພາບ ​ແລະ ​ໂຮງໝໍ​ແມ່ ​ແລະ ​ເດັກ​ແດງ.

 
 
 

ເລືອກພາສາ:

  |

 
 

 

 

 
 
 

 

 
 
 
 
 
 
 

ດາວໂຫຼດພາສາລາວ

ເພັດຊະຣາດ OT

 

ຂັ້ນຕອນ Save ພາສາລາວ

ກະຊວງ ປ້ອງກັນຄວາມສະຫງົບ
ບ້ານ ຫັດສະດີ,​ ເມືອງ ຈັນທະບູລີ, ນະຄອນຫຼວງວຽງຈັນ
ກະຊວງ ປ້ອງກັນຄວາມສະຫງົບ
© 2014 ສະຫງວນລິຂະສິດ
ອອກແບບ/ພັດທະນາ ໂດຍ:
ກົມສື່ສານ